Kangaatsiap, Aasiaat Qeqertarsuullu kommune-ni aallartitat alaatsinaattullu eqimattaanni (gruppeanni) ukua inuttaapput:
Peter Alaufesen, Nikolaj Jerimiassen, Otto Jerimiassen, Ane Grethe Filemonsen, Rasmus Brandt, Inuaraq Petersen, Arne Rafaelsen, Enok Sandgreen, Bia A. Broberg, Lars Karl Jensen, Augusta Salling.
8. - 9. juni 2005 KANUKOKA-p ataatsimeersuarnerani oqaluuserisassani imm. 4: Siulittaasup nalunaarutaa:
Naatsukullammik oqaaseqarfigissavarput:
Nalunaarut imartooq, silittumillu oqariartuutilik akuersaarnartipparput. Taamaattoq siunissami eqqumaffigisariaqartoq pingaartoq oqaatigissavarput, tassa pikkorissartitsisarnerit kommuneni ataatsimiititaliat ataavartut siulittaasuinut atorfilittanullu akulikinnerusinnaanissaat periarfissiuunneqartariaqarpoq. Aammalu pikkorissaanerup kinguneri sukumiisumik nalilersortuartariaqarput, minnerunngitsumik pikkorissartitsinermi siunertarineqartut pissusissaatut kinguneqartarnersut eqqarsaatigalugu, nalilersuinerit KANUKOKA-p kommune-llu ataasiakkaat suleqatigiinnerisigutingerlanneqartassapput.
Eqqaamassavarpummi innuttaasut sullinneqarnerat suli pitsaanerusoq anguniarlugu pikkorissarnerit ingerlanneqartarmata. Taamaattumik qularnaarniartuartariaqarpoq ajunngitsumik, siunertarlu eqqorlugu pikkorissaanerit naammassineqartarnissaat.
Taamatut naatsumik oqaaseqarlunga siulittaasup nalunaarutaa Kangaatsiap, Aasiaat Qeqertarsuullu kommuniiniit akuersaarlugu tusaatissatut tigugipput nalunaarutigissavara, tassami erseqqissartariaqarmat siulersuisut maannakkut atorunnaartussat suliassartik paasilluarlugu, suliakkiutigineqartut assigiinngitsut amerlanerpaatigut naammaginartumik naammassisarsimammatigit. Tamannalu pillugu nersualaartariaqarpavut.
Piffissarlu iluatsillugu nalunnginnatsigu siulersuisut ilaat qinigassanngorteqqinngitsut, qutsaviginiarpavut ukiuni qaangiuttuni nunatsinni kommune-nut tamanut aalajaallutik tunniusimallutilu sullissilluarsimanerat pillugu. Soorunami KANUKOKA-mi atorfilittat tamaasa aamma qutsaviginiarpavut politik-ikkut aalajangersakkat naammaginartumik kusanartumillu sinnerluta naammasiniartuartarsimammatigit.
