|
Klik her for at læse Hans Enoksens svar til borgmestrene Klik her for at læse borgmestrenes udtalelse af den 24. marts 2004 Kangerlussuaq, 26. marsi 2004 Akileraartarnermut aammalu assigiimmik akeqatitsinermut allannguutiginiarneqartut pillugit borgmesterit saaffiginnissutaannut Naalakkersuisut Siulittaasuata akissuteqaataa pillugu borgmesterit ataatsimeeqatigeereerlutik imatut oqaaseqarput: - Siullermik maluginiaqquneqarpoq kommunit ataatsimoorlutik oqaaseqaataat kisitsisinik eqqortunik tunngavilersugaammat aammalu maannamut kommunit 17-it isumaqatigalugu tapersermassuk. Maluginiaqquarput uperuaanerit "oqinaarinerunngimmata" taamaallaalli allanguinerit innuttaasunut sunniutissaannik tikkuussinerummata. -Kommunit erseqqissaatigissavaat akileraartarnikkut allannguiniarneq allatut ilusilerlugu suliarineqarnissaanut siunnersuuteqarmata kommuninut aammalu nunatta karsianut nanertuutaannginnerusumik aammalu pineqartunut iluaqutaanerususussamik. Oqilisaaviginiarneqartut tassaapput pissakinnerusut; soraarnerutissiallit, kisermaat meerallit, ilinniartut assigisaallu. Taakkua akileraarutit allanngortinnagit immikkut iliuuseqarfigineqarsinnaapput. Ilinniartut akiligassatigut akikillisaavigineqarsinnaapput soorlu meeqqerivinnut, ineqarnermut assigisaannullu toqqaannartumik taperneqarnerisigut. Utoqqaat aappariit soraarnerutisiaasa aammalu isertitaasa ilanngartuivigineqartarnerat atorunnaarsinneqarsinnaavoq aammalu soraarnerussutisiat saniatigut isertissinnaasaat annertunerusumik periarfissillugit. Kisimiittut meerallit atugarisaasigut toqqaannartumik oqilisaavigineqarsinnaapput. Taamaaliornikkut kommunit oqartussaanerat kalluarneqarani innuttaasunullu sullissinerat nikisinneqarani pitsanngorsaasoqarsinnaavoq. -Assigiimmjk akeqartitsinerup atorunnaarsinniarneqarnera isumaqataaffiginngilarput. Kommunit ujartorpaat qanoq ililluni atorunnaarsinneqarnera aningaasalersorniarneqartoq, aammalu inunnut ataasiakkaanut inooriaatsimut periarfissanullu sunniutissaat. Maannakkutummi isikkoqartillugu illoqarfinnik nunaqarfinnillu periarfissaarutsitsinermik kinguneqartussaammat. Erseqqissaatigineqassaaq aningaasat kisimik eqqartorneqarsinnaanngimmata inuilli ataasiakkaat siunissami sumi najugaqarsinnaanissaat aalajangersorneqartussaassammat. Kommunit kaammattuutigissavaat akileraartarnermut inatsisip oqaluuserineqarnissaa kinguartinneqassasoq sukumiisumik kalluaanngitsumillu siunnersuuteqartoqarnissaa siunertaralugu. Assigiimmik akeqartitsinerup atorunnaarsinniarnerata kingunissai unneqqarinnerusumik saqqummiunnissaat piumasaraarput, oqaatigineqareersutut illoqarfinnik nunaqarfinnillu inuerutsitsinermik kinguneqassammat. Illoqarfiit ataasiakkaat akikinnerusumik inuuffigineqarsinnaalernerata kingunerissavaa sinerissap sinnerani inerikkiartorsinnaanermik periarfissaarutsitsineq - suliffeqarnikkut inuuniarnikkullu. Innuttaasut paasisariaqarpaat illoqarfiit nunaqarfiillu sorliit qaqugu matuniarneqarnersut aammalu suna siunertaralugu taamaaliortoqarniarnersoq. Ataqatigiissumik, ersarissumik aammalu paasinarluartumik innuttaasut atugarisaat pillugit aalajangertoqartariaqarpoq Kommunimmi tassaammata allannguutinik annertunerpaamik nammattussat aammalu inunnut ataasiakkaanut naapitsillutillu nassuiaasussat.
Vittus Mikaelsen |
