Nalunaarusiami matumani suliat Kalaallit Nunaanni Kommuneqarfiit Kattuffiata piffissami qaangiuttumi akuuffigisimasai pingaarnerusut sapinngisamik tamakkiisumik nassuiaatigineqarput. Aallartitat ataatsimiinnerata kingulliup 22.-23. maaji 2007-imi pisup kingorna taasariallit tamatumani pineqarput. Tassami kattuffiup malittarisassai naapertorlugit ileqquusumik ukiumoortumik aallartitat ataatsimiinneri maajimi pisartussaapput. Ukioq mannali kommunini nutaassani kommunalbestyrelsinngortussanut qinersisoqarneratigut pissutsit immikkut ittut atuunnerat pissutigalugu kingullermik aallartitat ataatsimiinneranni aalajangersakkat ikaarsaariarnermi atuuttussat naapertorlugit 2008-mi aallartitat ataatsimiinnissaat aatsaat septembarimi pissaaq. Taamaattumik piffissaq nalunaarummi pineqartoq tamatumuuna tanneruvoq.
Aallartitat ataatsimiinneranni kingullermi Sisimiuni pisumi, KANUKOKA-p kattuffittut ukiuminik 35-liiffiani, taamani siulersuisuusut tunuarput, taamalu siulersuisunik nutaanik siulittaasumillu qinersisoqarpoq.
Pissutsit ataatsimut isigissagaanni ukioq qaangiuttoq kommunit oqaluttuarisaaneranni ukiuuvoq immikkuullarissoq. Pisortat suliassaqarfiisa aaqqissuussaanerannik iluarsaaqqinniarneq suliassartaqaqisoq KANUKOKA-p annertuumik akuuffigisaa piviusunngortinniarneqaleruttorpoq.
Ikaarsaariarnermi ataatsimiititalianut qinersisoqareermat kommunertaassat kattuffimmut aallartitassaat toqqarneqarput, taakkulu KANUKOKA-p siunissami politikkikkut aqunneqarnissaa pillugu aalajangiissapput. Malittarisassat allannguutissaannik siulersuisut siunnersuuteqarniarput. Aallartitat nutaat maajip naalernerani paasissutissiiffiusumik ataatsimiinneranni oqallisaasut sapinngisamik aallaavigalugit siulersuisut siunnersuusiorput. Siulersuisullu neriuutigaat siunnersuutitik ilassilluarneqarumaartut.
Siulersuisut 2007-imi aqqaneq-marloriarlutik ataatsimiipput, ukioq manna maannamut tallimariarlutik. Tamatumunnga tunngatillugu taaneqarsinnaavoq siulersuisut ataatsimiinneri telefonikkut ingerlanneqarnerusarmata, imminnut tikillutik ataatsimiinneri siulersuisunut ilaasortat ataatsimiinnernut annerusunut peqataajartorneri iluatsillugit ingerlanneqartarlutik, soorlu borgmesterit kommunaldirektørillu ataatsimiinnerini.
