|
KANUKOKA-mut aallartitat maani Nuummi - nunatsinni illoqarfiit pingaarnersaanni nuannersumi - ataatsimiinnissaannut aammaarlunga tikilluaqquseqqissinnaagama nuannaarutigaara. Neriuppunga soqutiginarluartumik ataatsimiikkumaarluta, illoqarfimmilu maani periarfissat pitsaasut atorluarumaarisi. Nuuk Kalaallit Nunaanni illoqarfiit inerisaaffiusut pingaarnersaattut isigaarput, neriuppugullu, sinerissamit aallartitarpassuit illoqarfitsinni isumassarsiorluarumaartut. Siullermeerlutik aallartitat ataatsimiinnerannut aatsaat peqataasut immaqalu Nuummik ilisarisimannilluanngitsut eqqarsaatigalugit oqaatigisinnaavara, kommunimi innuttaasut 15.000-it pallimmatigit, aammalu Nuup saniatigut marlunnik nunaqarfeqaratta.
Kalaallit Nunaanni timersornikkut aaqqissuussinerit annertunersaat - Arctic Winter Games - Nuummi naammasseqqammerparput. Ingerlaqqissaagulli tullissaanillu pisussaq annertooq piareersarlugu allartereerparput - tassalu illoqarfitta aappaagu ukiunik 275-iliilluni nalliuttorsiornissaa. Taamanikkussamut susoqassanersoq piffissami aggersumi tusarumaarparsi.
Oqareernittut neriuppunga tamassi illoqarfitsinniinnersi nuannariumaarissi. Nuummut tikilluaritsi. |
