Una tooruk siulersuisortaat assingat takujumallugu

 

Lars Karl Jensenip, Siumut sinnerlugu inatsisartunut ilaasortaasimasup Qeqertarsuarmilu borgmesteriusimasup, taamaalilluni parteeqatini Jens Lars Fleischer, upernaaq kommunalbestyrelsinut qinersinerup kingorna Uummannami borgmesterinngortoq qinigaaffimminillu tamatuminnga tamakkiisumik nakkutiginnikkusuttoq, taarserpaa.

 

Jens Lars Fleischerilli KANUKOKA-p politikkikkut siulersugaanera qimassanngilaa, tassa siulersuisuni ilaasortassatut qinigaagami.

 

KANUKOKA-p siulersuisuini inissat apriilimi kommunalbestyrelsinut qinersinerup inerneri tamarmiusut tunngavigalugit d’Hondts-metode malillugu Siumumut, Atassummut Inuit Ataqatigiinnullu agguarneqartussaareerput. Taavalu aallartitat ataatsimiinneranni siulittaasussarsiornerup siulersuisunullu ilaasortassarsiornerup kingorna siulersuisut 1. juuli 2005 aallarnerfigalugu ima katitigaalissapput:

 

Siulittaasoq Lars Karl Jensen, Siumut

Siulittaasup tullia siulleq Agnethe Davidsen, Siumut (Nuummi borgmesteri)

Siulittaasup tulliata aappaa Knud Kristiansen, Atassut (Upernavimmi kommunalbestyrelsimut ilaasortaq)

Jens Lars Fleischer, Siumut (Uummannami borgmesteri)

Kathrine Larsen Lennert, Inuit Ataqatigiit (Sisimiuni kommunalbestyrelsimut ilaasortaq)

 

Siulersuisortaat aggustimi ataatsimeeqqaassapput. Annertuumik innarluutillit isumagineqarneranni ajornartorsiutit naalakkersuisut suleqatigalugit qaangerniarneqarnissaat kiisalu Aaqqissuussaanermut Isumalioqatigiissitat suliaata nalilersoqqinneqarnissaa, aallartitat ataatsimiinneranni piumasarineqartut, siulliullugit suliassatut pingaarnertut tiguneqassapput.

 

Inussiarnersumik 

Jens Lars Fleischer