Ukiup Kommunia 2004: Maniitsoq

Jens Lars Fleischerip allagartaq saviminiusoq "2004-mi Ukiup Kommunia"-nut uppernarsaataasoq Maniitsup borgmesterianut Siverth K. Heilmannimut tunniuppaa. Aallartitat ataatsimiinneranni peqataasunut nittartermagu sanianiipput 2. viceborgmester Søren Lyberth kommunalbestyrelsimullu ilaasortaq Jens M. Lyberth.

Ukiup Kommunianik toqqaaniarnermi Kattuffiup qangali ileqqoraa unammissutitut qulequtarineqartoq tunngavigalugu Ukiup Kommunianik toqqaaniarnermi ataatsimiititaliannguamik naliliisussanik pilersitsisarluni ukioq manna aamma taamaappoq.

Ukioq manna Ukiup Kommuniatut kommuninik unammisitsinermi qulequtarineqarpoq ”kommune immikkut ittumik avatangiisinik aammalu pisuussutinik uummassusilinnik piujuaannartitsinissamik suliniuteqarluarsimasoq” taassumalu ataani ilaatigut makkua toqqaanermut nalilersuutitut atorneqarsimapput:

• Kommunip avatangiisit eqqiluitsuutinniarlugit iliuuserisimasai, tassani pineqarlutik:

a) illoqarfimmi nunaqarfinnilu kiisalu

b) najugaqarfiit avataanni, soorlu piniariartarfiit, eqalunniarfiit allallu innuttaasut

ornittagaat eqqarsaatigalugit

• Avatangiisinik/pinngortitamik eriaginninneq pillugit malittarisassat kiisalu piniarnermut, aallaaniarnermut aalisarnermullu malittarisassat unioqqutinneqannginnissaasa malittarineqarneri nakkutigineqarnerilu qanoq ingerlanneqartarpat?
• Malittarisassaareersunik qulaani taaneqartunik malitsitsiniarnerup saniatigut kommuni pinngortitamik eriaginninneq aamma pisuussutinik uumassusilinnik piujuaannartitsinissaq tunaartaralugu ingerlatsineq eqqarsaatigalugit nammineq immikkut iliuuseqarsimava?
• Kommunimi innuttaasunut paasititsiniaaneq peqataatitsinerlu qanoq ingerlanneqartarpa qanorlu annertutigaa?
• Kommunip ukiumut qulaani pineqartunut aningaasaliissutigisartagai qanoq annertutigippat?
• Kommunimiit qulaani allassimasut saniatigut suliniutinik allanik ilanngussisoqarsinnaavoq.

Kommunit unammeqataajumallutik qulaani taaneqartumut qulequttamut paasissutissanik nassitsismasut arfineq marluusimapput. Kommunit pineqartut unammeqataanerminnut tunngavilersuutaat suliniutaallu nuanneqaaat kusanarlutillu taamaammallu Ukiup Kommunianik toqqaaniarneq imaannaasimanngilaq.

Nalunngilara maluginiartarlugulu Ukiup Kommunianik toqqaaniarnermi qulequtarineqartoq tunngavigalugu kommunit allat unammisitsinermut peqataanngikkaluit suliniuteqarluartut taammannalu nuannaarutissaavoq aammalu kommunit kaammattorusuppakka suliniutinut qulaani taasannut suli peqataalluaqqullugit. Taamaasiornitsigut nunarput alianaagisarput kusagisarpullu suli avatangiisaasa eqqiluitsuutinneratigut aammalu pisuussutinik uumaasusilinnik eriaginninnermik tunngaveqartumik atuineratigut avataanit tusaamaneqarnera suli pitsaaneruleqqullugu.

Maannalu kommune Ukiup Kommuniatut 2004 Kattuffiup nalileeqataasullu peqatigalugit toqqarsimasaat ataguli tikeriartigu.

Kommune pineqartoq tassaavoq - paasissutissinneqarsimanerput toqqammavigalugu - ukiuni arlalinni qulequtaq pineqartoq tunngavigalugu suliniuteqarluarsimasoq naak aningaasatigut pigissaartorsuunngikkaluarluni kisianni suliniutinut pitsaasunut siunertanullu anguniagassatut siunniunneqarsimasunut piumassuseqarluarluni tulleriaarilluartarnermigut aningaasanillu aannertusaarinermigut immikkut ittumik taasarialittut inississimasoq. Naliliisunit maluginiarneqarsimavortaaq kommuni pineqartoq nammineerluni nunami naalakkersuinikkut qitiusumit oqartussat utaqqiinnarnagit suliniuteqartarsimasoq ataani pineqartut pillugit.Qulequtarmi tunngavigalugu tassalu ”kommune immikkut ittumik avatangiisinik aammalu pisuussutinik uumassusilinnik piujuaannartitsinissamik eriaginnilluni suliniuteqarluarsimasutut” nalilerneqartoq.

Kommunip avatangiisit eqqiluitsuutinniarlugit suliniutigisimasai ilaatigut makkuupput:

• Kommunip annertuumik aningaasaliiffigeqatigalugu illoqarfik ikuallaavittaartissimavaa. Kiak ikkuallaavimmit pinngortoq atorluarniarlugu inissianut kiassaanermut atorneqartarpoq aammalu eqqakkanut uloriarnartunut tigooraaviliortitsisimavoq immikkoortitsiviusumittaaq. Tassa eqqagassat tungaasigut annertuumik suliniuteqarsimavoq katillugit kommunimut 13 miliuuninik naleqartumik. Innuttaasunut eqqagassat tungaasigut kommunip iliuuserisimasaminut quppersakkamik paasissutissanik saqqummersitsisimavoq taamaasilluni innuttaasut peqataanerat annertusarniarlugu sulisuminullu eqqagassat ulorianartut pillugit pikkorissartitsisimalluni.Taassuma saniatigut nunaqarfimmini pingasuusuni ikuallaaveeqqanik pilersitsisimavoq aammalu illoqarfimmi 2002-imi ullukkut unnuamilu eqqaavimmi igitat kuuffi illoqarfik qimannerullugu kuuffiliortitsisimalluni.
• Kommune ukiorpaalunngortuni eqqagassanik uloriarnartunik katersisitsisarsimavoq soorlu uuliakoornernik aammalu akumulaatorinik aqerlortalinnik taakkulu Danmark-imut nassiussortarlugit.
• Kommune 2004-imi kommune alla ataaseq peqatigalugu misileraanermut ingerngup mingutsitap saliiviliornissaanut tassani suleqatigalugit Avatangiisinut Pinngortitamullu Pisortaqarfik Cowi-ilu.
• Kommunip ukiorpassuarni suliniutigisimaavaa illoqarfimmi nunaqarfinnilu eqqiluitsuutitsinissaq taamaasilluni taakkunani eqqiluitsuullunilu kusanartuuniassammat tamannalumi tikeraanit maluginiarneqartarsimavoq. Ukiut tamaasa upernaakkut innuttaasut peqatigalugit illoqarfinni nunaqarfinnilu saligisitsisoqartarpoq tassanilu aamma atuartut peqataasinneqartarput. Illoqarfimmi eqqaaviit amerlasuut iliorarneqarsimapput inuit maangaannaq eqqaannginnissaat anguniarlugu innuttaasullumi tamanna ilikkarluarsimavaat,

Kommunip pisuussutit uumassusillit piuajuaannartinnissai pillugit suliniu tai:

• Kommunimi inuutissarsiornermi immikkoortortaqarfiup ataani atorfilittaqarpoq piniarnermi aalisarnermilu siunnersortimik taamaasilluni kommuni piniartunut aalisartunullu attaveqarluarpoq suleqateqarluarlunilu. Tassani suleqatigiinnermi piniagassat killilersukkat suleqatigiiffiupput aammalu piniariartarfiit taakku suleqatigalugit eqqiluitsuunissaat anguniarneqartarluni.
• Kommunip aalisarnermi piniarnermilu nakkutilliisoq peqatigalugu piniariartarfiit pingaarnerit atorneqarnerillu saliiffigisarpai soorlu Kangerlussuaq, Kangia aammalu Niaqunngunaq taamatut pineqartartut. Kommunip sulisui piniarnermi aalisarnermilu nakkutiliisup nakkutilliilluni angalanera iluatsillugu piniariartarfinni saligisarput eqqagassallu ikuallallugit imaluunniit illoqarfimmut apuuttarlugit.
• Tulukkamik taaneqartup kommunip pineqartup illoqarfiani paasisitsiniaanerata kingorna piniarnermik aalisarnermilu siunnersorti kommunimi Tulukkap suliniutaanik nangittisusamik innuttaasut peqatigalugit siunnersuisooqatigiissitaliorpoq. Siunnersuisoqatigiinngortut suliaasa siulliit ilagaat illoqarfimmi kalaaliaqqap atorneqarnerata pitsanngorsaavigineqarnera tassuunakkut tuniniarneqartartut pitsaassusaat qaffassarniarlugu aammalu piniakkanik atuilluarnerunissaq eqqarsaatigalugu.
• Kommune aamma peqataavoq Phoca-projektimik taaneqartumut taassumalu suliniutip siunertaraa puisip neqaanik orsuanillu maannakkornit annertunerusumik atorluaanerunissaq.

Soorlu aallaqqaataani oqaaatigigiga Ukiup Kommunianik toqqaaniarneq imaannaaneq ajorpoq. Taamaattumik Kattuffik sapinngisamik qulequtarineqartoq tunngavigalugu Ukiup Kommunianik toqqaaniarnermi nalileeqataasussanik qulequtarineqartumut ilisimasalinnik suleqateqartarpoq ukioq mannalu Namminersornerullutik Oqartussat Pisortaqarfiiniit allaniillu sinniisaat ukunanngaaneersuupput:

Aalisarnermut Piniarnermut Pisortaqarfimmiit

Avatangiisinut Pinngortitamullu Pisortaqarfimmiit

Tulukkamiit

Aammalu KNAPK-imiit

Naggasiut.

Soorlu maani tusarnaartut ilaasa qulaani taaneqartut tunngavigalugit eqqoriar- simassagaat kommuni sorleq pineqarnersoq maanna oqaatigissavara pineqartoq kommunitsialak Ukiup Kommunia 2004 tassaavoq Maniitsup Kommunia aappassaanik Ukiup Kommunianik taaneqarnermigut pilluaqquneqartoq. Maniitsup Kommunia pilluarit!

Qulaani tunngavilersuutigineqartut tunngavigalugit Maniitsup Kommuniata sinniisai maaniittut Maniitsumilu innuttaasut qamannga pisumik pilluaqquakka – kommunitut suliniutit ilaannut maligassiuilluarsimasutut nersornaaserneqaqqimmata. Qanortoq suliniutisi qulaani taaneqartut suli ingerlattuarisigit – pilluaqqigitsilu.