Inuussutissarsiutinut tapiissuteqartarnermik
aaqqissuussinerit il.il.

 

Ukiumi qaangiuttumi aamma inuussutissarsiornermut tunngatillugu maluginiarnartut ilagaat suleqatigiissitat aaqqissuussaanermik iluarsaaqqinnermut atatillugu pilersinneqarsimasut, kiisalu aaqqissuussinerit nutaat arlallit.

 

Inuussutissarsiutinik siuarsaanissamik aaqqissuussinermik nutaamik suliaqarnermut KANUKOKA peqataatinneqarsimavoq. Kommunit aamma Kalaallit Nunaanni Takornariaqarnikkut Inuussutissarsiuteqarnikkullu Siunnersuisoqatigiit (Grønlands Turist- og Erhvervsråd (GTE)) Greenland Venturellu akornanni suleqatigiinnerup sunniuteqarluartumik pisariunngitsumillu aammalu ataatsimik ma­toqarfiusutut tunngaveqartumik aallaaveqarluni pisarnissaanik aaqqissuussineq tamanna isumannaarissaaq.

 

Inuussutissarsiutinik suliffeqarfinni il.il. aningaasaliissuteqarnikkut kommunit inuussutissarsiutit inerikkiartuaartinnissaannut ilapittuinissaannut tunngatillugu Inatsisartut 2007-imi ukiakkut ataatsimiinnerminni unammillernermut inatsimmik nutaamik akuersissuteqarnerat eqqaassallugu pingaaruteqarpoq. Inatsit 1. marsi 2008-mi atuutilerpoq.

 

Suliffeqarfinnut atuisunullu iluaqutaasussamik atuut­sitamik unammillerneq aqqutigalugu isumalluutinik atugaqarnerup inuiaqatigiinnut sunniuteqarluartup siuarsarnissaa inatsisip siunertaraa. Inatsisip makku ilaatigut nassatarai:

 

• Pisortatigut iliuutsinik nalunaaruteqartarnissamut pisussaatitaaneq
• Kommunit inuussutissarsiutinut aningaasaliissuteqarneri sioqqullugit siumoortumik akuersissummik pissarsiniartarnissamut pisussaatitaaneq

 

Nalunaaruteqartarnissamut pisussaatitaanerup nassatarissavaa kommunip inuussutissarsiuteqarfittut suliffeqarfik pillugu iliuuseqaruni imaluunniit aalajangiussaqaruni Unammilleqatigiinnermut Nakkutilliisoqarfimmut tamatuminnga nalunaaruteqarnissaa, tassa inuussutissarsiuteqarfittut suliffeqarfik kommunimit ingerlanneqarpat, imaluunniit suliffeqarfiup ingerlatsisuusup aqutsisuini kommune sinniisoqarpat, aammattaarlu iliuuserisaq unammilleqatigiinnermut pingaaruteqarpat.

 

Inuussutissarsiutinut aningaasaliissuteqarnissaminnik kommunit pilersaaruteqartut aningaasaliissuteqarneq sioqqullugu aningaasaliissuteqarnissamik pilersaarutertik Unammilleqatigiinnermut Nakkutilliisoqarfimmut saqqummiutissavaat, taannalu Unammilleqatigiinermut Nakkutilliisoqarfiup pissutsit ilisimaligai naapertorlugit unammilleqatigiinnermik equngatitsilersunik tapiissuteqartoqannginneranik sioqqutsisumik akuersissuteqarnerminik nalunaaruteqarsinnaavoq.

 

Taamatut suleriaaseqarnissaq kommunit inuussutissarsiutinut aningaasaliissuteqarnertik sioqqullugu allaffissornikkut suliassaasa annerulernissaannik nassataqassagaluarpoq. Taamaakkaluartorli aningaasaliissuteqarneq sioqqullugu unammilleqatigiinnermik malittarisassanut aningaasaliissutaasut naapertuunnerannik sukumiisumik arlaannullu pituttorsiman­ngitsumik naliliiffigineqarnerannik aqqusaagassat isumannaaripput, tamannalu naleqqullunilu tulluarpoq.

 

Suleriaaserli sioqqutsisumik akuersissuteqarnermik pissarsiornermut atatillugu pisussaaffiliisoq pisari­un­ngitsuunngilaq, naak KANUKOKA Namminersornerullutik Oqartussanut erseqqissaasimagaluartoq pisariunngitsumik sukkasuumillu suliarineqarsinnaasumik periaaseqarnissap pingaaruteqarneranik.

 

Malittarisassanik nutaanik isumaginninniarnerminni kommunit siunnersorneqarnissamik aamma ilitsersor­neqarnissamik pisariaqartitsissappata KANUKO­KA-mi siunnersortit tamatumunnga piareersimajumaarput.

 

Aalisarnermut inatsit takornariartitsinerlu
pillugit tusarniaanerit

 

Ukiumi ingerlareersumi aalisarnermut inatsit nutaaq aammalu nuna tamakkerlugu piffissamut 2008-2010-mut takornariaqarnermut periusissaq pillugit Namminersornerullutik Oqartussanit tusarniaaneranni pingaarutilinni marlunni kommunit aamma akuutinneqarsimapput:

Aalisarneq pillugu inatsisartut inatsisissaannut
nutaamut siunnersuut

Aalisarneq pillugu Inatsisartut inatsisaannut nutaamut siunnersuummut atatillugu taamaallaat kommunit arfinillit tusarniaanermut akissuteqaatiminnik saqqummiussaqarput. Tamanna Namminersornerullutik Oqartussanut KANUKOKA-p ajuusaarutigisimavaa, pissutigalugu tusarniaaneq aasami sulinngiffeqarnerup nalaani pisimammat.

 

Naalakkersuisulli 2007-imi ukiaagaa 2008-milu uki­uugaa inatsisissatut siunnersuutip suliarineqarnissaata kinguartinneqarnissaa aalajangiussimavaat, tassalu Inatsisartuni suliarineqarnissaa sioqqullugu sulias­saqarfimmik misissueqqissaartussatut Aalisarneq pil­­lugu Ataatsimiititaliarsuarmik pilersitsisoqassasoq aalajangiunneqarmat.

 

Nuna tamakkerlugu piffissamut 2008-2010-mut
takornariaqarnermut periusissaq

 

Nuna tamakkerlugu piffissamut 2008-2010-mut takornariaqarnermut periusissamik Naalakkersuisut siunnersuutaat kommuninit tapersersorneqarluarpoq.

 

Kommunit isumaqarput attaveqaatinut, ilinniagaqarnernut aamma najugarisani ineriartortitsinissamut tunngatillugu siunnersuutit kommunit takorluugaannut tulluartuusut. Kommunit isumaqarputtaaq aamma periusissap piviusunngortinneqarneratigut takornariaqarneq malunnaatilimmik pitsanngorsaaffigineqarsinnaassasoq inuussutissarsiornermi sukat attassisut ilaattut.

 

Aalisarneq piniarnerlu

 

Piniarneq pillugu isumasioqatigiissitsineq

 

Namminersornerullutik Oqartussat piniarneq pillugu isumasioqatigiissitsinerat 2008-mi februaarimi ingerlanneqartoq Kalaallit Nunaata immikkoortortaani assigiinngitsuni najugarisani inuiaqatigiinni susassaqartunut tamanut oqaaseqarfittut pingaarutilittut atuuppoq. Piniartunut aamma aalisartunut pitsaanerusunik inuunermi atugassarisanut qanoq ililluni suleqatigiinnikkut aaqqiisoqarlunilu suliniuteqarnissamut politikerinut inassutissanik oqaluuserisaqarnissaq saqqummiussaqarnerlu isumasioqatigiinnermi inuppassuit peqataaffigisaanni ilaatigut siunertaapput.

 

Aalisartut aamma piniartut kattuffiannit, KANUKO­KA-mit, Pinngortitaleriffimmit, aammalu Namminersornerullutik Oqartussani immikkoortortaqarfiit attuumassuteqartut sinniisuinit inuttaqartumik suleqatigiissitaliortoqassasoq aalajangiunneqarpoq. Isumasioqatigiinnermi oqaluuserineqartut sammisat inassutigisallu suleqatigiissitat suliareqqissavaat, makku ilanngullugit:

 

-         Najugarisani pissutsit aallaavigalugit isumalluutit uumassusillit nungusaataanngitsumik iluaqutiginiarneqarnissaat aqunneqarnissaallu, tassunga ilanngullugit piniarnerup aalisarnerullu, kiisalu kulturikkut pissutsit iluini kommunerujussuanngortussat malittarisassaanni inatsisit naleqqussarneqar­nissaat.

-         Piniarnerup saniatigut isertitaqarfiusinnaasut allat pitsaanerusumik atorluarniarnissaat.

-         Assersuutigalugu piniarnermut/aali­sarnermut uppernarsaatip pissarsiarinissaanut atugarineranullu naleqqiullugu inatsisit naleqqussarnissaat.

-         Kalaallit Nunaanni Pinngortitaleriffiup aamma kommunit akornanni qanimut oqaloqatigiinnikkut suleqatigiinnikkullu ilisimatusarnikkut misissuinerit pisassapput.

-         Klimap allanngorneranut naleqqussassaagut, aammali klimap allannguutaanit sunnerneqaraluarluta ineriar­toq­­qissaagut!

-         Piniarnermik inuussutissarsiutip inat­si­sitigut illersorneqarnissaa – inatsi­sini piniartup illersorneqarnissaa kissaatigineqarpoq.

-         Avatangiisinik suleqateqarneq.

 

Nunap immikkoortuisa nutaat killeqarfiisa iluini aningaasaqarnikkut sunniivigeqatigiinnermik annertunerusumik pilersitsiniarnikkut najugarisani piniarnermik aalisarnermillu inuussutissarsiutini siuarsaanissaq imminullu nammassinnaasumik ineriartortitsiniarnissaq kommunerujussuanngortussat suliassaattut pissanganartutut KANUKOKA-p isigaa.