|
Tamassi tikilluaritsi. Nuannaarutigaara ukioq manna aallartitat ataatsimiinnissaat maani nunatta kulturikkut illorsuani Katuami pisinnaammat. Neriuppunga maani kusanartunik avatangiiseqarluta ataatsimiinnissarput pissarsiffiulluarumaartoq. Nuup kommunia siulersuisuniit saaffigisimavarput ataatsimiinnerup ammarneqarnissaanut kulturikkut misigisassaqarnissatsinnik isumaginnilaaqqullugu. Borgmesterillu qujanartumik saaffiginnissuterput akuersaarluarpaa. Naalakkersuisut siulittaasuat Jonathan Motzfeldt pisarnitsitut qaaqquarput, Canadamulli angalanini pissutigalugu tullersortini, aningaasaqarnermut naalakkersuisoq Augusta Salling, aggersippaa. Augusta tikilluarit! Inissiaatileqatigiiffik INI-mut tunngasut oqaluuserinissaanni ineqarnermut naalakkersuisoq Jørgen Wæver Johansen qaaqquarput. Jørgen tikilluarit! Aammattaaq Inissiaatileqatigiiffimmi allaffimmi pisortaq Mogens Hansen saqqummiisussatut ilaasoq tikilluaqquara. Minnerunngitsumik taaseqataasinnaallutik aallartitaasut kiisalu sinniisussatut najuuttut aammalu Pituffimmi borgerrådimiit malinnaatitatut ilaasut tikilluaqqorusuppakka. Taamatuttaaq tikilluaqquniarpakka suleqatigisartakkavut nunatsinnit Danmarkimillu aggersarsimasavut. Danmarkimi kommunit Kattuffiannit, Kommunit Sillimmaseeqatigiiffiannit kiisalu Kommunit kukkunersiuisoqarfiannit aallartitat tikilluaqquakka. Naalagaaffiuttaaq sinniisua qamannga pisumik tikilluaqquara. Qujanaq aalajaallusiaasiit takkukkassi! Kommuninit alaatsinaakkiartortitat, borgmesterit kommunillu pisortaat, tusagassiortut inimilu maaniittut tamaasa tikilluaqquakka. Siulersuisuni ilaasortaq Jens Inûsugtoq ajoraluartumik ilaquttamini alianartumik pisoqarnera pissutigalugu ataatsimiinnermi maani najuussinnaajunnaarsimavoq. Sinnii-sussaa Siverth Heilmann tamanna pissutigalugu siulersuisuni ilaasortatut inissikkallarpoq. Taamatuttaaq Enok Sandgreen peqqiilliuuteqarnini pissutigalugu ilaasinnaajunnaarmat Ane Hansen sinniisussatut siulersuisuni inissikkallarpoq. Tikilluaqqusillunga oqaasissakka naatsuinnaassapput, tassa oqaluuserisassat ataasiakkaat oqaluuserineqarneranni oqaaseqarnissannut periarfissaqaqqittartussaassagama. Neriuutigaara ajunngitsumik pissarsiaqarluartutalu ataatsimiissasugut. Ataatsimiinnermut atortussat piffissaalluarallartillugu siusinaartumik tamassinnut nassiussuunneqarsimapput. Neriuutigaara naatsorsuutigalugulu aallartitat tamakkerlutik piareersarnissartik periarfissaqarfigilluarsimassagaat. Oqaluuserisassat immikkoortuannut tulliuttumut – tassa ataatsimiinnermik aqutsisussamik qinersinissamut – nuutsinnata siunnersuutigissavara kommunip tikeraartitsisutta borgmesteria Agnethe Davidsen tikilluaqqusinissaminut periarfissinneqassasoq. Agnethe oqalugiareerpat naalakkersuisunut ilaasortap Augusta Sallingip oqaaseqalaarnissaa tulliutissaaq. Aggersimasut tamaasa qamannga pisumik tikilluaqqoqqippakka, maannalu borgmester Agnethe Davidsen oqaaseqassaaq, takanna! |
