Aaqqissuussaanermut tunngasumik saqqummiussaq pissanganartuuvoq. Malunnarporlu suleqatigiissitaliaq pilersinneqarsimasoq annertuumik sulisimasoq periarfissanillu assigiinngitsunik ujartuisimasoq. Kisiannili paasinarpoq suli nunarput tamakkivillugu oqallitsitsinertik suli naammassisimanngikkaat.
Uagut gruppitsinniit kissaatiginartipparput kommunit imminnut qanitariit suli periarfissaqartinneqassasut naapeqqinnissaminnut aammalu pilersaarutinik eqqartueqqinnissaminnut.
Assersuutigiinnarlugu kommunerujussuanngortinniarneqartut Kangaatsiamiit Avanersuaq ilanngullugu eqqarsarnartoqartipparput atorfeqartunut tunngatillugu suli erseqqissumik ilisimannginnatsigu qanoq kinguneqartussamik pilersaarusiortoqarnersoq. Tassami ilimananngilaq aningaasaqarnermut pisortat arfineq-pingasuussasut, kommuneingeniørit arfineq-pingasuussasut il.il.
Apeqqutit taamaattut suli iluamik akineqanngimmata aammalu soraarsitsisoqannginnissaanik oqaluttoqaraluartoq ilutsinni qanoq pisoqarsinnaanera eqqartoqqaarusupparput. Taavalu aamma minnerunngitsumik allaffissuarni sulisut qanoq inissinneqarnissaat toqqissisimanartumik aaqqissuunneqareerpat aatsaat aalajangiisoqarnissaa kissaatiginartipparput. Tassami sulisorpassuit massakkut aperisalereerput "uangami sussaanga?", "qanoq pineqassaanga taamatut kattukkutta?"
Strukturudvalgip saqqummiussinermini aamma oqaatigivaa allaffissornermut aningaasarpassuit ukiumut atortakkavut milliardit tikillugit amerlassuseqartut annertuumik apparneqassasut. Taanna tamatsinnit soorunami kissaatigineqarpoq. Kisianni qanoq annertutigisumik appartinneqassapat qanorlu? Kikkut eqqorneqassappat? Immikkoortortallu suut eqqorneqassappat? Taakkua ersarissumik saqqummiunneqanngillat.
Taavalu aamma Strukturudvalgip saqqummiussaanut ilaavoq atuartitaaqqinnissamut tunngatillugu kissaatiginartinneqartoq anguniarneqartorlu pitsaanerusumik ilinniartitaanissarput, aammalu innuttaasut ilinniagaqareersimasut pikkorissaqqinneqarlutillu ilinniartinneqaqqissasut. Nunat avannarliit eqqarsaatigalugit akisussaassuseqartumik malitseqartumik ilinniarsimasuusarput atorfillit 2/3-ii. Strukturudvalgimit saqqummiussinermi aamma tamanna eqqaaneqarpoq. Nunatsinni uagut tamanna angusimanngilarput, tassami 1/3-iinnaq qallunaatut kompetencegivende uddannelser pigivarput. Taavalu kommunit taamannak kattussuunniarneqarneranni taannaluunniit qanoq annertutigisumik qaffassarneqassasoq pilersaarusiorneqanngitsoq isumaqarpugut piffissalerneqaqqaartariaqartugut kommunit ingammik imminnut qanitariittut oqalliseqqinnissaannut.
Kommunalbestyrelsit qanoq-uku agguarniarneqartut? Qassinik ilaasortaqassappat? Inoqassuseq aallaavigalugu agguarneqassaagut? Apeqqutit taamaattut erseqqissumik paaseqqaarusuppavut.
