Iluarsaaqqinnissap piareersarneqarnera
KANUKOKA-p allattoqarfiani aaqqissuussaanermik iluarsaaqqinnissaq pissutigalugu ukiuni marlunni sulisut pingasunik ilaneqarfigisimasaanni suliassaqarfiit 2009-mi januaarip aallaqqaataaniit kommuninut nutaanut tunniunneqartussatut kaammattuutigineqartut piareersarneqarnerannut tunngasut ulapputigineqarsimapput.
Naalakkersuisut siulittaasuata Hans Enoksenip KANUKOKA-llu siulittaasuata Søren Alaufesenip suliassaqarfiit Namminersornerullutik Oqartussanit kommuninut tunniunneqarsinnaasut misissorluarneqarnissaannik 2007-imi septembarimi isumaqatigiissuteqareerneratigut KANUKOKA-mi sulisut suleqatigiissitani 22-ni peqataasimapput kommunit ingerlatsiviini assigiinngitsuni Namminersornerullutillu Oqartussat pisortaqarfiini atorfillit ilagalugit. Taamalu suliassaqarfiit ilaat kommunit nutaat 1. januaari 2009-mi atuutilernissaanni tunniunneqareersinnaasutut nalilerneqarput.
Inassuteqaatit assigiinngitsut ikaarsaariarnermi ataatsimiititalianut qinersineq sioqqullugu borgmesterit kommunaldirektørillu ataatsimiinneranni saqqummiunneqarsimapput. Tusarniaasoqarneratigut maanna paasinarsisimavoq suliassaqarfinnik nutaanik kommunit nutaat aallarteqqaarneranni tunniussinissaq ikaarsaariarnermi ataatsimiititalianit amerlanerpaatigut kissaatigineqanngitsoq. Ikaarsaariarnermi ataatsimiititaliat isumaqarput siullermik suliassaqarfiit tigummineqareersut ingerlanneqarneranni kommunit nutaat isumannaatsumik aallartinnissaannut nukiit atorneqarunik pitsaanerussasoq.
Ukioq qaangiuttoq aaqqissuussaanermik iluarsaaqqinnissamut tunngatillugu suliassanik sammisassaqarfiusorujussuusimavoq, taamalu kommuneqarfiit kattuffianni sulisut tamarmik isumagisassamik nalinginnaasut saniatigut suliassami tamatumani peqataasimapput. Nutaarsiassanik allakkiaq ”Aaqqissuussaaneq – Strukturnyt” 17-eriarlugu saqqummersinneqarsimavoq kommunini sulisut politikerillu eqqarsaatiginerullugit, malunnarporli nutaarsiassanik allakkiaq taanna aamma tusagassiorfinnit Inatsisartunullu ilaasortanit atorluarneqarsimasoq. Aammattaaq aviisi Sermitsiaq suleqatigalugu atuagassiat paasissutissiissutit marluk aviisinut nuna tamakkerlugu saqqummertartunut ilanngullugit siammartigassanngorlugit naqitertinneqarput innuttaasunut paasissutissiinissaq siunertaralugu.
Kommuninut najoqqutassiat, pingaartumik piffissalersuinermut suliassanullu pilersaarusiaq kiffartuussinerillu assigiissarneqarnissaannut najoqqutassiaq, suliarineqareermata 2007-imi ukiarneraniit KANUKOKA suleqatigiissitani taaneqareersuni peqataalerpoq Namminersornerullutik Oqartussat suleqatigalugit. Suleqatigiissitanut suliakkiissutigineqarpoq suliassaqarfinnik Namminersornerullutik Oqartussanit kommuninut tunniussinerup kingunerisassaanik qulaajaanissaq. Tamatumani kommunit akuutinneqarnerat pivoq KANUKOKA-p aaqqissuussaanermik iluarsaaqqinnissaq pillugu immikkut politikkikkut ataatsimiititaliaatigut, allaffissornikkut aqutsisoqatigiitsigut kiisalu kommuniulersussani ingerlatsiviit peqataaffigisaannik suleqatigiissitaliatigut arfinilitsigut. Kommunit sinniisuisa ataatsimeeqatigineqartarneri amerlanerpaatigut telefonikkut ingerlanneqartarput, piffissallu ilarujussuani kattuffiup telefonikkut ataatsimiinnernut atortorissaarutaa ullaamiit unnummut atorneqartarpoq suliami kommunit sunniuteqaqataanissaat qulakkeerumallugu.
Suliap killiffia saqqummiukkumallugu 2008-mi februaarimi ataatsimiittoqarpoq borgmesterit, kommunaldirektørit Namminersornerullutillu Oqartussani atorfillit peqataaffigisaannik, suleqatigiissitat isummiussaat saqqummiunneqarlutik oqallisigineqarlutillu. Suleqatigiissitat suliaminnik nangitseqquneqarput ikaarsaariarnermi ataatsimiititaliat 1. maaji 2008-mi atuutilernissaanni aalajangernissamut tunngavissanik aningaasaqarnikkut kingunerisassanik nassuiaatitalinnik piareersimasoqarniassammat.
Taaneqareersutulli kommunini politikerit qinikkat nutaat pingaarnerutippaat kommunerujussuit ajunngitsumik isumannaatsumillu aallartilluaqqaarnissaat. Tamatumalu peqatigisaanik suliassaqarfinnik nutaanik tigusinissap piareersarneqarnera ingerlatiinnarneqarsinnaavoq, taamaalilluni suliassaqarfiit kommuninut tunniunneqarumaartussat naammattunik aningaasassaqarnissaat qulakkeerniarneqarniassammat.
IT
Ilisimaneqartutut KANUKOKA KIT A/S-imik, maanna Sermit A/S-imik, piginneqataajunnaarsimavoq, tamatumalu peqatigisaanik aktiat affaat Namminersornerullutik Oqartussanit pisiarineqarsimapput. Taamaalillutik kommuniulersussat sisamat pisortat qarasaasiaqarnerata ineriartortinneqarnerani naligiimmik sunniuteqassapput Namminersornerullutik Oqartussat peqatigalugit.
Aaqqissuussaanermik iluarsaaqqinnissamut atatillugu KANUKOKA aamma Namminersornerullutik Oqartussat suleqatigiillutik pilersaarusiortitsisimapput innuttaasunut qarasaasiakkut kiffartuussiveqalernissaq, borgerportaleqalernissaq, siunertaralugu. Pilersaarutit tamakku borgmesterinut kommunaldirektørinullu saqqummiunneqarsimapput isumaqatiginartinneqarlutillu.
Pilersaarutinik taakkuninnga piviusunngortitsisussat tassaalerput Namminersornerullutik Oqartussat kommunerujussuillu sisamat peqatigiillutik. Aalajangiiniartussaapput ”Pisortat ataatsimoorlutik IT-mik aqutsisoqatigiivi”, kommunit sisamaasut tamarmik sinniisoqarfigisaat aammalu Namminersornerullutik Oqartussat atorfilittaannit sisamanit peqataaffigineqartut. Namminersornerullutik Oqartussat 2007-imut aningaasanut inatsimmi 8 mio. kr.-inik immikkoortitsisimapput IT-mik ineriartortitsinermut atugassanik, 2009-milu kommuninut ataatsimoortumik tapiissutissat isumaqatigiissutigineqarnerannut atatillugu kommunit akuersisimapput 5 mio. kr.-inik akileeqataanissaminnut.
Qarasaasiakkut kiffartuussivimmik pilersitsinissap saniatigut aningaasat taakku atorneqassapputtaaq akissarsialerinermut systemip pisortat ataatsimoorussamik ingerlataata maanna atuuttup taarserneqarnissaanut, taamaalilluni paasissutissanik suliassaqarfinnut tamanut atuuttunik pissarsiniartarneq ajornannginnerulerniassammat, pingaartumik akissarsiat pillugit isumaqatigiinniartarnerni atugassanik. Suliassaq tamanna aamma aqutsisoqatigiinnut taaneqartunut isumagisassanngortinneqarpoq.
Taamatut aaqqissuussisoqarneratigut IT-qarnikkut ataatsimoortumik iliuuseqartarnissaq, taamalu pisortat ataatsimoorussamik systemeqartarnissaat, qulakkeerneqarsinnaavoq.
Suliassat taaneqartut – qarasaasiakkut innuttaasunut kiffartuussiveqalernissap akissarsialerinermullu systemip taarserneqarnissaata – saniatigut pisortat nutaamik økonomisystemeqalernissaannut piareersarneq aallartinneqartariaqarpoq. Økonomisystemit ullumikkut atuuttut paasissutissanik suliassaqarfiit assigiinngitsut politikkikkut allaffissornikkullu aqutsisuisa ineriartornermut malinnaasinneqartuarnissaannut atugassanik ataavartumik aallerfigineqarsinnaanerat ajornakusoorpoq.
