|
Maleruaqqusat atuuttut takukkit una toorlugu
Siulersuisut.
§ 6.
Imm. 1.
Siulersuisut siulittaasoq ilanngullugu ilaasortat tallimaapput aallartitat ileqquusumik ataatsimiinneranni, kommunalbestyrelsimut qinersinerup kingorna kingusinnerpaamik qaammatit pingasut qaangiunneranni pisumi qinerneqartut.
Imm. 2.
Siulittaasoq aallartitat taasisinnaatitaasut innersuussineratigut amerlanernit taaguunneqarluni qinigaassaaq. Siulittaasussamik qinersinermut kommunalbestyrelsini ilaasortat innersuussutaasinnaapput.
Siulittaasoq Inatsisartuni, Naalakkersuisuni Folketingimiluunniit ilaasortaasinnaanngilaq. Siulittaasoq qinigaaffimmi iluani Inatsisartuni, Naalakkersuisuni Folketingimiluunniit ilaasortanngorpat imm. 8-mi aalajangersarneqartutut iliortoqassaaq.
Siulersuisuini ilaasortat sinneri sisamaasut qinerneqassapput partiit ataasiakkaat kommunit ilaasortaasut siulersuisuini sinniisigisaasa katillutik amerlassusiat tunngavigalugu (d’Hondt-ip periaasia). Naatsorsuinermi inissaq siulleq partiit ilaata inuttalersinnaasaa siulittaasumit inuttalerneqartutut isigineqassaaq taanna naalakkersuinikkut suleqatigiinnit taakkunanngaanneersuuppat.
Siulersuisuni ilaasortat Inatsisartuni, Naalakkersuisuni Folketingimiluunniit ilaasortaasinnaanngillat. Siulersuisuni ilaasortaq qinigaaffimmi iluani Inatsisartuni, Naalakkersuisuni Folketingimiluunniit ilaasortanngorpat imm. 9-mi aalajangersarneqartutut iliortoqassaaq.
Imm. 4.
Tamanna peqatigalugu taamatut periaaseqarluni siulersuisuni ilaasortat aammalu siulittaasup siulersuisuni ilaasortatut namminneq sinniisissaanik qinersisoqassaaq.
Imm. 5.
Kommunini ilaasortaasuni kommunalbestyrelsini ilaasortat kisimik siulersuisuni ilaasortatut sinniisissaattullu qinigaasinnaapput.
Kommunip aallartitaa siulersuisunut qinigaappat kommune taanna aallartitassaminik nutaamik toqqaassaaq.
Imm. 6.
Piffissaq qinigaaffik ukiumi qinigaaffiusumi 1. juulimiit naatsorsorneqassaaq, ukiumilu kommunalbestyrelsimut nutaamik qinersiviusumi 30/6-mut ingerlassalluni.
Imm. 7.
Siulersuisut aallartitat ataatsimiinneranni qinigaanerminnit qaammatit pingasunngortinnagit namminneq inissitsitissapput siulittaasup tullissaanik siullermik aappaannillu qinersillutik, aammalu suleriaasissartik namminneq aalajangersarlugu.
Imm. 8.
Siulittaasoq sivisuumik peqanngittariaqassappat siulittaasup tulliata siulliup kingoraassavaa, tassaniissalluni siulersuisut kissaateqarneratigut aallartitat ataatsimiinneranni siulittaasussamik nutaamik qinersisoqarnissaata tungaanut.
Imm. 9.
Siulersuisuni ilaasortat sinnerisa arlaat qinigaaffimmi iluani kommunalbestyrelsimit ilaasortaajunnaaruni siulersuisunit tunuassaaq namminerlu sinniisissaminit taarserneqarluni. Aallartitat qinersinermi suleqatigiissut ilaasortamik taassuminnga toqqaasimasut tamatuma kingorna aallartitat ataatsimiinneranni tullermi sinniisussamik nutaamik toqqaassapput.
Imm. 10. siulersuisuni ilaasortaq kommunit aqunneqarnerat pillugu inatsimmi § 16, imm. 2, naapertorlugu nammineq kommunerisamini kommunimi qinigaaffimminit minnerpaamik qaammatinik pingasunik sivisussuseqassangatinneqartumik tunuarallarpat, taava taassuma nammineq sinniisissaa tunuarallarfiup nalaani atuuttussamik siulersuisuni ilaasortanngussaaq.
Imm. 11. Siulersuisuni ilaasortap peqqinnginnini, allamik qinigaaffeqarnini, niuertutut suliani allalluunniit tamakkununnga assersuunneqarsinnaasut peqqutigalugit minnerpaamik qaammatini pingasuni siulersuisutut qinigaaffini isumagisinnaanngikkaa siulittaasoq ilisimatinneqaruni sinniisussaa siulersuisut ataatsimiinnissaannut siullermut ataatsimiigiaqqussavaa. Siulersuisut ataatsimiinnerminni tamatumani aalajangissavaat sinniissussap isernissaanut piumasarineqartut eqqortinneqarnersut. Ilaasortap siulersuisuni pisussaaffini kingumut isumageqqilersinnaanngorpagit sinniisussaq siulersuisunit tunuassaaq.
Siulittaasoq.
§ 9.
Siulittaasup suliassani nammineerluni aaqqissuutissavai.
Siulittaasup Kattuffiup ulluinnarni siulersorneqarnera siulersuisut erseqqinnerusumik killissaliussaasa iluanni isumagissavaa. Siulittaasup siulersuisut ataatsimiinneri siulersortassavai aammalu aallartitat ataatsimiittut siulersuisullu aalajangigaat piviusunngortittassallugit.
Akissarsiat.
§ 12.
Siulittaasup, siulittaasup tulliata, siulersuisuni ilaasortat sinnerisa, Kattuffiup immikkut ataatsimiititaliaasa, ataatsimiititaliarsuisa, suleqatigiissitaliaasa siulittaasuisa ilaasortaasalu sinnerisa, kiisalu Kattuffiup naalakkersuinikkut sulineranut pingaarutilimmik suliaqartut allat akissarsiassaat, ullormusiassaat, suliffimmini akissarsiassaraluaminnik annaasaaqarnerminnut taartisissutissaat immikkullu akissarsiassaat siulersuisut aalajangersassavaat.
Siulittaasup suliunnaarnermini akissarsiaqarallarnissaa soraarnerussutisiaqarnissaalu pillugit siulersuisut aalajangersaassapput.
|
