Siulittaasup nalunaarutaa

Allakkatigut nalunaarut sapaatip-akunnialuisa matuma siornatigut nassiunneqareersimasoq qularnanngitsumillu kommunini oqallisigineqareersimasoq innersuussutigalugu, aammalu nalunaarutip taassuma kattuffiup atuagassiaani tigulaariffigineqareersimanera innersuussutigalugu, matumuuna ilassutaasunik oqaaseqalaarniarpunga.

Siullermik eqqaalaarusuppara Namminersornerulernermiit ukiut 25-nngornerat ukioq manna malunnartinniaratsigu. Ukiut taakkua ingerlaneranni nunatsinni pingaarutilinnik pisorpassuaqarpoq. Neriuppunga kommunit innuttaasunik nalliuttorsiornermi akuutitsilluarniarumaartut. Mannalu iluatsillugu naalakkersuisut kommuninut ataasiakkaanut aningaasatigut tapiissuteqarsimanerat qujassutigerusuppara, taamaalilluni akunnaatsuliineq tamanna naleqquttumik malunnartinniarneqarsinnaaniassammat qulequtaralugu "Tamatta akuusa".

-------

Kingullermik aallartitat ataatsimiinnerisa kingornatigut pilersinneqarsimapput Aaqqissuussaanermut Isumalioqatigiissitat. Isumalioqatigiissitat taakkua kommunit Namminersornerullutillu Oqartussat nammagassanik suliassanillu agguaaqatigiinnerat nalilersoqqissavaat.

Isumalioqatigiissitat katitigaanerata kommunit KANUKOKA-lu periarfissippai suliap qanoq ittumik inerneqarnissaanut sunniuteqarnissaannut. Tassami siulersuisut ukiarmi borgmesterinit pisinnaatinneqarput aaqqissuussinerup maannakkut atuuttup pimoorullugu nalilersoqqinneqalernissaanut. Tamatumunnga tunngatillugu siulersuisut pingaartippaat nalilersueqqinnerup tamatuma kingunerisaanik kommunit naalakkersuinikkut sunniuteqarsinnaatitaanerulernissaat.

Siulersuisuni isumaqarpugut qitiusumik aqutsivallaarneq demokratiimut peqqinnanngitsuusoq. Nunatta namminersornerulernissaa kissaatigisimavarput angusimallugulumi nammineq nunagisatsinni ineriartorneq iluamik sunniuteqarfigilerniassagatsigu. Isumaqarpungalu piffissap takutissimagaa eqqortumik aalajangersimanerput. Taavalu pissusissamisuussaaq naalakkersuinikkut sunniuteqarsinnaanerup nunap immikkoortuinut, tassa kommuninut, siammarneqarneruneratigut namminersornerulerneq tamanna nukittorsassallugu.

Neriuutigaara isumalioqatigiissitat siunnersuusiorsinnaajumaartut siunissami ataatsimooqatigiiffissani nutaani kommunit namminneerlutik ineriartornermut sunniuteqarnissaannut periarfissaqalersitsisussanik. Allaffissornersuaq inuiaqatigiinnut oqimaalliartuinnartoq isumalioqatigiissitat suliaata kingunerisaanik millisinneqarsinnaasariaqarpoq. Isumaqarpungami qarasaasiatigut attaveqaqatigiinnermut periarfissat nutaat atorluarnerisigut innuttaasunik sullissineq pitsaanerulersineqarsinaasoq aningaasaliissutit ilanngikkaluarlugit. Takorloorparput siunissami kommunit maannamut innuttaasunik kiffartuussinermi suliassareriikkamik saniatigut inuutissarsiornermut, pilersuinermut, angallassinermut nukissiornermullu sunniuteqalissasut.

Kissaatiginarpoq Namminersornerullutik Oqartussat siunissami pisortaqarfittut suliassaanerusunik sammisaqalissasut kommunillu ineriartornermik aqutsinissaannut kiffaanngissuseqarnerulersinneqarlutik. Isumalioqatigiissitat suliartik pillugu unnugu paasissutissiinissaat qilanaarutigaara, taamaalillutik maani ataatsimeeqataasut aamma siunnersuinissaminnut isummaminnillu saqqummiussinissaminnut periarfissaqarniassammata.

Qarasaasiatigut attaveqaqatigiinnermut tunngasut isumalioqatigissitat taakkua sammisassaannut pingaaruteqartunut ilaammata siulersuisut aalajangersimapput IT pillugu aqutsisoqatigiit siorna maani Kangerlussuarmi ataatsimiinnermi pilersinneqartut atorunnaassasut. Taamaalillutik kommunit ataasiakkaat namminneq IT-ip tungaatigut sullissisutik suleqatigalugit qulakkeerniassavaat systemip maannakkut atugarisamik ajunngitsumik ingerlasinnaanissaa.

Naalakkersuisut Inatsisartut upernaaq manna ataatsimiinnerannut saqqummiussipput 2004-mut tunngatillugu politikki aningaasaqarnerlu pillugu nalunaarummik. Aningaasaqarnerup tungaatigut naalakkersuisut sulissutigissamaagaat nalunaarummi tassani eqqartorneqarput.

Naalakkersuisut ilaatigut pilersaaruteqarput inuutissarsiornerup tungaatigut ataatsimoortumik suliniuteqarnissaminnik aammalu ilinniartitaanerup tungaatigut nukittorsaanissaminnik. Suliniutissat tamakku nalinginnaasumik tapersersorneqanngitsoornavianngillat.

Naalakkersuisulli siunnersuutaanni maannamut annerusumik assortuussutigeqqajaaneqartut tassaapput akileraartarnermi ilanngaatinik kommuninullu ataatsimoortumik akileraarutinik qaffaaniarneq - minnerunngitsumillu innaallagissap, erngup kiassarnerullu assigiimmik akeqartinneqarnerisa allanngortinneqarnialersaarnerat.

Akileraartarnermut tunngatillugu allannguutissatut siunnersuutit Inatsisartut upernaaq manna ataatsimiinneranni oqaluuserineqareerput, tassa akileraartarnermi ilanngaatit allannguutissaat inatsisit malillugit upernaakkut ataatsimiinnermi aalajangersarneqartartussaatitaammata.

Naalakkersuisut siunnersuuteqarnerminnut atatillugu paasititsipput ilanngaatinik qaffaanerup kingunerisaanik kommunit annaasaqassagunik taarsiiffigineqarsinnassasut. Taamaattumillu KANUKOKA aalajangersimavoq akileraarutinik aaqqissuussinerup allanngortinneqarnissaanik siunnersuut tamanna akerlilerniarnagu.

Assigiimmik akeqartitsinermut tunngatillugu siunnersuut tupigisassaanngitsumik aalassaatigineqarrpoq. Aaqqissuussinermi tamanna nammaqatigiinnermik imaqarpoq - aammalumi siorna Ilulissani KANUKOKA-mut aallartitat ataatsimiinneranni siulittaasutut nalunaarutinnik saqqummiussigama nammaqatigiinneq taannarivara, tassa taamani naligiissaarisarnermik aaqqissuussinerit sammigatsigit, taamanilu kommuninut kajumissaarutigaara (issuassavara) "nammaqatigiinnerup attanneqarnissaa ineriartortinneqarnissaalu peqataasut ataasiakkaat nammineersinnaassusiat, immikkoorutaat tunuliaqutaallu ataqqillugit." (issuaaneq naavoq)

Kisiannili assigiimmik akeqartitsinerup allanngortinneqarnissaanik pilersaarutit oqallisissiaannaagallarput. Naalakkersuisullu suli erseqqissumik siunnersuuteqanngillat inoqutigiit akinik qaffaanernit eqqorneqartussat qanoq taarsiiffigineqarsinnaanersut - aammalu suli erseqqissumik siunnersuuteqaratik ikaarsaariarnermi qanoq aaqqissuussisoqarsinnaanersoq.

Paasivarput assigiimmik akeqartitsinerup allanngortinneqarniarneratigut atuisut suliffeqarfiillu atuinermik qanoq inuiaqatigiinnut aningaasartuutaasarneranik sianiginninnerulernissaannut kajumissaarnissaat siunertaasoq, taamaaliornikkullu inuiaqatigiit innaallagissamut, imermut kiassarnermullu aningaasartuutaat ikilisinneqassasut. Assigiimmik akeqartitsinerup allanngortinneqarneratigut illoqarfinni nunaqarfinnilu arlalinni akit qaffassapput. Illua'tungaatigulli ilimagineqarpoq illoqarfinni annerusuni ineriartornermik nunamut tamarmut iluaqutaasussamik aallartitsisoqarumaartoq.

Siulersuisut naalakkersuisut pilersaarutaannut isumaat unaavoq assigiimmik akeqartitsinerup qanorluunniit allanngortinneqarnissaa itigarteriissanngikkipput. Itigartitseriiginnarnata naalakkersuisut oqaloqatigisariaqarpavut qanoq iluamik oqimaaqatigiissitsisinnaanersugut, illua'tungaatigut nunatta isorliunerusortaani innuttaasut eqqarsaatigalugit illua'tungaatigullu nunatta aningaasarsiornikkut ineriartorfissaqarnissaa eqqarsaatigalugu - taamaalilluni nammaqatigiinneq atuuttuarsinnaaniassammat allatut iluseqaleraluarluni.

Ulloq manna kingusinnerusukkut aallartitat periarfissaqarumaarput naalakkersuisut tamakku pillugit qanoq saqqummiussinissaat tusassallugu. Inerititaqarfiusumik oqallinnissarput qilanaaraara. Inassutigerusuppara naalakkersuisut saqqummeereerneratigut erseqqissaataasunik apeqquteqartoqartassasoq, aatsaallu aqagu aallartitat iluamik isummersussasut.

Naluneqanngitsutuut atuarfeqarneq pillugu peqqussut nutaaq siorna aggustip aallaqqaataani atuutilerpoq, aammalu atuarfimmi piffissaq suliffiusoq pillugu nutaamik isumaqatigiissuteqartoqarluni ukioq manna aggustip aallaqqaataani atuutilersussamik.

Soorlu allakkatigut nalunaarutinni eqqaagiga, peqqussut nutaaq piffissarlu suliffiusoq pillugu isumaqatigiissut nutaaq ukiup atuarfiusup immikkuualuttutigut tamatigut pilersaarusiorneqareertarnissaanik nalunaaquttallu-akunnerisa atorneqartut aqunneqarluarnissaannik piumasaqarput. Pilersaarusiornermi periaaseq nutaaq tamanna atuarfinni pisortaasut ilinniartitsisullu sungiunniagassaraat.

Piffissaq suliffiusoq pillugu isumaqatigiissutip nutaap aamma imarai ilinniartitsisut atuuarfiillu pisortaasa piffissamik tunineqartarneranni minnerpaaffissarititassanut aalajangersakkat. Aamma immikkoortoqarpoq kommunit namminneerlutik aalajangiiffigisinnaasaannik assigiinngitsutigut suliniuteqarfigissanerlugit taamalu piffissamik immikkoortitsiffigissanerlugit. Piffissaq suliffiusoq pillugu isumaqatigiissummut nutaamut aammalu 2003-mi isumaqatigiissummut tunngatillugit kommuninut taarsiissutaasut minnerpaaffissarititaasunik aalajangersakkanik tunngaveqarput, annikinnerusulli suliniutaasinnaasunik "nammineq aalajangigassanik" tunngaveqarlutik.

Peqqussutitaaq piffissarlu suliffiusoq pillugu isumaqatigiissutitaaq tamarmik kommunit namminneq iliuuseqarnissaannut periarfissiipput, tamannarpiarlumi kissaatigisimavarput. Sianigisassarpulli tassaavoq minnerpaaffissarititaasut saniatigut assigiinngitsunik suliniutissaqassagutta nalilersueqqissaartarnissarput. Taamaaliunngikkutta atuarfiup aningaasartuutai ukiuni aggersuni malunnaatilimmik amerlisooriaannaassapput. Kommunit aningaasaqarnerat eqqarsaatigalugu immitsinnut aperiuartariaqarpugut suut pingaarnerutissanerlugit suullu akissaqarfigissanerlugit.

Ukiortaap kingorna inuussutissarsiutitigut tunngaviusumik ilinniartitsinermi ilinniartuusut ilinniarnersiutisiaasa lærlingit akissarsiaattut ilillugit allanngortinneqarnerat ukiortaap kingorna pilikkataangaatsiarsimavoq, soorlumi tamanna allakkatigut nalunaarutinni eqqaagiga. Allanngortitsineq Namminersornerullutik Oqartussanut sulisitsisunullu aningaasartuutitigut allannguutaasussaasimanngikkaluarpoq, kisiannili nalunaarutissami tusarniaassutigineqartumi sulisitsisut malunnaatilimmik aningaasartuuteqarnerusussanngortitaapput.

KANUKOKA-p aammalu Grønlands Arbejdsgiverforeningip tusarniaanermut oqaaseqaataasa kingunerisaannik marsimi naatsorsuinermi tunngavissanik nutaanik suliaqartoqarpoq sulisitsisunullu tapiissutit nutaanik angissusilersorneqarlutik. Tamakku naalakkersuisunit aningaasaqarnermullu ataatsimiititaliamit poorski sioqqutitsiarlugu akuerineqarput.

Isumaqatigiissutip sulisut kattuffiinnit sulisitsisunillu iluarsaanneqarnissaa maanna amigaataalerpoq. Tamannalu killiliussat piumasarineqartut iluanni pisinnaassappat allanngortitsineq kommuninut sulisitsisuusunut aningaasartuutitigut allannguutaangaarnavianngilaq. Nalunartulli pillugit KANUKOKA-mit oqaatigineqareerpoq aningaasartuutit allanngortitsinerup kingunerisaanik amerlissagaluarpata tamanna ataatsimoortumik tapiissutitigut taarsiiffigineqartariaqartoq.

AEB pillugu ataatsimiititaliap sulinini sapaatip-akunnerani qaangiuttumi aallartippaa, aammalu Piginnaasaqaleriartornermut Siunnersuisoqatigiit nutaat sapaatip-akunnerani uani sulilersussaapput. (AEB tassa sulisitsisut inuutissarsiutinik ilinniartitsinermut akiliuteqartarnerat). AEB pillugu ataatsimiititaliami KANUKOKA-p aallartitaatut siulittaasuunissannut akuersisimavunga. Matumuunalu kommunit kajumissaarusuppakka ataatsimiititaliat siunnersuisoqatigiillu taakkua nutaat malinnaaffiginiaqqullugit periarfissaalersinnaasullu eqqumaffiginiaqqullugit. Pingaaruteqarpormi sulisorisat piginnaasaqarneruleriartornissaat eqqarsaatigalugu suliniuteqarnerni kommunit peqataanissaat.

Kissaateqarnitta kingunerisaanik ukiarmi Danmarkimi kommunit kattuffiata pikkorissaasoqarfia KLK aammalu sulisunik pisortanillu pikkorissaasarfik PISORTAQ (maanna Pissassarfimmik taaguuteqalersoq) isumaqatigiissuteqarput kommuninut tunngassuteqartutigut pikkorissaasarnissamik. Pikkorissarnerit taamaattut Pissassarfiup tamanut ammasumik neqeroorutigisassavai aammalu kommunini ataasiakkaani ingerlanneqartussatut neqeroorutigisassallugit. Kalaallisut oqaasilimmik pikkorissaaqataasoqartassaaq pikkorissaasunut KLK-minngaanneersunut aallaqqaammut malinnaasussamik, kingornali kalaallisuinnaq pikkorissaasinnaalersussamik.

Pikkorissarnerit sisamat neqeroorutaagallassapput, qulequtaqartut "Sulianik aalajangersimasunik ingerlatsineq", "Sullissineq", "Pisortani ingerlatsinermi ileqqorissaarneq" kiisalu "Suleqatigiilluarsinnaaneq". Pikkorissarnerit taakkua imarisaannik nassuiaatit KANUKOKA-p nittartagaani atuarneqarsinnaapput. Aammali pikkorissarnermi sammisassat allat kommuninit kissaatigineqarsinnaasut KLK-ip ammaffiginiarpai.

Nalakkersuisut pisuussutinik uumassuseqartunik piujuartitsinissaq pillugu Tulugaq aqqutigalugu paasitsitsiniaanerat aallartimmalli Kattuffiup tapersersugaraa.

Nuannaarutigalugu paasivara maannamut kommunit arfinillit imminnut pisussaaffilersimammata oqallinnermik ingerlatitseqqinnissamut aammalu piujuartitsinissaq tunngavigalugu isumalluutinik uummassusilinnik iluaquteqarniarnermi kommunerisami suliamik nangitsinissamik Tulugaq pillugu allagaqaammik taaneqartumut atsiornermikkut. Kommunit taakku tassaapput Uummannaq, Paamiut, Qaqortoq, Qeqertarsuaq, Maniitsoq Upernavillu.

Tulukkap paasisitsiniaanermi pisortaata nalunaarutigaa aamma kommunit allat peqataanissartik siunniussimagaat, tamannalu Kattuffiup tungaanit nuannaarutigaarput. Qularutiginngilaralu kommunit suli peqataanngitsut matuma kingorna ilanngussorumaartut suliniummut tassunga kusanartumut nuannersumullu.

Suliniummut "Kommunini Avatangiisit"-nut tunngatillugu nuannaarutigaara ullumi nalunaarutigisinnaagakku 2003-mi kommunit batteriinik akkumulatorinillu aqerlumik akulinnik katillugit 175 tonsinik nassiussisimammata Mokana-mi passutassanngorlugit piiagassanngorlugillu - Mokana tassaavoq eqqakkanik navianartunik tigooraavik Danmarkimiittoq kommunit ataatsimoorlutik ingerlataat. Angusaq tamanna tulluusimaarutissaavoq, matumuunalu kommunit innuttaasullu qutsavigaakka batteriikunik katersuiniarneq "Batteriit tunniutikkit" tapersersorsimammassuk.

Nuannerpoq Kalaallit Nunaanni atortussiat avatangiisinut navianartut 175 tonsinik annikinnerulersimanerat paasillugu. Tamanna avatangiisitsinnut peqqinnissatsinnullu pitsaasuuvoq. Aammaliuna eqqakkanik navianartunik immikkoortiterisalernerput aningaasivitsinnut iluaqutaasoq. Ukioq manna kommuneingeniørit ataatsimiinneranni Mokanap pisortaata kisitsisitigut takutippaa batteriikut, elekronikkimik atortorissaarutikut eqqakkallu navianartut tigooraavitsinni immikkoortitertarutsigit malunnaatilimmik sipaarutissaqartugut passussinermut assartuinermullu. Assersuutigisaa Qaqortuminngaanneerpoq ukioq manna pisimasoq, tassa immikkoortiterereernikkut eqqakkanik navianartunik nassiussinermi ataatsimi 100.000 kr.-it missaanniittut kommunip sipaarsinnaasimagai passussinermut atugassaasimagaluartut. Naatsorsuinermilu tassani assartuineq ilaanngilaq.

Nuannaarutigaarput Mokana nunatsinnukartitsilluni eqqakkanik navianartunik passussinermut pikkorissartitsinissaminut piffissaqarniartarmat. 2003-mi Qaqortumi Sisimiunilu taamatut pikkorissaatitsivoq, ukioq mannalu Maniitsumi Ilulissanilu. Pikkorissarnerit tamakku kommunini teknikkeqarfinnit unnersiutigineqarput, taamalu aamma illoqarfinni minnerusuni nunaqarfinnilu eqqakkanik navianartunik passussisarnissamut Mokanap pilersaarusiaa qilanaarutigaarput, ukialeqqaarnerani Uummannami aallartittussaq misiligutaasumik pikkorissarfiusumillu.

Qiimmaallannarportaaq Nunaqarfiit pillugit ataatsimeersuarnermi marsimi Kangerlussuarmi pisumi oqaluuserineqartut anguniagassatullu siunniunneqartut maanna piviusunngortinniarlugit pimoorullugit suliniutigineqalermata. Malitseqartitsilluni ataatsimiititaliap pilersinneqartup isumagisassaraa nunaqarfiit pillugit ataatsimeersuarnermi anguniagassatut siunniunneqarsimasut pilersikkiartuaarneranni ataqatigiissaarinissaq susassaqartunillu tinnersaasarnissaq. Sussaqartut ataatsimiititaliarlu angusaqarluarnissaannik kissaappakka.

Maluginiarpara aamma kommunit marluk piffissami aggersumi nunaqarfitik pillugit isumasioqatigiissitsiniartut, tassa Qaqortoq Paamiullu. Isumasioqatigiinnerit nunaqarfinni pineqartut ilaanni, tassa Eqalugaarsunni Arsummilu, ingerlanneqartussaanerat tulluartuuvoq. Kommunit taakkua nunaqarfimmik siunissaat pillugit anguniagassat nunaqarfimmiut avataaniillu qaaqqusat peqatigalugit isummersorfiginiarpaat ilaatigut inuutissarsiornermi ilinniartitaanermilu periarfissat eqqarsaatigalugit. Suliniutit taamaattut nuannerput, tassami ullutsinni nunaqarfiit akilersinnaanngitsutut aammalu siunissaqanngitsutut oqaatigineqartarnerat illua'tungilerniaraanni nunaqarfimmiut peqatigalugit tunngavilersuisoqartariaqarmat.

Apriilip naalernerani nunaqarfiit peqatigiiffianni KANUNUPE-mi siulersuisut suleqatigiinnissamik isumaqatigiissuteqarfigaakka. Nunaqarfiit kommunit ataaniinnerat ataqqillugu periarfissiisoqarpoq nunaqarfiit peqatigiiffiata pisariaqartitsinera naapertorlugu allaffissornikkut siunnersorteqarnikkullu ikiorserneqartarnissaanut, pisariaqarfiatigut akiliuteqartarnikkut. Aammattaaq nunaqarfimmiut peqatigiiffiat nittartakkatsigut paasissutissiisarfeqalersinnaasoq isumaqatigiippugut. Neriuppunga isumaqatigiissuteqarneq tamanna tamanit akuersaarneqarsinnaasoq.

------

Allakkatigut nalunaarutinni sullivinni avatangiisit eqqumaffiginiarneqarnissaat kajumissaarutigaara - sullivinni qallikkut atugarisat imaluunniit tarnikkut atugarisat tamaasa assigiimmik eqqarsaatigalugit.

Tassami ukiumi qaangiuttumi KANUKOKA sullivinni avatangiisit qaqileriffigineqarneranni assigiinngitsutigut suleqataavoq. Taamaalilluta ilinniartitsisut kattuffiat IMAK suleqatigaarput nakuusertarneq nakuusernissamillu sioorasaarisarneq pillugu atuagaaqqiap ilitsersuutaasup saqqummersinneqarnerani. Ilitsersuut allanneqarpoq sullivinni nakuusernerit, sioorasaarinerit uumisaarinerillu ajornartorsiutaammata ilungersunartutut isigisariaqartut.

Neriuppugut pinaveersaartitsinermi ilitsersuusiaq taanna suliffigissaanermi sakkussat ilagilluarumaaraat. Tassami kommunit suliffiutaanni suleqataasut toqqissisimallutik sulinissaat tamatta soqutigisaraarput. Suliffimmi avatangiisit pitsaasut, illutigut atortutigullu sinaakkusiussat isumannaatsut naleqquttullu, minnerunngitsumillu suleqatigiinnikkut ajunngitsumik ingerlaneq najukkami inuiaqatigiinnut iluaqutaasumik sulinermik nuannernerulersitsisussaapput inuunermillu pitsaanerulersitseqataallutik.

--------

Naggasiinialersinnanga ilisimatitsissutigissavara KIT A/S-ip ataatsimeersuarnissaa pisarnertut piffissaqarfigissagatsigu, aqagu ualikkut pisussaq. Nalunngilaralu ileqquusumik ataatsimeersuarneq pereerpat nalunaaqquttap-akunnerini marlunni-pingasuni ataatsimiinnissamut pissanganartumut unammisitsinertalimmut tamatta qaaqqusaasugut

-------

Allakkatigut nalunaarutinni kommuninut kajumissaarivunga meeqqanut inuusuttunullu politikkissaminnik aalajangersagaqaqqullugit. Kajumissaarullu tamanna matumuuna nangeqqissavara.

Ilaqutariinnermut Peqqissutsimullu naalakkersuisoq Asii Chemnitz Narup-ilu kissaateqarnitsigut misissuisoqaqqippoq meeqqat inuusuttuaqqallu maanna qanoq amerlatigisut Namminersornerullutik Oqartussat ulloq unnuarlu paaqqinnittarfiutaanni inissinneqarnissaminnut pisariaqartitsinerannik.

Nuannaajallannarpoq utaqqisut allassimaffiat takivallaarunnaarsimammat. Misissuineq naammassilluanngikkaluarpoq, kisiannili periarfissaq iluatsillugu kommunit kajumissaarusuppakka meeqqanut angajoqqaaminnit pissusissaatut tapersersorneqanngitsunut akisussaaffitsik naammassiniaqqullugu.

Utaqqisutut allassimasut siornatigutut amerlatigiunnaarsimagaluartut isumaginnittoqarfinnit ataasiakkaanit ilisimatitsissutigineqarpoq inissiiffissanik pisariaqartitsineq utaqqisut allattorsimaffiisa takutitaannit annerusoq. Naalakkersuisoq suleqatigalugu tamanna malittareqqinniarpara periarfissat pisariaqartitsinermut naapertuunnerulernissaat siunertaralugu. Suliassani tamakkunani kommunini uagut inuiaqatigiit sinnerlugit iliuuseqarnissatsinnut pisussaaffeqarpugut.

Meeqqanik sumiginnaasoqartarnera ilungersunartuuvoq inuiaqatigiinnilu ilumut ajornartorsiutaalluni.

Tamattami isumaqatigiippugut nunarput namminersuleriartortinniarlugu. Taamaattumillu tamatta immikkut ataatsimoorlutalu tamatumani akisussaassutsimik pingaartitsinitsinnik takutitsinissarput kinguaariillu tulliuttut pillugit iliuuseqartarnissarput pingaaruteqarluinnarpoq. Angajoqqaat akisussaaffeqarput isumagisassaminnik, kommune akisussaaffeqarpoq isumagisassaminik, Namminersornerullutik Oqartussat akisussaaffeqarput isumagisassaminnik.

Taama oqaaseqarlunga kommunit ukiumi qaangiuttumi inuiaqatigiinni oqalliseqataanissaminnut soqutiginnissimanerat qujamasuutigaara, qilanaarpungalu allakkatigut nalunaarutiga maannalu saqqummiussinera pillugit aallartitat qanoq oqaasissaqarnerat tusassallugu.