Ukiup Kommunianik toqqaasarneq ingerlaannassava?

Ukiuni 1993-imiit 2000-imut ”Ukiup Kommunia”-nik toqqaasoqartarsimavoq kommuneqarfiit kattuffiannut aallartitat ukiumoortumik ataatsimiinnerisa nalaanni. Qulequttat toqqaanissamut tunngaviusut ukiumiit ukiumut allanngorarput, tamarmilli suliniutinut pisariaqartunut immikkullu soqutiginaatilinnut kommunini innuttaaqatigiinnit aallaaveqartunut inuiaqatigiinnilu ineriartornermut sunniuteqartunut tunngassuteqarlutik. Toqqaanermi tunngavigineqartarsimasut ilaatigut tassaapput ”Kommune suliffissaaleqinermik millisaasimavoq immikkut ittunik periaaseqarluni nutaamillu eqqarsarluni” aamma ”Kommune meeqqat inuusuttullu ulluunerani paaqqinnittarfinni atuarfinnilu, aammalumi ilinniarnerminni, pitsaasunik atugassaqarnissaannik suliniuteqarluartoq”.

2001-imi qulequtaavoq ”Kommune avatangiisinut tunngasutigut kommunillu illuutaanik aserfallatsaaliuinikkut immikkut ittumik iliuuseqarniarsimasoq.” Toqqaasartoqatigiilli inassuteqarneratigut toqqaasoqanngiinnarnissaa aalajangerneqarpoq, tassami qinnuteqaatit ikittuinnaat tunngavigalugit isummermata avatangiisinut aserfallatsaaliuinerullu tungaatigut immikkut ittumik iliuuseqartoqarsimanngitsoq. Siunniunneqarporlu qulequtaq taanna 2002-mi Ukiup Kommunianik toqqaanissami atorneqassasoq.

Kisiannili 2002-mi qinnuteqaatit marluinnaapput, tamannalu naammanngivippoq kommunit 18-iusut akornanni toqqaaniassagaanni. Taamaattumillu ajuusaarutigalugu oqaatigisariaqarpoq aamma 2002-mi ”Ukiup Kommunia”-nik toqqaanissaq taamaatiinnartariaqartoq. Avatangiisinut aserfallatsaaliuinermullu tunngasutigut suliniutit toqqaanissamut tunngavigissallugit ajornakusoorpallaarunarput.

Maanna isumaliutaasussanngorpoq 2003-mi toqqaanissamut suna alla qulequtaassanersoq.

”Ukiup Kommuniatut”
toqqagaasimasut

1993-imi toqqaasoqaqqaarneraniit ukiut ingerlanerini ”Ukiup Kommunia”-tut toqqagaasarsimasut

1993: Ilulissat
Pissutaasoq: Kommunip aningaasatigut ingerlanerliornini immikkut iliuuseqartarluni iluarsisimammagu.

1994: Qaanaaq
Pissutaasoq: Kommune suliffissaaleqinermik millisaasimavoq immikkut ittunik periaaseqarluni nutaamillu eqqarsarluni.

1995: Sisimiut
Pissutaasoq: Kommune ilaatigut inuussutissarsiutinik ingerlatalinnut attaveqarluarniartuuvoq, tamannalu suliffissanik nutaanik pilersitsinernik kinguneqarpoq.

1996: Aasiaat
Pissutaasoq: Inuusuttut pillugit taakkulu suleqatigalugit suliniuterpassuartigut kommuni inuusuttut akornanni ajornartorsiutaasunik iluarsiiniarpoq.

1997: Ammassalik
Pissutaasoq: Ukiumi qaangiuttumi kommuni pilersitsisimavoq suliffissanik ataavartunik imminnullu akilersinnaasunik pilersitsiniarnermi sinaakkutissanik pitsassuarnik.

1998: Qaqortoq
Pissutaasoq: Innuttaasut qanittumik suleqatigalugit kommuni periarfissiilluarniarpoq innuttaasut inooqatigiinnikkut isumaqarluartunik sammisassaqarnissaannut.

1999: Nuuk
Pissutaasoq: Meeqqat inuusuttullu ulluunerani paaqqinnittarfinni atuarfinnilu, aammalumi ilinniarnerminni, pitsaasunik atugassaqarnissaannik kommune suliniuteqarluarpoq.

2000: Maniitsoq
Pissutaasoq: Kommunimi sulisut ilinniaqqittarnissaat sulisutullu ingerlaqqiffissaqarnissaat pillugu kommuni suliniuteqarluarpoq.

2001: Toqqaasoqanngilaq
Pissutaasoq: Toqqaasartoqatigiit isumaat naapertorlugu toqqaanissamut tunngaviusoq una immikkut iliuuseqarfigineqarsimanngilaq: ”Kommune avatangiisinut tunngasutigut kommunillu illuutaanik aserfallatsaaliuinikkut immikkut ittumik iliuuseqarniarsimasoq”.

2002: Toqqaasoqannginnissaa inassutigineqarpoq
Pissutaasoq: Qinnuteqartukippallaarnera.