|
Narsap kommuniata siunnersuutigaa Greenland Tourism-imut Sulisa A/S-imullu ineriartortitsinissamut qitiusuniit aningaasaaliissutaasartut nunap immikkoortuinut nuunneqarnissaat. Tunngavigineqarpoq ineriartortsitsivinnut qulaani pineqartunut aningaasaliunneqartartut ilaat nunap immikkoortuini pitsaanerusumik atorluarneqarsinnaassammata. Naluneqanngitsutut KANUKOKA-p ataani 2002-imi kommunini inuutissarsiorneq pillugu suleqatigiissitaliortoqarpoq. Suleqatigiissitap angusaasa pingaarnerit ilagaat inatsisip nutaap kommunit inuutissarsiutinut akuusinnaanerat pillugu suleqataaffigilluarlugu ingerlasimammat. Tamannalu pisinnaasimavoq Inuutissarsiornermut Pisortaqarfik suleqatigilluarneqarmat ilaatigut ataatsimiittarnerit tusarniaavigineqartarnerillu aqqutigalugit. Ukiuni kingullerni aamma Greenland Tourism A/S aammalu Sulisa A/S Inuutissarsiornermi Pisortaqarfimmeersut peqatigalugit Kattuffiup suleqatigillualersimammagit. Tassunga takussutissaavoq qulaani inuutissarsiornermi qitiusumit piorsaaniaqatigiiffiit suleqatigilluinnarlugit kommunini inuutissarsiornermi takornariaqartitsinermilu pisortat isumasioqatigiissittalerneri aamma aningaasatigut avitseqatigiinnikkut. Tamanna Kattuffiup tungaaniit iluatinnartutut suleqatigiinnerullu annertusarneratigut suli pitsaanerusumik ingerlalersinnaasoq isumaqarnarpoq. Kattuffiup siulersuisui isumaqarput suleqatigiinneq ataqatigiissaagaq atorlugu ilaatigut qitiusumiit inuutissarsiorneq pillugu aningaasaliissutaasartut nunap immikkoortortaqarfiinut tamakkiisuunngikkaluamik aningaasaliissutigineqarsinnaasut ilaatigut kommunit peqatigiillutik aningaasaateqarfiliorsinnaanerat iluatsillugu taakkununngalu aningaasaateqarfinnut ilanngunneqarsinnaalissammata. Kattuffiup siulersuisuisa naatsorsuutigilluinnarpaat qulaani taaneqartut suleqataaffigalugit sunneeqataaffigisinnaassallugit. Inassuteqaat Kattuffiup siulersuisuisa aallartitat qulaani taaneqartut tunngavigalugit pineqartoq oqallisigissagaat isummersorfigalugu. Siunnersuutigineqartussat Kattuffiup siulersuisuisa suliniutissatut ingerlateqqissagai. |
