|
Kattuffiup maleruagassiaani § 4-mut allannguutissaq
Siulersuisut siunnersuutigaat piffissaq ataatsimiiffiusoq, sumi qaqugulu aallartitat ataatsimiinnissaata qanoq siusitsigisumik nalunaarutigineqartarnissaa, ilaasortat oqaluuserisassatut siunnersuutaasa qanoq siusitsigisumik nassiunneqartarnissaat kiisalu oqaluuserisassat atortussallu tamatumunnga tunngasut qanoq siusitsigisumik nassiunneqartarnissaat pillugit aalajangersakkat ima allanngortinneqassasut:
Ӥ 4.
Aallartitatut ataatsimiittartut
Imm. 1.
Kattuffimmi qullerpaatut pisortaapput aallartitatut katersuuttartut.
Imm. 2.
Ileqquusumik aallartitatut ataatsimiinneq ukiumut ataasiarluni maajimi pisassaaq. Qaqugu sumilu ataatsimiinnissaq siulersuisunit aalajangerneqassaaq. Ukiumi kommunimut qinersiviusumi aallartitat ataatsimiinnerat pissaaq qinersereernermi, kingusinnerpaamillu qinersineq qaammatinik pingasunik kingoqqullugu, tak. § 6 imm. 1.
Siulersuisut aallartitat ataatsimiinnissaat kingusinnerpaamik qaammatinik sisamanik sioqqullugu kommunit ilaasortaasut nalunaarfigissavaat ataatsimiinnerup qaqugu sumilu pinissaanik.
Imm. 3.
Kommunit ilaasortaasut aallartitat ataatsimiinnissaanni oqaluuserisassatut siunnersuutaat siulersuisunit tiguneqareersimassapput ataatsimiinnissaq kingusinnerpaamik qaammatinik pingasunik sioqqullugu.
Siunnersuutit tunngavilersugaassapput imaqassallutillu aalajangiinissamut siunnersuummik imaluunniit qanoq suliarinninnissamut.
Imm. 4.
Siulersuisut namminneq siunnersuutitik aamma siunnersuutit tigusat tunngavigalugit aallartitat ataatsimiinneranni oqaluuserisassatut siunnersuusiussapput.
Oqaluuserisassatut siunnersuutit siulersuisunit allaffeqarfikkoortumik akisassanngortinneqarsinnaapput.
Imm. 5.
Aallartitat ataatsimiinneranni oqaluuserisassat allaganngorlugit siulersuisunit kommuninut ilaasortaasunut nassiunneqassapput kingusinnerpaamik ataatsimiinnissaq qaammammik ataatsimik sioqqullugu.
Imm. 6.
Aallartitatut katersuuttartut ataatsimiinnermi aqutsisoq (dirigent) namminneerlutik qinissavaat.
Imm. 7.
Ileqquusumik aallartitat ataatsimiinneri tamanut ammasuupput, aallartitatut katersuuttartut ataatsimiinnermut tamarmut imaluunniit oqaluuserisassani immikkoortunut ataasiakkaanut allatut aalajangiinngippata nalinginnaasumik amerlanerussuteqarnikkut.
Imm. 8.
Aallartitat ataatsimiinneranni aallartitaasut siulersuisunilu ilaasortat siunnersuuteqarsinnaatitaapput, oqalussinnaatitaapput taaseqataasinnaatitaallutillu. Kattuffiup siulittaasuata ataatsimiinnermik aqutsisoq siunerseqatigalugu aalajangersinnaavaa ataatsimiinnermi allanik oqalussinnaatitsinissaq.”
| 
