Siulersuisut Kanukoka-p malittarisassaasa allannguutissaannik siunnersuutaat

 

Siulersuisut aalajangersimasumik ataatsimik siunner­suuteqarnianngillat, periarfissanilli arlalinnik aallartitat ataatsimiinneranni oqaluuserilluagassanik aalajangigassanngortitsiniarlutik.

 

Kattuffiup malittarisassai Aallartitat ataatsimiinneranni aalajangiinerit naapertorlugit 1. oktobari 2008-miit atuutilersussamik allanngortinneqassapput.

 

• Siulersuisut siunnersuutigaat periarfissat pingasuusut ukua arlaat aallaavigineqassasoq: 

1. Siulersuisut aaqqissugaanerat ullumikkut atuuttoq, siulersuisunut ilaasortat tallimaallutik ullumikkutullu akissaateqarlutik, taakkununnga ilaalluni siulittaasoq piffissaq tamakkerlugu atorfeqartutut sulisoq – ataatsimeeqataasartuussallutilli borgmesterit sisamat, taasisinnaatitaanatik siulersuisutullu akissaateqaratik.
   
2. Siulersuisut tallimanik ilaasortallit, taakkununnga ilaalluni siulittaasoq piffissap ilaannaatigut atorfeqartutut sulisoq – ataatsimeeqataasartuussallutik borgmesterit sisamat, taasisinnaatitaanatik siulersuisutullu akissaateqaratik. 

Siulittaasoq 200.000 kr.-inik akissaateqassaaq ilaasortallu allat tamarmik immikkut 100.000 kr.-inik.

 

3. Siulersuisut tallimanik ilaasortallit, taakkununnga ilaalluni siulittaasoq piffissap ilaannaatigut atorfeqartutut sulisoq – ataatsimeeqataasartuussallutik borgmesterit sisamat, taasisinnaatitaanatik siulersuisutullu akissaateqaratik.

Siulittaasoq 70.000 kr.-inik akissaateqassaaq ilaasortallu allat tamarmik immikkut 35.000 kr.-inik (selskabit pisortanit pigineqartut 400 mio. kr.-init ikinnerusunik kaaviiaartitaqartut siulersuisuisa akissaateqartinneqarnerannut malittarisassat naapertorlugit).

 

• Siulersuisut aamma siunnersuutigaat kattuffiup aqqa pillugu aalajangersakkap (§ 1, imm. 1) oqaasertai nalinginnaasumik taaguinermut naleqqussarlugit iluarsineqassasut, tassa ”Kanukoka” aqqatut allassimalissalluni, kattuffiulli taaguutaa naalisagaanngitsoq ”Kalaallit Nunaanni kommunit kattuffiat” uiggiullugu allanneqassalluni.
   
• Aammattaaq Aallartitatut ataatsimiittartut qinnuigineqarput apeqqutit uku isummerfigeqqullugit:

a) Siulittaasoq suliunnaarnermini akissarsiaqarallarsinnaatitaajuassava aamma soraarnerussutisiaqarsinnaatitaajuassava? (§ 12)

 

b) Siulersuisunut ilaasortanik qinersinermut atatillugu partiinik suleqatigiikkuutaanik nalunaaruteqarnissamut periarfissiisoqassava? (§ 6, imm. 3) (Periarfissaq tamanna aqutsinermut inatsit naapertorlugu kommunalbestyrelsini atuutereerpoq, tassa partiit assigiinngitsut ataatsimiititaliani inissat inuttalersorneqarneranni teknikkikkut suleqatigiissinnaallutik).

 

c) Aallartitat ileqquusumik ataatsimiinneranni najuutinngikkaluarluni ”tusagassiuutit allat aqqutigalugit” peqataasoqarsinnaassava? (§ 5, imm. 7) (Aalajangersakkat maanna atuuttut aallartitat ileqquu­sumik ataatsimiinnerini telefonikkut videokkulluunniit peqataanissamut periarfissaqartitsinngillat).

 

d) Aallartitamut allamut piginnaaniliinikkut peqataasoqarsinnaalissava? (§ 5, imm. 7) (Ullumikkut aallartitat ataatsimiinneranni taamaallaat nammineq najuulluni taaseqataasoqarsinnaavoq).