|
8. maaji 2002
Jens Lars Fleischer (Siumut) ullumi kommuneqarfiit kattuffiannut Kanukoka-mut ukiuni tulliuttuni pingasuni siulittaasussatut qinigaavoq. Taasisui 20-upput, unammillertaa Agathe Fontain, Sisimiuni borgmesterip tulliata aappaa (Inuit Ataqatigiit), sisamanit taaneqartoq. Jens Lars Fleischer kattuffimmut siulittaasuugallarsimavoq 2001-imi septembarimiilli, tassa kattuffimmut aallartitat maajimi 2001-imi ataatsimiinneranni siulittaasunngortoq Hans Enoksen tunuarmat partiimut Siumumut siuliuttaasunngornini pissutigalugu. Siulittaasut nikinnerata tamatuma kingunerisaanik aamma siulersuisuni sinniisussamik ataatsimik qinersisoqarpoq. Sinniisussatut qinigaavoq Nuummi kommunalbestyrelsimut ilaasortaq Jens Lyberth (Siumut). Siulittaasumut qinigassanngortinnermini Jens Lars Fleischer Siumup Atassutillu oqaaseqartuinit taperserneqarpoq. Unammillertaa Agathe Fontain aallartitat ataatsimiinneranni suleqatigiiaat pingajuinit, tassa Inuit Ataqatigiinnit, attaviitsumit Kattusseqatigiinnullu ilaasortamit, qinigassanngortinneqarpoq. Jens Lars Fleischerip qujassuteqarnerminut atatillugu taakkartoqqippaa kommunit killeqarfitik akimorlugit suleqatigiittariaqarnerat. ”Ikioqatigiinnissarput aatsaat taama pisariaqartitsigilerparput. Kommunit kattunnissaat taanngikkaluarlugu pisariaqartinneqartoq ilumut tassaavoq kommunit suleqatigiinnerulernissaat,” Jens Lars Fleischer oqarpoq. |
