Asseq toqqaanermit pisoq takorusukkukku una tooruk

Kommuneqarfik Upernavik inuutissarsiutinik suliffissanillu pilersitsiniarnermi arlalippassuartigut tapersersuiuiarsimavoq, naak nunatsinni avinngarusimasumi inissisimagaluarluni aningaasatigullu atugassarititaasut killeqaraluaqisut eqeersimaarluni nunaqarfippassuanilu aamma eqqarsaatigalugit kommunip ajunngitsumik patajaatsumillu ineriartornissaa suleqataaffigilluarsimallugu.

Upernaviup 2003-mi "Ukiup kommunia"-tut toqqarneqarnera ilaatigut taama tunngavilersorneqarpoq. Kommuneqarfiit kattuffiata Kanukokami aallartitat ukiumoortumik ataatsimiinnerat naggaserlugu toqqaaneq tamanna kattuffiup siulittaasuata Jens Lars Fleischerip tusarliuppaa, allagartarlu tamatumunnga uppernarsaataasoq kommunip borgmesterianut Jens Immanuelsenimut tunniullugu.

Ukiup kommunianik toqqaasut tassaapput naliliisoqatigiit kattuffinnit KNAPK-mit, SIK-mit Grønlands Arbejdsgiverforeningimillu kiisalu Sulisa A/S-imit Inuutissarsiornermullu Pisortaqarfimmit peqataaffigineqartut.

Toqqaanermi tamatumuuna kommunit inuutissarsiutitigut qanoq ingerlatsiniarnerat naliliisuuvoq. Naliliinermi tunngaviupput:

• Kommunip iliuuserisimasai inuutissarsiutinik/suliffeqarfinnik aallartitsiniartunut sinaakkusersuutinik, soorlu kommunip pilersaarusiornerani taassumalu ataani inuutissarsiornermut pilersaarummi
• Kommunip inuutissarsiutit tungaasigut siunnersuisoqarnikkut aaqqissugaanera
• Inuutissarsiutinik pilersitsiniarnermi aningaasaliisarnikkut soorlu aningaasanik qularnaveeqqusiinikkut, ingerlatseqatigiiffinnut aningaasaliinikkut imaluunniit aallartitsinianut aningaasatigut tapiissuteqarnikkut atorneqarsimasut annertussusiat inuttussuseq tunngavigalugu
• Kommune imminut neqeroorutiginermigut nunami suliffeqarfinnik assigiinngitsunik aallartitsivigineqarusulluni siumut isigaluni ilisaritinnermigut suliniuteqarluarsimasoq.

"Kommunitsialammik" toqqaanermi periaaseq nutaaq malillugu toqqaanissat tamaasa naliliisartoqatigiinnik pilersitsisoqartassaaq toqqaanermi suna tunngaviussanersoq apeqqutaatillugu.