|
Qaqortup Kommuniata siunnersuutigaa kommune KANUKOKA Namminersornerullutillu Oqartussat peqatigiillutik inuutissarsiutinik siuarsaaniarnermut pioreersut pilersinneqartussallu aallaavigalugit pilersaarusioqatigiinnissaat aammalu tassunga atatillugu aningaasaateqarfimmik pilersitsisoqassasoq. Naluneqanngitsutut kommunit tamarmik pisussaaffeqarput kommunimut pilersaarummik taassumalu ataani inuutissarsiornermik pilersaarummik peqassallutik. Qulaani siunnersuutigineqartup taakkua ilaatigut imarisussaavai. Taammaattumik Kattuffiup siunnersuutigissaavaa kommunip periarfissani atorlugu inuutissarsiornermut pilersaarut peqarsimanngikkuni sanateqqaassaagaa kommunili pilersaaruteqaruni nutarterlugu qulaani taaneqartut ilanngullugit pilersaarusiorsinnaammat. Inatsit nutaaq januaarip 1-ini 2004 atulersoq tassalu kommunit inuutissarsiutinut akuusinnaanerat pillugu inatsit tunngavigalugu kommuni imaluunniit kommunit arlaliullutik periarfissaqarpoq/put inuutissarsiutinut siuarsaanermut aningaasaateqarfiliorsinnaallutik. Assersuutigalugu maanna kujataani kommunit peqatigiillutik Destination South Greenland-imik taallugu selskabiliorput takornariaqarnermut atatillugu peqatigiillutik ineriartortitsiviusussamik. Avannaani aamma kommunit Destination Disko-imik taallugu taamatut takornariaqarneq pillugu suleqatigiiffissamik selskabiliorput. Taassuma saniatigut Qeqertarsuup tunuani kommunit peqatigiillutik inuutissarsiornermut aningaasaateqarfiliornissamik suliniuteqarput taannalu suliaq ingerlavoq. Kommunimut Kattuffiup siulersuisuisa siunnersuutigissavaat nammineq Kommunimut pilersaarutip ataani inuutissarsiornermut pilersaarut nutartissaagaa aammalu kommunimi aningaasaateqarfiliornissaq siunniusinnaallugu imaluunniit nunap immikkoortuani kommunit allat peqatigalugit inuutissarsiornermut aningaasaateqarfimmik pilersitsisinnaanissaq siunniutissagaat. Tassani eqqaamaneqassaaq Sulisa A/S aammalu Greenland Tourism A/S Inuutissarsiornermullu Pisortaqarfik KANUKOKA-lu suleqatiserineqarsinnaammata kommunip anguniakkatut eqqartugai tunngavigalugit. Inassuteqaat Kattuffiup siulersuisuisa inassutigissavaat aallartitat qulaani taaneqartut tunngavigalugit oqallisissasut pineqartorlu siunnersuuteqarfigineqarnera tunngavigalugu Kattuffiup siulersuisuisa suliniut ingerlateqqissagaat. |
