|
Innarluutilinnut innorluutilinnullu sullissinermi nalunaaqquttap akunneranut aningaasaliissutit amigartumik tunniunneqartarnerat kommuniniit akueriuminaatsipparput. Nalilerparput misileraalluni aallartittoqalermat ilisimatinneqarpugut kommuninut aningaasartuutaassanngitsoq. Taamatut iliorneq kommuninut annertuumik annaasaqaataavoq aningaasatigut. Taamaattumik innarluutilinnut innorluutilinnullu sullissinermi naammaginartumik angusaqassagutta kommunini suliniarnermi amikkisaartumik aningaasaliisarneq piviusorsiortuunngilaq akueriuminaallunilu. Namminersornerullutik Oqartussat innarluutilinnut innorluutilinnullu tamakkiisumik akisussaasuupput. Taamaattumik aningaasaliissutit tamakkerlugit tunniuttariaqarpaat. Aammalumi ilaqutariinnermut inatsisinillu atortitsinermut naalakkersuisup saqqummiussai piffissamut 2004-07-mut innarluutilinnut aningaasaliissutissat akueriuminaapput. Kissaatigaarpullu tamakkiisumik akiliunneqartarnissaat. Akueriuminaatsoq aamma aana: Qinnuteqaraangatta akineqartarpugut: "Itigartippassi, Ankenævnimut naammagittaalliorniaritsi". Soorluli telefoni nammineerluni akisartoq. Aap, soorunami qinikkat tamatta ajunnginnerpaamik pitsaanerpaamillu sullitatta atugassaqartitaanissaat kissaatigisarparput suliniutigerusuttarlugulu. Taamaattumik ikioqatigiilluta ajornartorsiut tamanna qaangerniartariaqarparput, oqaannarata Namminersornerullutik Oqartussat taakku akisussaaffigigaat. Akisussaaffik tiguniarlissuk - taakkumi akisussaaffigaat. Tamatta suleqatigiilluta ikioqatigiilluta ajornartorsiut suugaluartorluunniit qaangerniartariaqarparput. Innarluutilik inuunini tamaat ajoqutigisaminik iluatsinnavianngilaq, taamaattumik taakkununnga aningaasaliissutit ukiumiit ukiumut nalilersortarnerat taamaatittariaqarput, taarsiulluguli inuunera naallugu aningaasaliissutit tamakkiisut tunniunneqartalerlik. Taamaaliornikkut kommunini inunnik isumaginninnermi sullissisut suliaat ilorraap tungaanut saatsinneqarsinnaavoq. Aammalu kommunimiit kommunimut nuunnermi aningaasaliissutit malinnaatinneqartumik eqqornerusumillu pineqarsinnaalissagaluarput kommunerilikkami sullitamut aningaasaliissutit inummut tassunga tunngasut sivisuumik utaqqineqartaratik piffissaajarnani sullissisoqarsinnaalissagaluarmat. Sullissisummi aamma qiviartariaqarpavut, aningaasarsiaasa allanut suliaqartunut naleqqiullugit aningaasarsiakippallaarneri peqqutaallutik atorfimminniit allanut akissarsiaqarnerusunut noorartarmata. Taamaattumik kommunini inunnik sullissisuni atorfeqartitsiniarneq ukiuni kingullerni ajornakusuulersimavoq. Tamanna ajornartorsiut qaangerniarlugu iluarsartuussisoqartariaqarpoq. Aammalumi innarluutillit illoqarfinni inigisaat immikkuualuppallaarput, taamalu aningaasartuutit annertuallaalertarput. Nuup Kommunea eqqaaginnarsinnaavarput. Tassani tarnimikkut innarluutillit illoqarfimmi immikkuualuttuni inissiortorneqarsimapput, taamaalilluni sullissineq nalunanngitsumik aningaasartuuteqarfiuallaalertarluni. Tamannali qaangerneqarsinnaavoq, tassa ataatsimut ineqartinneqarnissaat assut kissaatiginarmat. Taamaaliornikkummi aamma nalinginnaasumik inissarsiortut ikiorsissagatsigit - tassani init arlalissuit tunniunneqarsinnaassammata. Angajoqqaat meeqqanik inuusuttuaqqanillu sumiginnaasarnerat tamatta sakkortuumik suliniuteqarfigisariaqarparput aammalumi kommunini akissaqartittariaqarlutigu. Inuk qitiutillugu annertuumik suliniuteqartariaqarpugut. Tamattami peqqissuunissarput tarnikkut timikkullu anguniagassaavoq annertooq. Suleqatigiilluarnissassinnik kissaallusi qujanaq. |
