Kommunit aningaasaqarnerat 2007
Ukiumut naatsorsuuteqarfiusumut 2007-mut kisitsisit pingaarnerit takutippaat kommunit ataatsimut isigalugit ingerlatsinermut sanaartornermullu qaffasippallaanik missingersuusiorsimasut. Missingersuutit qaffasippallaarutaat Nuup Kommuniani sanaartornermut aningaasaliissutitut inissisimanerupput.
Ukiumut missingersuusiorfiusumut 2007-mut ataatsimut amigartoorutissatut missingersutaasimapput 180 mio. kr., inernerusorlu 98,6 mio. kr.-nik iluanaaruteqarfiulluni, malugiuk tassani Ittoqqortoormiit Qasigiannguillu[1] ilaanngimmata.
Ukioq naatsorsuuteqarfiusoq 2007 kommuninut immikkuullarissuuvoq, tassa kommunit akileraartarnermut tunngasut Namminersornerullutik Oqartussanut tunniuttariaqarsimammatigit. Tamannalu kommunit 2007-imi aningaasaqarniarnerannut malunnaateqartorujussuusimavoq.
Akileraartarnermut suliassaqarfiit qitiusumut nuunneqarnerat kommunit 2007-mi aningaasaqarniarnerannut pitsaanngitsumik attuisimavoq. Kommunit akileraarutitigut isertitatik malinnaaffigisinnaajunnaarsimavaat isertitassanullu eqqortumik missingersuusiornissartik ajornartilerlugu. Ajornartorsiullu taanna ullumikkut suli atuuppoq. Kommunit amerlanerit ukiumut 2007-mut naatsorsuutit akuerisariaqarsimavaat akileraarutitigut isertitat allanngorsinnaaneri eqqummaariffigalugit. Akileraartarnermut Aqutsisoqarfik suli ullumikkumut kisitsisinik eqqortunik tunniussisinnaasimanngilaq.
Akileraartarnermut suliassaqarfiit qitiusumut nuunneqarnerannut atatillugu aningaasat ingerlaarnerat aamma allanngortinneqarpoq kommunit arlallit karsiminnik imaarsisariaqartarsimamammata kassekreditilu atorlugu ingerlatsinermut aningaasartuutit ilaat matussusertariaqartarsimallugit.
Ataatsimoortumik tapiissutissat 2009
KANUKOKA-p 2008-p aasaanerani 2009-mut kommuninut ataatsimoortumik tapiissutissat isumaqatigiissutigai, inerneralugit ataatsimoortumik tapiissutit 2008-mi isumaqatigiissutaasumut naleqqiullugit 52,9 mio. kr.-nik amerlanerusut, katillutik 830,6 mio. kr.-iullutik.
Naalakkersuisut aningaasanut inatsisissatut siunnersuumminni 2004-mi aningaasaliissutinik allannguineq aallartippaat immikkut ilinniartitaanermut suliffeqarniarnermullu aningaasaliiniarlutik. Kommunillu suliniummut ukioq 2009-miit 77,7 mio. kr.-nik aningaasaleeqataapput.
Ataatsimoortumik tapiissutinut tunngaviusoq 660,9 mio. kr. akitigut akissarsiatigullu iluarsiivigineqarpoq 5,04 %-imik, taannalu 2009-mi 33,3 mio. kr.-uvoq.
Nalinginnaasumik isumaqatigiissutaasartut saniatigut ukioq manna isumaqatigiissutaavoq Aaqqissuussaanermik iluarsaaqqinnermut atatillugu suliassaqarfinnik aningaasartaannillu Namminersornerullutik Oqartussanit kommuninut nuussinermut atatillugu illua’tungeriit isumaqatigiissummut ilassutitut isumaqatigiissusiorsinnaasut.
Akileraartarneq
Akileraaruserinerup kommuninit ingerlanneqarunnaarluni Namminersornerullutik Oqartussanit qitiusumik ingerlanneqalernera kommuninut ajorluinnartunik kinguneqarpoq. 2006-imut 2007-imullu naatsorsuutit naammassisinnaajumallugit suliassaqarfik pillugu paasissutissanik kommunit maannamut pissarsisinnaannginnerat akuerineqarsinnaanngivippoq. Qularnanngitsumillu maanna kommuniusut naatsorsuutaasa akileraartarnermut tunngasutigut paasissutissanik nutaanik ilallugit naammassiniarnissaat ajornartorsiutaalerumaarpoq.
A conto-mik akiliigallartarnerit ingerlaavartut kommunit ataasiakkaat akileraarutitigut isertitaannut naapertuutinngilluinnarput. Kommunit Akileraartarnermut Pisortaqarfimmut maannalu Akileraartarnermut Aqutsisoqarfimmut arlaleriarlutik saaffiginnittarsimagaluarput, iluaqutaanngitsumilli.
KANUKOKA-p siulittaasuata aningaasaqarnermut naalakkersuisoq saaffigisimavaa ajornartorsiutip piaarnerpaamik iluarsineqarnissaanik qinnuigalugu.
Qitiusumut eqiterinerup allaffissornerup pitsaanerulernissaanik siunertaqaraluartup kommunit ataasiakkaat aningaasaqarnikkut inissisimanerisa paatsiveerunneqarnerannik kinguneqarnera akuersaarneqarsinnaanngilaq.
Akiliisitsiniartarneq
Akiliisitsiniartarnerup qitiusumik ingerlanneqalernera kommunit isumakulunnartoqartippaat. Suliassaqarfiup iliuuseqarfiujunnaarsimagunarnera kommuninit ataasiakkaanit maalaarutigineqarpoq. Akuerineqarsinnaanngilluinnarporlu akiliitsitsiniarnerup unittooqqaneratigut kommunit erniatigut annaasaqartuartariaqalernerat.
Namminersornerullutik Oqartussat suliassaqarfiit tigusimasamik kivinnissaannut piumassuseqarnerminnik takutitsisimannginnerat kattuffiup siulersuisuisa naammaginartinngilluinnarpaat. Suliassaqarfinnik qitiusumut nuussinerup tamatuma takutippaa akileraarutit akiliisitsiniartarnerullu tungaatigut innuttaasunik kiffartuussinerup Namminersornerullutik Oqartussaniitinnissaa ilumut tulluartuunersoq apeqquterujussuusoq.
[1] Kommuninut taakkununnga naatsorsuutit matuma allanneqarnerata naanerani tiguneqarsimanngillat.
