INI A/S-imit saqqummiussaq

Qujavunga inissiaatileqatigiiffiup siunissami sullitatta pitsaanerpaamik sullinneqarnissaat pillugu maannakkorpiaq pilersaarutai pillugu qaaqqusaaninni nassuiaateqarsinnaagama. Uani pivara attartortugut, Kommunit, Namminersornerullutik Oqartussat allallu suleqativut.

Aallarniut

Inissiaatileqatigiiffik INI inissiaatileqatigiiffiviunngilaq, kisiannili aqutsinermik ingerlatseqatigiiffiulluni Namminersornerullutik Oqartussat Kalaallit nunaannilu kommunit inissiaataasa attartortittagaannik aqutsisuulluni. Inissiaatileqatigiiffik attartortittakkanik inissiaateqanngilaq, taamaattumillu aqutsinermut ingerlatseqatigiiffiulluta.

Tamakku saniatigut oqaatigerusuppara INI ineqarnermut tunngasunik inatsisiliortuunngimmat, kisiannili ingerlatseqatigiiffiulluni inatsisit atuuttut nalunaarusiallu Namminersornerullutik Oqartussanit aalajangiiffigineqarsimasut malillugit aqutsisoq.

INI-p suliassaqarfii pingaarnerit

Inissiaatileqatigiiffik INI-p attartortitsinerit, ingerlatsineq aamma Kommunit Namminersornerullutik Oqartussallu inissiaataasa attartortittakkat aserfallatsaalineqarneri aqutarai, pingaarnertut suliassaqarfimmisut taamatuttaaq ingerlatseqatigiiffiup "nappataatut" taaneqarsinnaallutik.

Inissiaatileqatigiiffik ukiut arfineq-marluk sinnilaarlugit Namminersornerullutik Oqartussat Kalaallit nunaannilu kommunit amerlanerit inissiaataannik ingerlatsisimalerpoq, tammanalu aallartisarnermi ajornartorsiutinik nassataqarpoq, sulilu pissutit ilaat allanngortittariaqarput naleqqussartariaqarlutillu.

Inissiaatileqatigiiffiup iluani maannakkut annertuumik suliaqartoqarpoq ingerlatseqatigiiffiup pisariinnerusumik eqaallisaanermillu suleriaaseqalernissaa kiisalu ingerlatseqatigiiffiup suliaminut tunngatillugu annertunerusumik ammanerulernissaa anguniarlugu. Tamatumap inernerissavaa ingerlatseqatigiiffiup sullissinerata akikinnerulerneranik ingerlatanillu annertunerusunik takutitsiviulerneranik sullissinermilu pitsaasumik tunniussaqarnermik.

INI-mi suliassat suliallu

Ingerlatseqatigiiffiup maannamut katitigaanerani suliai assigiinngitsut ataatsimoortinneqartarsimapput, taamaalilluni takuneqarsinnaasarani suliat suut amigartoorutaasarsimanersut suullu amigartoorutaasunut akileeqataaffiusarsimanersut.

Tamanna ingerlatseqatigiiffiup allanngortinniarlugu suliniuteqarpoq, suliat ataasiakkaat aningaasaqarnikkut qanoq ineriartornerat takujuminarnerulersikkumallugu.
Ingerlatseqatigiiffik marlunnut immikkoortinneqassaaq, ineqarnermut tunngasunik ingerlatsivimmut sanaartornermut tunngasunik suliaqartussanut. Tamakku saniatigut suliassat allat aammalu suliassaapput.

Siunissami suliffeqarfiup naatsorsuutaanik immikkuualuttunik inissiaatileqatigiiffiup suliaanut ataasiakkaanut tunngasunut suliaqartoqassaaq.
Inissianik ingerlatsineq namminermi "iluanaarutaanngilaq", ima oqaatigalugu ingerlatseqatigiiffik inissianik ingerlatsinermini iluanaaruteqassanngilaq, kisiannili suliaq aningaasatigut imminut napatissaaq. Allaffissornikkut aqutsinermi akiliutit akiligassiissutigineqartartut inissianik ingerlatsinermut attuumassuteqartunut aningaasartuutinut naapertuutissapput. Illuatungaatigulli ingerlatseqatigiiffiup suliaani allani assersuutigalugu sanaartornermut immikkoortortaqarfik, utaqqiisaasumik najugaqarfiit (vakant områder), pequttanik nutserinerit il.il. sinneqartoorfiussapput inissianik ingerlatsinermut iluaqutaasussamik, allaffissornermilu akiliutinut apparsaataassallutik taamaalillunilu ineqarnermi akiliut appartinneqarluni.

Allaffissornermut akilliut m2-imut 67,50 kr.-inut aalajangersaavigineqarsimagaluartoq, tamanna appartinneqarpoq taamaalilluni allaffissornermut akiliut 2002-mi m2-imut 63,00 kr.-inut appartinneqarluni.
INI-p anguniarpaa allaffissornikkut akiliutip annertussusaata malunnaatilimmik appartinneqarnissaa, attartortunut iluaqutaasussamik.

Akinut quppersagaq

Inissiaatileqatigiiffik akinut quppersakkamik inissianik ingerlatsinermut sulianut tunngatillugu suliaqarpoq. Akinut quppersagaq sullissinivinnut tapiissutitullu sullissinernut arlalinnut immikkoortiterneqarsimavoq.
Sullissinivik ataatsimoortuuvoq inissiamillu attartortitsinissamut tunngaviulluni.
Tapiissutitut sullissinerit sullissinerupput qinerneqarsinnaasut, piginnittullu aalajangersinnaavaat sullissinerit immikkoortortaqarfiup attartortulluunniit ataasiakkaat akiligassarineraat.

Akinut quppersagaq akit atuuttut tunngavigalugit aaqqiivigineqartuassaaq inuuniarnermi aningaasartuutit allannguuteqarneri aallaavigalugit, aammalu ineqarnermi inatsisiliat allannguuteqartinneqartarneri najoqqutaralugit. Akinut quppersagaq ukiumoortumik aaqqiivigineqartassaaq.

Inissiaatileqatigiiffiup siunertaraa akinut quppersagaq 2002-p ingerlanerani kommunenut INI-mit sullinneqartunut saqqummiunnissaa, kommunenillu oqaloqatigineqassallutik.

Akinut quppersagaq maannakkut Namminersornerullutik Oqartussanut, KANOKUKA-mut kommunenullu allanut ataasiakkaanut saqqummiunneqareerpoq.

Akinut quppersagaq aqqutigalugu INI-p kissaatigaa sullissinerit ataasiakkaat qanoq akeqarnerinik takutitsissalluni, ilutigalugulu sullitatsinnut Kommunenut Namminersornerullutillu Oqartussanut suliat qanoq akeqarnersut takutikkumallugit.
INI-p kissaatigaa siunissami pissutit pillugit ammanerusumik periuseqarnissaq, maannakkutut ingerlaaseq, tassa suliavut pillugit matoqqasorujussuarmik ingerlasimaneq qimallugu.

Missingersuutit naatsorsuutillu

INI konto-lersueriaatsiminik allannguiniarluni aallarteruttorpoq, taamaalilluni najugaqarfiit piginnittullu ajornannginnerusumik missingersuutit naatsorsuutillu atuarsinnaaniassammatigit. Siunissami konto-lersueriaaseq qallunaat nunaanni "tamanut iluaqutaasumik inissiaatileqatigiiffiit" sananeqaataat malillugu ingerlatsisoqassaaq.
Tamanna Kalaallit nunaanni inatsisit qallunaat inatsisaannut qanittuunerannut peqquteqarpoq.

Siunissami missingersuusiat ukiunut aqqaneq marlunnut aserfallatsaaliinermut suliassanut missingersuutinik imaqassaaq, tassanilu najugaqarfinni siulersuisut aserfallatsaaliinernut sunniuteqarsinnaassapput. Tamanna pisinnaavoq immikkoortortaqarfiit ataasiakkaat aningaasaqarnikkut qanoq inissisimanerat apeqqutaatillugu.

INI-p ilungersuutigaa najugaqarfinni missingersuutit naatsorsuutillu pillugit ingerlatseqatigiiffiup tusagassiisarnerata allannguuteqangaatsiarnissaa. Siunissami inissianik piginnittut, Kalaallit nunaanni kommunet Namminersornerullutillu Oqartussat najugaqarfiit ataasiakkaat qanoq ingerlanerinik ilisimatinneqartalissapput. Taamatuttaaq piginnittut missingersuutinik nassitsivigineqartalissallutik.

Ingerlatseqatigiiffiup anguniagaraa kvartal-ikkaartumik aningaasaqarnikkut qanoq inissisimaneq pillugu ingerlatseqatigiiffiup inissianik piginnittut nassitsivigisarnissaat, taamatuttaaq piginnittut ukiumut naatsorsuutit inernerinik kukkunersiukkat nassitsivigineqartalernissaat.

Periutsit tamakku nutaat atuutilersinneqarnissaat naatsorsuutigineqarpoq kingusinnerpaamik missingersuusiorfiusumi 2003-mi pissasut.

Sanaartornermut immikkoortortaqarfik

INI-mut pingaaruteqarpoq Kommunenik suleqateqarnerup nammineq piumassuseq aqqutigalugu ingerlanissaa, inissiaatileqatigiiffiullu eqqortuusoraa inatsisiliorneq kommunet 60/40-nik sanaartornerannut tunngasup allanngortinneqarnissaa, taamaalilluni kommunet INI-p atornissaanut pituttorsimajunnaarniassammata.

Taanna oqaatigeriarlugu taasariaqarpoq Inissiaatileqatigiiffik INI Kommunet sanaartugassaataannik ingerlatsinissaq kissaatigimmagu, kisianni tamanna pissaaq Kommunet inissiaatileqatigiiffiup atorneqarnissaa kissaatigimmassut pinngitsaalineqartutut misigisimanatik.
INI-p paasinnittaaseraa pituttorsimanani suleqatigiinneq illuatungeriinnut tamanut pitsaanerpaasoq.

Taamaattumik Inissiaatileqatigiiffik INI-p suliniutit nutaat takkuttussat tikilluaqquvai, piareersimallunilu suliffeqarfiup siunissami suliassat annertussusaannut naleqqussarnissaannut.

Inissianik attartortittakkanik aserfallatsaaliineq

Kalaallit nunaanni Kommunet suleqatigalugit 2000-imi pisortat inissiaataat attartortittakkat pigisaat tamarmik illup qanoq inneranik nalunaarsuiffigineqarnikuupput.

Tamassumap kinguneraa 2001-imi Kalaallit nunaanni tamarmi najugaqarfinni tamani nutarterinissamut pilersaarummik sanasoqarmat, aammalu najugaqarfiit aningaasaataat uninngatikkallarneqarsimasut atorlugit aserfallatsaaliinermik ingerlatsisoqarluni.

Tamanna 2002-imi ingerlateqqinneqarpoq, maannakkut aserfallatsaaliinermik ingerlatsisoqarluni imaluunniit aallartinissartoqarluni najugaqarfiit aningaasaataat toqqortatut uninngatikkallarneqarsimasut katillugit 28 million kr.-nit atorlugit.

2003-imi qanoq atuisoqartigissanersoq suli aalajangerneqanngilaq, najugaqarfiit missingersuutaat suliarineqarlutik aatsaat aallartimmata.

Siunissami najugaqarfinni ataasiakkaani aserfallatsaaliinermut suliat killiliiffigineqassanngillat, taamaattorli najugaqarfiit ataasiakkaat aningaasatigut qanoq inissisimanerat naapertorlugu aserfallatsaaliinermik ingerlatsisoqassaaq.

Nunap immikkoortuinut agguataarineq

Ullumi makkunani inissiaatileqatigiiffik Kalaallit nunaanni nunap immikkoortuinut agguataarinermik ingerlataqarpoq, taamaalilluni nunap immikkoortuini allaffinnik pilersitsisoqassaaq, taakkulu ataanni sullissinermut allaffeqassalluni.

Nunap immikkoortuini allaffeqalernikkut INI-p kissaatigaa allaffissornikkut nalinginnaasumik suliassat qitiusumik aqutsisoqarfimmit suliarineqartalernissaat, aammalu ilanngullugu toqqaannartumik sullissinermi qitiusumik ingerlatsivinnut nunap immikkoortuini qitiusumik ingerlatsivinnut attuumassuteqartunut akisussaasuunissaat anguniarlugu.

Nunap immikkoortuini aqutsisoqarfiup sullissinermi qitiusumik aqutsiviit pisariaqartitsinerat naapertorlugu ikiuuttassapput, assersuutigalugu sulisut soraarneranni, napparsimanermi assigisaannillu.
Nunap immikkoortuini aqutsisoqarfiit akisussaaffigissavaat kommunet atitunerusumik suleqatiginissaat kommunenullu inissiaatileqatigiiffiup suliai aallartinneqareersut pillugit annertunerusumik ataavartumillu ilisimatitsisarnissaq.

Taamatuttaaq nunap immikkoortuini aqutsisoqarfiit suliassaraat kommunet isumasiortarnissaat suliassat nutaat allallu pillugit.

Sullissinermi allaffiit suliassaat sullitanut samminnerujussuusussaapput, attartortut kommunellu eqqarsaatigalugit. Sullissinermi allaffiit allaffissornikkut suliassanik assigiiaartunik suliaarutsinneqassapput, sullitallu pingaarnerutillugit sullinneqalissallutik.

Tamatuma attartortunut kommunenullu pitsaasumik kinguneqarnissaa naatsorsuutigineqarpoq.

Inissiaatileqatigiiffiup naatsorsuutigaa nunap immikkoortui 01. september 2002-mi inissinnissaat, ullumikkullu nunap immikkoortuisa ilaat ataaseq inissinneqareerluni.

Ilinniartut ilinniartitaanerat

Inissiaatileqatigiiffiup inissiaateqarnermut ingerlatsinermut siunertaqartumik ilinniartitsisalernissaq aallartisarpaa. Ingerlatseqatigiiffiup neriuutigaa taamaaliornikkut ingerlatseqatigiiffiup iluani pisortassanik ineriartortitsisinnaassalluni.
Tamanna siunissami ingerlatseqatigiiffiup aalaakkaasumik ingerlaqqeriarnissaanut pingaaruteqarpoq.

Nutaarsiassat

Inissiaatileqatigiiffik 2001-ip naalerneraniit Kommunenut Namminersornerullutik Oqartussanut nutaarsiassaqartitsivinnullu ingerlatseqatigiiffimmi qanoq ingerlasoqarneranik paasissutissanik nassitsisarpoq.
Inissiaatileqatigiiffiup isumagaa nutaarsiassat aqqutigalugit aqqutillu allat aqqutigalugit sullitanut tusagassiisarnerup annertunerulernissaa.

Naggasiut

INI annertunerusumik Kommunenillu oqaloqateqartarnerup pitsanngorsarneqarnissaa anguniarlugu suliniuteqarluni aallartippoq, tamannalu inissiani pisortat pigisaanni attartortittakkani attartortunut iluaqutaassaaq.

Qujanarsuaq

Mogens Hansen
Allaffissornermi pisortaq