Ataqqinartut arnat angutillu, Kalaallit Nunaanni Kommuneqarfiit Kattuffianni aallartitatut ataatsimiittartut.

Malittarisassat malillugit Kalaallit nunatsinni kommunalbestyrelsemut qinersinerup kingornatigut

aallartitat ataatsimiinneranni siullermi ataatsimiinneq - siulersuisunillu nutaanik qinersineq - maannakkut naammassineqarpoq.

Politikkikkut sulininnut assut nakussassaatigalugu - nuannaarutigaara - uannut tatiginnillusi Siulittaasutut qinerassinga.

Siulersuisunullu ilaasortanngoqatikka immikkut pilluaqqullugit suleqatigiilluarnissarput qilanaaralugu, neriuutigaara - Kattuffimmi qullerpaatut pisortaasut tassalu aallartitatut katersuuttartut ataatsimiinnermi suliakkiutaat pitsaasumik angusaqarfiusumillu suleqatigiiffigissagivut, aamma qilanaaraara siulersuisut namminneq siunnersuusiortassasugut inuttaasunut iluaqutaasunik, Aallartitat ataatsimiinneranni aalajangiiffigineqartartussanik.

Aammattaaq qilanaraaraa KANUKOKA-mi atorfilittat pikkorissut - suliaminnullu tunniusimasut, qanimut suleqatiginissaat - naatsorsuutigalugulu pisarnertik malillugu, tamatsinnut iluaqutaasunik sullissiumaartut.

Qinigaaffik manna suliffissarput, inuiaqatigiit ineriartorneranni ingerlareersunik, annertuunillu nutarteriffiusunik suliassarpassuaqarpoq, maani immikkut taagornagit suliassatut tigullugit ingerlatassatsinnik.

Kattuffimmi Siulittaasunngorlaatut ilisimaraara Naalakkersuinikkut inuiaqatigiinnik ingerlatsinermi allannguutaasussatut siunniunneqartut tassanngaannarpallaarangata - kommunet tusarniaaffigineqartartut ilaat akissuteqarnissamut piffissamik annertunerusumik atuerusuttartut, minnerunngitsumik kommuninut aningaasatigut nammakkersuutaasussat nalilersorluarnissaat siunertaralugu.

Sulinissanni pingaartippara Aallartitat suliakkiutaasa pitsaasumik angusaqarfiusumillu sulissutiginissaat, taakkua aamma saniatigut sulisitsisutta kommunet pitsaasumik qanimullu sulinneqarnissaat, minnerunngitsumillu Naalakkersuisut paaseqatigiiffiusumik inuiaqatigiit ingerlatitaaneranni kommuninut tunngasunik suliassanut isumaqatiginninniamikkut paaseqatiginiartarnissaat qilanaaraara.

Oqaasinnaaqarpunga - Politikkikkut sulinermi issiavik sunaluunniit issiavigigalugu innuttaasunik sullissinermi, iluaqutaanavianngitsoq, immitsinnut pamiutigut kiilluta kaavikkaluarutta - Qinikkatummi sulinermi issiavimmi sorlermiluuniit issigaraluarutta tamatta sulinitsinni anguniagarputassigiippoq, tassalu; Kalaallit Nunaanni innuttaasut meeraagunik, inuusuttuugunik, utoqqaagunilluunniit tamarmik pitsaasumik avatangiiseqarlutik inuuniarnikkut kalaallit nunatta immikuullarinneranut naleqquttunik oqilisaassiffiusunillu atugassaqarnissaat - qinikkat tamatta suliassarigatsigu.

Unnugu oqaseqaqqittussaagama - maannakkut Siulittaasutut tunuartoq hr. Jens Lars Fleischer uumammik pisumik qutaviginiarpara, qinigaaffimmi kingullermi pitsaasumik angusaqarfiulluartunillu kommuneqarfin- nut tamanut sullissilluarsimammat - suliavit ingerlareersut nanginneqarnissaat qularutigissanngilat aamma siulersuisuni ingerlaqqinnerit uannut oqiliallaataavoq, neriuppungalu illoqarfik asassat borgmesteriuffiit suliffigilluarluassagit, pilluarillu ilaquttatit najornerulerlugit - nunat asasat qanimut sullisissagakku. Qinigaaffimmilu qaanngiuttumi siulersuisuni sulisimasut maannakkut tunuartut tamaasa uummammik pisumik qutsavigaakka suliassatik sulinertillu naammassimmassuk.

Minnerunngitsumillu Jens Inuusuttoq qutsavigaara neriuppungalu inuutisarsiutitoqqat ingerlateqqilerukku iluatsitsilluarumaartutit, ilaquttatillu siunissamik pitsaasumik kissaappassi.

Qilanaarpungalu ataatsimiinerup matuma nangissutigisaanik ukiamut borgmesterit kommunaldirektørillu Aalborgimi DanFish -messeqarnissami kommunet peqataanissaannut. Taamatut oqaaseqarlunga - Kalaallit Nunaanni Kommuneqarfiit Kattuffiani aallartitat ataatsimiinnerat pisarnertut imartuumik oqalliffiusoq - pitsaasumik anguniagaqarfiusumillu naamassineqarmat qujassutigaara. Tamassinnut qujanaq.