Siulittaasup allaganngorlugu aammalu oqaluinnarluni nalunaarutaa imartooq Gruppe 5-ip akuersissutigaa, taamaattorli makkuninnga oqaaseqaateqarusulluni:

1. Akit assigiikkunnaarsinneqarniarnerannut tunngatillugu aalaj angiisoqarnissaata tungaanut suleriaasiumasoq siulittaasup nalunaarutaani takusinnaanngilarput, isumaqarlutalu allannguutit taamak annertutigisut Kanukokap siulersuisuisa nalunaarutaanni aamma atuarneqarsinnaasariaqaraluartut.
2. Siulersuisut qinigaaffiup iluani annertuumik nikerarsimanerat erloqinartutut isigaarput, ilaatigut takusinnaasagut malillugit piffissap qinigaaffiup sinnerani sisamaannaasimammata naak tallimaasussaagaluarlutik.
3. Tamatta ilinniartitaaneq aammalu piginnaanngorsarneqarneq pisariaqarluinnartutut
   isigaarput, nalunaarummili amigaatigalugu inuusuttut 25-leereersimasut
   piginnaanngorsaqqinniarlutik piumassuseqartut "ilinniarnersiutisisinnaajunnaarsillugit"
   inissinneqarsimammata. Ilinniartitaaneq piginnaanngorsaqqinnerlu oqaatigiuassagutsigu
   inuit taamatut aamma ukiumikkut inissisimasut inuiaqatigiit ikiorsersinnaasariaqarpaat.
4. Nalunaarummi maqaasinartututtaaq isigaarput ukiumi 2008-imi klassit arlariit meeqqat atuarfianniit aninissaat taaneqarsimanngimmalluunniit. Isumaqarluinnarpugut kommunit
   annertuumik tamanna oqaloqataaffigisariaqaraat nuna tamakkerlugu politikkikkut
   suliarinnittussannut oqariartuutigisaqattaarlugu.
5. Innarluutillit meeqqat inuusuttuaqqaallu najugaat pillugit Namminersornerullutik
   Oqartussat qanoq iliuusigineqartariaqarput.Eqqartuussivikkut suliassiisimaneq
   naammaginarsinnaanngilaq. Perorsaaneq nammineq akisussaaffigaarput, taamaattumillu
   isumaqatigiinngisutsip naammasinissaa anguniarlugu - siulersuisut suleriaasiata
   arriippallaarsimanera - aamma tamanna ersiutaasoraarput siulersuisut Naalakkersuisunut qanippallaartumik inissisimasutut sulinerannut.
6. Nalunaarummi maqaasisat ilagaat ineqarnermut atatillugu kommunit ikiorsiineq
   aqqutigalugu inissianik ikiuuttarnerannut tunngatillugu ikiorserneqartoq
   akiligassaqarsimappat kommunit pinngitsooratik akiitsunik akiliisussaatitaanerat - tamanna aningaasatigut annertuumik kommuninut naleqartussaavoq !
7. Isumaginninnerup iluani ilinniarsimasunik sulisussaaleqinerujussuaq kikkut tamarmik
   oqaluuserisaat isumaqarpugut aamma immikkut qanoq iliuuseqarfigisariaqartoq, ilaatigut akissaatit tungaasigut pitsanngorsaaqataaniarneq suleqataaffigalugu, aammalu pineqartut sulinerminni atugaasa pitsanngorsaaviginiarnerisigut, pineqartut najugassaat
   piareersimasariaqarput, innarluutillillu piginnaaneqarnerusut ataatsimoortumik
   inissinneqarsinnaanerannut piumasaqaataasut aamma sakkukillisinniartariaqarlutik.
8. Naggasiullugulu oqaatigilarput kommuninut, nunaqarfiit siulersuisuinut kiisalu ilagiit
   sinniisaannut qinersinerup kingornagut qinikkatut sulisinnaanermut akueritinniarneq assut kipiluttunarsimammat, taamatullu pisoqaqqinnginnissaa anguniarlugu Kanukoka aamma tinnersaaqataasariaqartoq.