Kommunerujussuanngortussat ineriartornerannik malinnaaviginninnermi periaatsinik inerisaanissamik siunnersuut

 

(Kangia/Kitaani Ikaarsaariarnermi ataatsimiititaliamit)

 

Kommunerujussuanngortussat ineriartornerannik malinnaaviginnittussanik pilersitsisoqarnissaanik siunnersuut – aalajangersimasumik uuttuuteqartillugit. Ineriartortitsinermik suliaqarneq KANUKOKA-p ataaniittussanngorlugu inissittariaqaraluarpoq piaartumillu aallartinneqarluni kingusinnerpaamillu 2009-p aallartinnerani. Pissutsit aalaja­ngersimasut takussutissaqartittarnissaannik pisariaqartitsinerup saniatigut aamma meeqqat inuusuttullu atugaannik pitsanngorsaanissamut ataqatigiissumik takussutissaqartitsinissaq pisariaqartinneqassaaq.

 

Tunngavilersuineq itisiliinerlu

 

Paasissutissanik atorsinnaalluartunik pissarsisinnaanissaq tunngaviusussaavoq politikerit atorfillillu siunertat kommunini politikkikkut aalajangersarneqarsimasut isumagisinnaassappatigit piviusunngor­tillu­gillu. Taamatullu aamma pingaaruteqartigaaq ineri­ar­tornerup kissaatigisatut ilorraap tungaanut ingerlanera nakkutigisinnaajuassallugu.

 

Isumaqarpunga politikerit allaffissornermilu atorfillit suliassaqarfinni aalajangersimasuni paasissutissanik atorsinnaasunik akimmisaarfiunngitsumik pissarsisinnaasariaqartut. Taamaatumillu tamanna anguniarlugu suliarilluakkamik, torersumik pisariitsumillu aaqqissuussisoqartariaqarpoq. Paasissutissanik pissarsisinnaanissap saniatigut aammattaaq misissueriaatsimik imaluunniit misissueriaatsinik arlalinnik piorsaasoqartariaqarpoq kommuniulersussat sisamaasut atorsinnaasaannik.

 

Siunertalimmik, sunniuteqarluarsinnaasumik angusaqarfiusinnaasumillu politikkeqarnissamik piumasat pissusissamisoorput ukiunilu aggersuni piumasarineqaleraluttuinnassagunarlutik. Piumasat tamakku eqquutitinneqassappata KANUKOKA katersuuffissatut kiisalu politikerinut atorfilinnullu sakkussanik nutaanik ineriartortitsivissatut piukkunnarpoq.

 

Kommuneqarfiulersussami Sermersuumi sutigut tamatigut siunertaavoq meeqqat ilaqutariillu meerartallit inuuniarnikkut atugarisaasa pitsanngorsarnissaat, taamaattumillu siunnersuutinni taasimavara uuttuutissanik toqqartuisoqartariaqartoq meeqqat inuusuttullu ulluinnarni atugarisaasa allaaserineqarneranni tunngavissanik. Tamakkua oqimaalutarneqarnerat kommunimiit kommunimut allan­ngorarsin­naasarpoq.

 

Kommunerujussuassani sisamaasuni suliassaqarfiit aamma allat ineriartornerisigut nakkutiginissaat pi­ngaaruteqassaaq, soorlu inuussutissarsiorneq suliffissaqarnerlu. Taamaattumik suliassaqarfiit arlallit paasissutissarsiorfiginerannut misissuiffiginerannullu periaatsinik inerisaanissaq tulluartuussaaq.

 

Isumaqarpunga KANUKOKA siunissami pingaaruteqalerumaartoq kommunini politikkikkut sulinerup pitsanngorsarnissaanut. Taamaattumillu siunnersuutip kingunissalimmik oqaluuserineqarnissaanut qilanaarpunga.

 

Inussiarnersumik

Asii Chemnitz Narup