Siullermik eqimattamit qujassutigissavarput, aaqqissuussaanermi ataatsimiititaliamit saqqummiunneqartoq pillugu.
Eqimattamit isumaqarpugut, maannamut killiffik eqqarsaatigalugu suli takujuminaattoq, ilumut taamatut isikkoqarluni aaqqissuussinissamik ilusissatut takussutissiami saqqummiunneqartoq innersuussutigalugu, nunatsinni kommuunit sisamanut aaqqissuuppata ilumut pitsaaqutai qanoq innersut, minnerunngitsumillu innuttaasunut sullissineq ilumut pitsaanerulissanersoq suli takujumianaammat.
Kiisalu piffissalersuineq pilersappallaartutut eqimattamit oqaatigissavarput. Isumaqarpugummi innuttaasut, minnerunngitsumillu qinikkat suli apeqquterpassuit akisinnaanngisaat amerlavallaartut, piffissalersuinissamut innersuussut sanillersuutissagaanni.
Eqimattamilu pingaartipparput maannakkumut killiffimmi iluseq ataasiinnaq ataatsimiititaliamit noqinneqalersimammat akuerseruminaatsikkatsigu. Tassami isumaqarpugut periarfissat suli arlaqartut misissorneri ingerlasinnaasoq, taamaasilluni innuttaasut, qinikkallu periarfissanik arlaqarnerusunik takusinnaallutillu misissuisinnaasut. Tassanilu aamma apeqqutit suli "akineqanngitsut" arlaqarmata, silaannarmilu erfallutik.
Pingaartuuvoq inuiaqatigiit taama allanngortitsinissaq annertutigitillugu tusarniarluarsimanissaat, tamannali suli naammassineqanngitsutut isigaarput, suli sumiiffiit arlaqartut tikinneqarsimanngimmata.
Allaffissornerup tassuunakkut millisarsinnaanera eqimattami ilimagerpianngilarput, tassami sullitat "siammasinnerusumiilerpata" aamma soorunami atortorissaarutitigut atuineq periarfissaalluaraluartoq, taamaattoq oqartussaaffiit/ sullissiviit sumi inissisimalernissaat aamma apeqqutaalluinnarmat. Soqutiginarluinnarmalli sulisut eqqarsaatigalugit qanoq kinguneqarumaarnissaa, aaqqissuussineq allanngorluinnarpat.
Eqimattamit erseqqissaassutigissavarput isumaqanngimmat suliaq akerlerigipput. Pingaartutut isigaarput piffissaq pisariaqartinneqartoq, paasissutissat ersarissut, nalilersuinerillu siammasissut suliami uani ataqatigiilluinnartariaqarmata. Kommuunit kattussuussinnaanerannut apeqqut ukiuni tulliuttuni suli ingerlassammat, allannguisoqarnissaalu arlaatigut avaqqunneqarsinnaanngimmat.
Taamaattorli apeqqutit arlallit innuttaasut, qinikkat inuiaqatigiimmi tamarmi ilusilersorluarnissaat pisariaqarmat soorlu:
*Qinikkat amerlassusaat qanoq isikkoqalissava?
*Kommunalbestyrelse qanoq ilusilersugaassava?
*Nunaqarfinni aqutsisut qanoq pissappat?
*Sullissiviit soorlu inunnik isumaginnermi sullissivik, teknikkeqarnikkut sullissivik sullissiviillu allat qanoq aaqqissuutissappat? Sumullu?
Apeqqutit ilaatigut tamakkuupput, innuttaasut, qinikkallu annertuumik, suli oqallisigalugit "oqimaalutartariaqagaat", kingornalu pitsaanerusorisamik inassuteqarlutik.
Soorunami eqimattami ilisimalluarparput, pingaaruteqartoq innuttaasut qinikkallu akornanni annertuumik aaqqissuussaasumik "isumasiuinerit" pisariaqartut. Taamaattumillu suli isumaqarpugut piffissaq annertunerusoq pisariaqartikkipput.
Kiisalu immikkut maluginiarparput aaqqissuussaanermut ataatsimiititaliap innersuussutigigaa 2008-mi kommunalbestyrelset nutaat qinerneqariissasut, taamaasillutik ukioq ataaseq 2009-p tungaanut piareersarniassammata. 2009-millu aaqqissuussineq nutaaq atuutilerluni.
Eqimattami isumaqarpugut aamma tassani siunertaq ajunngikkaluartoq suli piffissaq annerusoq atorfissaqartinneqartoq, soorlu siuliani taaneqareersutut.
Kiisalu naggataagut eqimattamit kaammattuutigissavarput aamma isumaliutigineqaqqullugu ukiulli siuliini kommuunit ataasiakkaat sullissivitsigut ataasiakkaatigut suleqatigiinnerat pioreersoq aamma nalilersuinermi ilaatinneqassasoq, pitsaaqutigineqartullu, ajoqutaalumi isumaliutigineqarlutik.
Taamatullu kommuunit suleqatigiikkusuttut, misiliillutillu suleqatigiikkusuttut periarfissinneqassasut, piffissami aalajangersimasumi. Tassuunakkut aamma kommuunit namminneq "nanisinnanerat" soorunami eqqarsaatigalugu.
