Saqqummiisoq: Jørgen Lund

Imm. 4-mut: Siulittaasup nalunaarutaa

Siullermik: Kommunit imminnut qanittut gruppinngorlugit suleqatigiissinneqarnerat assut oqallinnermut iluarpoq.

Siulittaasup nalunaarutaa tunngaviatigut akuersaarparput. Maannalu oqaasissavut ilaatigut siulersuisunut tapersiissutaapput, ilaatigullu eqeersimaarnerusariaqarnermik oqariartuutaallutik.

Isumaqarpugut isumaginninnerup tungaatigut KANUKOKA suli annertuumik ilungersuutissaqartoq. Ukiuni kingullerni kommunit isumaginninnermi suliaat, soorlu annertuumik innarluutillit aammalu meeqqat inuusuttuaqqallu sullinneqarnerannut tunngatillugu kommunit pilliuteqarnerat, annertusiartuinnarpoq isumaqarpugullu KANUKOKAp siulersuisuisa sukataarnerullutik aammalu kommuninut sinniisuulluarnerullutik ingerlatsinissaat pisariaqartoq.

Ataatsimoortumik tapiissutit pillugit isumaqatigiinniartarnerni KANUKOKAp nukittuujulluni sapiissuseqarluni naalakkersuinikkullu nuna tamakkerlugu eqaatsumik suleriaaseqarluni ingerlanissaa pisariaqarluinnartutut isumaqarfigivarput. Ippassaq aallartinnermi naalakkersuisut oqaaseqartitaata ilaatigut oqaatigaa kommunit aningaasaqarnerat ammukartoq, tamannalu ilumoorpoq. Kommunit aningaasaqarnerata ammukarneranut kommunit kisimik pisuunnginnerat erseqqissaatigisariaqarsoraarput, tassa nunatsinni naalakkersuisut pisussaaffimminnik ilaatigut kommuninut miloriussuinerat ukiuni kingullerni annertusisimammat. Taamaattumik KANUKOKAp tassani sukataarnerulluni aammalu kommuninut illersuilluarluni inissisimanissaa piffissami tullermi pisariaqarpoq.

Ukiuni kingullerni takuarput suliffissaaleqisut nuna tamakkerlugu amerliartornerat. Tamanna kommunini ataasiakkaani qaangerniarlugu piumassuseqaraluarluni suliffinnik nutaanik pilersitsinissamut inatsisitigut periarfissaqannginneq aporfiuvoq. Ukiuni arlaqartuni KANUKOKAp tamanna aaqqinniarlugu noqqaassuteqarsimanera, naalakkersuisut peqatigalugit inatsisipnr. 22-p 1994-imeersup allanngortinneqarnissaa pisariaqarluinnalersimasoq pillugu, KANUKOKA-miit sulissutigineqarnera iluarisimaarparput. Tamatumalu peqqissaartumik suliarineqarnera neriuppugut ungasissorsuunngitsumi kommunini ingerlatsinitsinnut iluaqutaalerumaartoq.

Kommunit ataasiakkaat aningaasaqarnerat ilorraap tungaanut sangutillugu siulersuisut aqqutissiuussinissamik siunnersuusiornissaat pisariaqarsoraarput - tamatumani kommunit nunap immikkoortukkuutaartumik suleqatigiissinnaanerat aallaavigalugu. Taamaattumik kommunalreformip nalilersorneratigut nutarterneqarsinnaaneranillu kommunit kattunneqarnissaannik siunnerfilimmik siunnersuutinik saqqummiussisoqarnissaa kissaatiginarpoq. Nalunngilarput kommunaleformi ukiut arfineq-marluk missaannik pisoqaassuseqalersimavoq, taamaattumik maanna kommunit kattussinneraannik oqallittoqarnerani isumaqarpugut taassuma nutarterneqarnissaa pisariaqalersimasoq. Kujataani suleqatigiinniit oqaatigissavarput kommunit kattussinnaanerannik periarfissaq ammaffigineqarmat aammalu suleqatigiiffissanut periarfissanik oqallisiginneqqinnissamut piareersimavugut. Aamma una oqaatigilaarusuppara: Nunatta aningaasaqarnerata pitsanngoriartortinnissaanut tunngatillugu ilaatigut oqaatigineqarput qinikkanut aningaasartuuterpassuit aamma allafissornikkut aningaasartuuterpassuit. Taamaattumik aamma siunissami inoqarfiit taama amerlatigiuaannarnissaat ilanngullugu eqqarsaatigineqartariaqarpoq. Tassa nunarput ingerlatissagutsigu nammineq aningaasatigut aqussinnaalertillugu qularutissaanngilluinnarpoq tamakku tikillugit allaat nalilersuinissaq pisariaqassasoq.

Atuarfitsialaap siunertani malillugu ineriartortinneqarnissaa tamatta soqutigisaraarput. Ilinniartitsisussaaleqinermut tunngatillugu tamatuma qaangerniarneqarnissaanut aammattaaq IMAK-ip suleqatiserineqarnissaa kaammattuutigissavarput. Nalunngilarput kommunit namminneq atorfinitsitsisinnaalersimasut, tamanna iluarisimaarparput. Kisiannili ilinniartitsisut nuttarnerujussuat aaqqiissutissarsiortariaqarpoq, tamanna kommuninut akisoqimmat aammalu meeqqanut iluaqutaanani. Ilinniartitsisut sivisunerusumik atuarfimmi suliffigisaminni uninngasinnaanerat periarfissiuunneqartariaqarpoq.

Nunatsinni illuliortiternermi aningaasalersueriaatsit soorlu realkredititut ittut illoqarfinni tamani neqeroorutigineqarsinnaanerat ammaattariaqarpoq. Sanaartornissamut pilersaarusiornermi kommunit tusaaniarneqarnerunissaat pisariaqarluinnarpoq, taakkuuppummi sanaartugassanut ukiunut arlariinnut pimoorussillutik tulleriinnilersuisarnermikkut aningaasatigut sillimareertartut, kisiannili Namminersornerullutik Oqartussaniit aningaasaleeqataassutissat malinnaatinneqannginnerisigut kommunit sanaartugassanut pilersaarusiornerat kipusoortinneqartarpoq.

Avatangiisinut isiginninnerup pitsanngoriartornera malugalugu avatangiisitta tamakkiisumik illersorneqarnissaanut suliniuteqartuarnissarput pisariaqarpoq.

Aningaasarsiaqarnermut tunngatillugu KANUKOKA-mi siornatigulli suliassamik aalajangiussaqarsimanitta nalunaarusiorfigineqarnissaa ujartorparput. Uani pineqarpoq kommunit sulisunik pitsaasunik pissarsiniarneranni ilaatigut akissarsiat aporfigineqartarnerat, assersuutigalugu inuutissarsiutinik siuarsaaniarnitsinni sulisut pikkorissut pissarsiarissagutsigit ilaatigut akissarsiatigut pitsaanerulaartumik aaqqiisariaqaraluarnitsigut aporfilerneqartarpugut. Arlaatigut aaqqiisoqarnissaa tassani aamma nalilersoqqittariaqarpoq.

KANUKOKA-mi siulersuisut nuna tamakkerlugu inatsisartuni ilaasortaasarnerata soqutigisatigut aporaaffiusinnaanera siulersuisunut eqqarsaatigeqquarput.