Siullermik oqaatigissavarput pingaartikkatsigu innuttaasunut sullissinerup pitsaanerpaafimminiitinneqarnissaata ujartortuarneqarnissaa. Taamatulli oqareerluta isumaqanngilagut allannguinerit tamatigut pitsaanngoriaamik kinguneqartartut, taamaatumillu allannguissatilluni allannguinerup sunniutissai qulaajarluarneqarsimasariaqartut.
Matumanilu allannguiniarneq annertooq suliarineqartoq tassalu aaqqissuusaanermut allannguinissamut tunngassutillit aammalu kommunit kattussuutinneqarniarneranut tunngassuteqartut peqqissaarulluinnarlugit suliarineqartariaqartut isumaqarfigaarput. Assut pingaarpoq paatsuugassaajunnaarlugu qulaajaasoqarnissaa kommunerujussuanngortitsiniarnermut suut pitsaaqutaanersut suullu sanngeqqutinngussanersut pillugit. Ullormi manna tikillugu innuttaasut apeqqutigisartagaat, Isumalioqatigiisitamit paasititsiniaajutigaluni tusarniaasumit, naamaginartumik akineqartarsimanngillat, taamaakaluartoq suliaminnik naamassinnilerlutik oqariartuuteqarput.
Kangaatsiap, Aasiaat aammalu Qeqertarsuup kommuniinit aallartitat piumasaqarput aaqqissuuseqqinnermut taamatullu kommunit kattussuutinneqarnissaanut suliaq nukingipilunngitsumik akerlianilli peqqissaartumik anguniagaqartumilli, kommunit innuttatik peqatigalugit oqallinnissaanut periarfissiilluartumik taamatullu kommunit innuttaasullu Isumalioqatigiissitamut immersuinissaannut periarfissillugit sulineq ingerlaqqittariaqartoq.
Tassalu kommunit innuttaasut peqatigalugit oqallinnissaminnut atortussanik tunngavilersukkanik paasinarluartunik pilersorneqartariaqarput, aammalu isummersornissaminnut taamatullu kommunit qanitatik peqatigalugit oqallinnissaminnut piffissamik periarfissinneqartariaqarput. Tamanna pereerpat Isumalioqatigiissitaq suleqqinnissaminut atugassaanik apuussiffigineqassaaq. Taamaaliornikkut suliaq ataqatigiinerusumik allannguiffigineqarniartullu peqatiginerullugit ingerlanneqarsinnaamat.
Ilanngullugu oqaatigiumavarput kommunit imminut qanitariit kattunnissamik suliaqalereersinnaanerat imaluunniit allaffissornikkut suleqatigiilernermikkut Namminersornerullutik Oqartussat akisussaafigisimasaanik tigusiartuaalereersinnaanerat akuersaaratsigu suliarineqartariaqartutullu isumaqarfigigatsigu.
Qulaani taasagut innersuusutigalugit inassutigissavarput suliap naamassineqarnissaanut killiliussap ukiumik ataatsimik marlunnilluuniit kinguartinneqarnissaa aalajangiunneqassasoq.
