|
8. maaji 2002
Illua’tungaani kommunit illua’tungaanilu Namminersornerullutik Oqartussat inissiaatileqatigiiffillu INI imminnut qanillattungaatsiarput kommunit aallartitaasa 2002-mi ataatsimiinneranni. Naalakkersuisunut ilaasortaq Jørgen Wæver Johansen inissiaatileqatigiiffiullu pisortaa Mogens Hansen tamarmik ilisimatitsipput inissiaatileqatigiiffiup ingerlatsinera allanngortitingaatsiarneqalersoq, taamaalilluni kommuninik paaseqatiginnittarnissaq qulakkeerneqarsinnaassalluni. Inissiaatileqatigiiffiup Namminersornerullutik Oqartussanit pigineqartup inissiaateqarnermik ingerlatsinera kommunit akornanni naammagittaalliuutigineqangaatsiartarsimavoq. Kommunit isumaqarput INI-p ingerlatseqatiginiarnera oqimaappallaartoq. Taamaattumillu kommunit aallartitaasa ataatsimiinnissaannut Narsap kommunia siunnersuuteqarpoq kommunit inissiaatissaannik pilersaarusiornermik sanatitsinermillu kommunit namminneq isumaginnittalissasut INI avaqqullugu. Borgmester Jørgen Lundip oqaatigaa kommunip inissialiortoqarnissaanik aalajangerneraniit sanaartukkat tunniunnissaata tungaanut INI akitsorsaataaginnartartoq. Aallartitalli ataatsimiinnerata naammassilernerani Jørgen Lund naammagisimaarinnilluni oqaaseqarpoq, tassa inissialiorneq eqaannerusumik naammassisaqarluarnarnerusumillu ingerlanneqarsinnaaleqqullugu allanngortiteriniartoqarmat. ”Kissaatigisatta affaat maanna naammassiniarneqalersut paasinarpoq,” Jørgen Lund oqarpoq. Ineqarnermut, Attaveqarnermut Pilersuinermullu naalakkersuisoq Jørgen Wæver Johansen aallartitat ataatsimiinneranni ilisimatitsivoq naalakkersuisut inissiaatileqatigiiffik nalunaarfigisimagaat inissiaatileqatigiiffiup sanaartornermut immikkoortortaa allanngortinneqassasoq. ”Taamalilluni siunissami taamaallaat suliarisalissavai inissiaatileqatigiiffiup suliassarpiai, tassa Namminersornerullutik Oqartussat kommunillu inissiaataannik attartortittakkanik allaffitsigut aqutsineq, ingerlatsineq aserfallatsaaliuinerlu,” Jørgen Wæver Johansen oqarpoq. Inissiaatileqatigiiffiup allaffeqarfiani pisortap Mogens Hansenip INI-mut pingaaruteqarnerarpaa kommuninik suleqateqarnerup nammineq piumassutsikkut ingerlanissaa. ”Inissiaatileqatigiiffiullu eqqortuusoraa kommunit 60/40-nik sanaartornerannut tunngasutigut inatsisit allanngortinneqarnissaat, taamaalillutik kommunit INI-p atornissaanut pituttorsimajunnaarniassammata.” Mogens Hansenip oqaatsini ima ilavai: ”Taanna oqaatigeriarlugu taasariaqarpoq Inissiaatileqatigiiffik INI kommunit sanaartugassaataannik ingerlatserusummat. Tamannali aatsaat pissaaq kommunit inissiaatileqatigiiffiup atorneqarnissaa kissaatigippassuk, pinngitsaalineqaratik. INI isumaqarpoq pituttorsimanani suleqatigiinneq illua’tungeriinnut tamanut pitsaanerpaasoq.”
Una tooruk naalakkersuisunut ilaasortap Jørgen Wæver Johansenip saqqummiussaa atuarumallugu
Una tooruk inissiaatileqatigiiffimmi pisortap Mogens Hansenip saqqummiussaa atuarumallugu
|
