Kommunit allanngortinneqarnissaannut atatillugu siulittaasutta nalunaaruteqarnera isumaqarpunga naliliinera amigartoq, sakkortunerusumik oqariartuuteqartariaqaraluartugut kommunit uagut sinerissaminngaanniit aggertuusugut.

Saqqummiussat tunngavigalugit uanga imatut paasinnippunga taakkua suleqatigiissitat aallartissimasut suliaat naammagineqanngitsoq - aamma akuerineqarsinnaanngitsutut nalilerneqartutut uanga paasivara, amerlanerussuteqartuninngaannit.

Sinerissami kommunini innuttaasut qinigaat oqariartuuteqarput suliaq ingerlanneqarsimasoq naammanngitsoq, aamma pitsaanerusariaqartoq, aamma periarfissat allat isigineqartariaqaraluartut. Tassa sinerissami qinigaasut oqariartuutaat taanna pingaaruteqartoq.

Erseqqissumik oqaatigisariaqarpoq kommunini innuttaasut isummernissaminnut piffissaq annerusoq pisariaqartippaat. Periarfissat allat aamma saqqummiunneqartariaqaraluarput - kommunit sisamaannanngortinneqarnissaat ilumut pissusissamisoornersoq imaluunniit allatut eqqarsannginnersut sinerissami kommunit erseqqinnerusumik aperineqartariaqaraluarput oqarfiginagit sisamaannanngussaasi, taamaaliunngikkussi pinngitsaalineqassaasi. Isumaqarpunga tamanna qinikkat naammaginagu akuerisinnaanagulu oqaatigigaluaraat erseqqissumik oqaatigineqartariaqaraluartoq.

Aappaagumut isummereertussaavugut, maannakkumuli apeqqutit amerlanerpaarpaarpaartaat akineqarsinnaanngillat - aningaasanut tunngasut, qinikkat sumiissanersut qanoq issanersut. Tamakku apeqquterpassuit arlaannattaluunniit akisinnaanngilaat. Taamaattumik aappaagu pinngitsaalisaalluta isummereernissarput akuerisinnaanngikkipput erseqqissumik oqaatigisariaqarparput.

Taamaattumik kissaatiginaraluarpoq suliaq unitsikkallarneqarnissaa, imaanngitsoq unitsivillugu, kisianni nalileeqqilaariarta, qanoruna suliap taassuma ingerlanera ittoq. Akuerisinnaavarput? Taamaattumik uanga isumaqarpunga KANUKOKA naalakkersuisullu nalileeqqittariaqartut - immaqa suliaq allatulaaq ingerlanneqaleruni pitsaanerussagaluartoq, kommunillu taakkua eqqugaasussat aperinerullugit ataqqinerullugillu ingerlanneqaruni immaqa taava suliaq innuttaasunut kommuninilu qinikkanut paaseqatigiiffiunerusumik ingerlalissagaluartoq takorloorakku.

Kommunit kattutissagutta kommunit soqutigisaat aallaaviginerullugit suliaq ingerlasussaagaluartoq uanga isumaqarpunga. Qujanaq oqaaseqarnissannut periarfissinneqarama.