Ilulissat, 18. maaji 2006

Kalaallit Nunaanni Kommuneqarfiit Kattuffiannut aallartitat 34-ssaannik ataatsimiinnerat ullumi naammassivoq, kattuffiullu siulersuisui suliassanik pissanganartunik tunineqarlutik sulianik ingerlatitseqqinnissaminnut qilanaarput.

Aallartitat ataatsimiinneranni oqaluuserineqartut pingaarnersaraat pisortat ingerlatsiviisa aaqqissuussaanerannik iluarsaaqqinnissamik pilersaarutit.

Ataatsimiinnerup naammassinerani erseqqissivoq aaqqissussaanermik iluarsaaqqinnissamik suliniarnerup nanginneqarnissaa tapersersorneqartoq. Amerlasuut kommunit kattussuunneqarnissaannik tunaartaqarluni suleriaqqinnissaq erseqqissumik kissaatigaat ungaqqunneqarsinnaanngitsutullu isigalugu. Aammali kommunit ilaannit kattutinngikkaluarluni pisussaaffilisumik suleqatigiinnikkut ingerlatsinissamut periarfissiinissaq kissaatigineqarpoq. Taamattaaq kikkunnik kattuteqateqarnissamik aalajangerniarnissamut kommuninut piffissaliinerup isumaliutissiissut malissagaanni ukiup matuma naanissaanut killeqartup sivitsorneqarnissaa kommunit ilaannit kissaatigineqarpoq.

Immikkut kissaatigisat taakku suleqatigiissitani KANUKOKA-mit naalakkersuisunillu pilersinneqartussani suliarineqarnissaat kattuffiup siulersuisuinit aallartitat ataatsimiinneranni neriorsuutigineqarpoq.

Siorna Inatsisartunut qinersinerup kingunerisaanik kattuffiup siulersuisuinut ilaasortanik tunuartoqarnerata kingunerisaanik siulersuisunut ilaasortamik ataatsimik sinniisussanillu sisamanik qinersisoqarpoq.

Siulersuisunut ilaasortaq nutaaq tassaavoq Kiista P. Isaksen (Siumut). Taassuma sinniisussaatut toqqagaavoq Apollo Mathiassen.

Siulittaasup Lars Karl Jensenip (Siumut) sinniisussarilerpaa Jess Svane. Siulittaasuugallartup Karl Lyberthip (Siumut) sinniisussarilerpaa Annassi K. Karolussen, kiisalu siulersuisunut ilaasortap Knud Kristiansenip (Atassut) sinniisussarilerlugu Nikolaj Jeremiassen.

Siulersuisut sinnerlugit
Inussiarnersumik

Karl Lyberth
siulittaasuugallartoq