Oqaluuserisassani imm. 8: Oqaluuserisassatut siunnersuutit

Kommunit isumaat A/S Inissiaatileqatigiiffik INI-p siunissami inissisimanissaa pillugu

 

Aallaqqaasiut.

Narsap Kommuniata siunnersuutigaa A/S Inissiaatileqatigiiffiup INI-p siunissami inissisimanissaa pillugu apeqqutip oqaluuserineqarnissaa. Kommuni isumaqarpoq ineqarnermut tunngasut iluanni oqartussaaffiit tamarmik kommuninut nuunneqartariaqartut.

Siulersuisut suleriaqqinnissaannut atugassamik kissaatiginartinneqarpoq aallartitat ataatsimiittut oqaaseqarfigissagaat Inissiaatileqatigiiffik inissianik aqutsisutut sanaartugassanillu suliarinnittutut, matuma ataani kommunit inissialiortiternerini atorneqaannassanersoq.

 

Inissiaatileqatigiiffiup massakkut inissisimanera.

A/S Inissiaatileqatigiiffik INI massakkumut kommunit inissiaataannik amerlanerpaanik aqutsisuutinneqarpoq, taamatullu sanaartugassanik ingerlatseqatigiiffik aamma isumaginnitsinneqarluni. Tamatuma saniatigut Inissiaatileqatigiiffiup Namminersornerullutik Oqartussat sinnerlugit sanaartugassat isumagisarpai.

Ataatsimut isigalugu kommunit A/S Inissiaatileqatigiiffik INI-p inissianik aqutsineranik naammaginninngimmata, matuma ataani aammattaaq aserfallatsaaliinnginnerit kiisalu akiitsorpassuit inissiaatileqatigiiffiup ataani immikkoortortani ataasiakkaani amerliartuinnartut naammaginngimmatigik kommunit ukua aqutsinissamik A/S Inissiaatileqatigiiffik INI-mut isumaqatigiissutertik atorunnaarsinnialerpaat: Nuup Kommunia, Qeqertarsuup Kommunia, Ammassalip Kommunia aamma Ittoqqortoormiit Kommunia.

Kommunit INI-llu isumaqatigiissutaannut tunngaviuvoq aqutsinissamut atsioqatigiiffigalugu nalinginnaasumik isumaqatigiissutigineqartartoq, taannalu 1995-imi Kattuffiup aamma A/S Inissiaatileqatigiiffiup INI-p akornanni isumaqatigiissutigineqarsimavoq. Inissiaatileqatigiiffik massakkut nutaamik isumaqatigiissusiorniarsarivoq taamaalilluni siunissami kommuninik sullissineq eqaannerulersinniarlugu aammalu ineqarfiit immikkoortortaqarfiinut aqutsinermik akissarsiarisartagassat akiligassavinnuinnaq qapiarneqasimasussanngorlugit. Siunissami Inissiaatileqatigiiffiup sullississutigisartagassai tunngaviusumik sullissinernut kiisalu nammineq toqqartorlugit tapiliullugit sullississutinut avinneqartalersussaassapput.

Massakkut Nuuk Qeqertarsuarlu A/S Inissiaatileqatigiiffimmut INI-mut suleqatigiinnerup nutaanik atugassaqartitsilluni ingerlaannarnissaa pillugu isumaqatigiinniuteqarput.

Kattuffiup Inissiaatileqatigiiffimmut oqaatigaa pitsaassanngitsoq kommuninik kiffartuussineq assigiinngitsumik ingerlanneqalissappat.

Kattuffiup ukiuni arlalinni sulissutigisimavaa kommunit namminneerlutik 60/40-mik sanaartornernik aqutsisinnaalertariaqartut, soorlu aamma kommunit nammineerlutik soorlu isumaginninnermi sullissivinnik sanaartorneq ingerlatarisaraat. Sivisuumik noqqoruussutigineqartariarluni akuersissutigineqarpoq Aasiaat Sisimiullu kommuniisa misiligutaasumik inissialianut aalajangersimasunut sananermi aqutsisuunissaat. Naalakkersuisut pisinnatitsissumminni oqaatigaat pisinnaatitsissutinik allanik tunniusseqqittoqarnavianngitsoq misiligutigalugit suliniutit naliliivigineqarsimanerat pissarsiarineqarsimatinnagu.

Nammineerlutik illuliaasartunut ilitsersuisuuneq A/S Inissiaatileqatigiiffik INI-mit 1995-imit ingerlanneqarsimasoq Ineqarnermut Attaveqaatinullu Pisortaqarfimmit kommuninut nuunneqaqqinnissaa isumaliutersuutigineqarpoq. Inissiaatileqatigiiffiup naatsorsuusiaani kingullermi takuneqarsinnaavoq illut akuersissutigineqarsimasut piffissami 1995 – 2000-imi 40 %-ii atorneqalersimanngitsut, tassalu taakkua sananeqarnerinut Inissiaatileqatigiiffik ilitsersuisuusussaasimagaluarluni. Piffissami 1990 – 1994-imi kommunit suliassamik isumaginnittuugallarmata taamaallaat 8 %-it atorneqalersimanngillat. Inatsisartut aningaasanut inatsisaat malillugu nammineerluni illuliamut ataatsimut ilitsersuisarnissamut 36.000 kr.-it missingersuutigineqarsimapput.

Inissiaatileqatigiiffiup siunissami inissisimanissaa

Soorlu siuliani ersertoq Inissiaatileqatigiiffiup inissisimanini nalilersuiffigeqqinniarsaraa, tassa kommuninut suleqateqarnerminik nutaamik ilusiliiniarsaraluni. Tamanna tunngavigalugu aammalu kommunit inissiaatileqatigiiffimmik annertuumik naammaginninnginnertik oqaatigisarsimammassuk siulersuisut pingaartippaat aallartitat inissiaatileqatigiiffiup siunissami inissisimanissaa pillugu isumaat oqaatiginiagaallu tusassallugit. Siulersuisut siunnersuutigissavaat oqallinneq tamarmiulluni partiinut agguataarani ingerlanneqassasoq.

Siulersuisut kissaatiginartippaat tusassallugit

• Kommunit namminiivillutik sanaartukkanik ataatsimoortumik aningaasalersukkanik sanaartornermut aqutsisuusalissanersut, matuma ataani nammineerlutik aalajangersinnaasassallugu sanaartugassani toqqartuni nammineq ingerlatsivitsik, Inissiaatileqatigiiffik imaluunniit avataaneersoq alla sanaartornermut aqutsisuusartoq atorusunnerlugu.

• Kattuffiup sulissutigissaneraa kommunit nammineerluni illulianut ilitsersuisuusarnermik tiguseqqinnissaat, matuma ataani kommunit aammattaaq inissiaatileqatigiiffimmik imaluunniit avataaneersumik allamik suliassamik ingerlatsisinnaasumik atuinissaminnik aalajangiisarnissaat.

• Kattuffiup sunniuteqarfiginiassaneraa/piumasaqaatigissaneraa kommunit tamakkerlutik inissiaatimik inissiaatileqatigiiffimmit aqunneqarnissaanni tunngaviusutigut assigiimmik atugassaqartitaanissamik neqeroorfigineqartarnissaat.

Oqariartuutigineqartut tunngavigalugit suliassamut tassunga Kattuffiup politikkissaa siulersuisut ilusiliiviginiarsariumaarpaat.