Naalakkersuisoqarfik peqatigalugu
Inniartitsisunik amigaateqarneq misissorniarlugu suleqatigiissitap inassuteqaatai aallaavigalugit sulineq ukiup ingerlanerani ingerlanneqarpoq. Iliuuseqarfigisassatut siunniunneqartut pingaarnerit ilagaat ungasianiit atuartitsinerup pimoorussaasumik iliuuseqarfigineqarnissaa. Tamanna tunngavigalugu assigiinngitsutigut periarfissarsiorneq maannakkut Kulturimut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmiit (KIIIN) ingerlanneqarpoq.
Ilinniartitsisunik nunatta avataaneersunik sulisussarsiortarnerup pitsaanerusumik aaqqissuussaanissaa siunertaralugu KIIIN, KANUKOKA kiisalu ilinniartitsisut kattuffiat IMAK suleqatigiillutik iliuuseqarnissamik pilersaaruteqarput. Tamanna ukioq mannamiit iliuuseqarfigineqalissasoq pilersaarutaavoq. Siornatigut nunatsinnut suliartortussat katersuutsinneqartarnerat siunnerfigineqarsinnaasut ilaattut isigineqarpoq aammalu nittartagaq aqqutigalugu paasissutissat qallunaatut tuluttullu oqaasertallit katersuuffeqarnissaat suliarineqarluni. Nunaqarfinni ilinniartitsisunut illussaqarniarnikkut inissisimaneq ilanngullugu misissuiffigineqarpoq.
Inerisaavik peqatigalugu
Atuarfiit pisortaasa quppersagaata elektroniskiusumik ujarlerfiusinnaalernissaa siunertaralugu suleqatigiit ingerlapput suliallu piariingajalerlutik.
Isumaqatigiinniartarfik IMAK-ilu peqatigalugit
Meeqqat atuarfianni inaarutaasumik naliliineq pillugu Namminersornerullutik Oqartussat nalunaarutaata nr. 12, 27. juuni 2007-imeersup, 1. aggusti 2007 atuutilersup, kingunerisaanik kommunit aningaasartuuteqarnerulernerat pillugu KANUKOKA-miit Namminersornerullutik Oqartussat peqatigalugit IMAK isumaqatiginiarneqarpoq. Illua’tungeriit isumaqatigiissutigaat faginut tamanut tiimi ataaseq tunniunneqartassasoq, aammalu ilinniartitsisunut tiimit fagini tamani inaarutaasumik misilitsinnermut atatillugu 1. aggusti tunniunneqareersut misilitsitsissutaajunnaartussanngornerisa nalunarunnaarnerisigut atuartumut nal. ak. ataatsip nalingata affaa ilinniartitsisumut suliakkiuteqarnikkut atorluarneqartassasoq. KANUKOKA-miit ilanngullugu piumasaraarput isumaqatigiinniarnissani tullerni oqaluttarissanik misilitsittarneq sammineqaqqissasoq.
Tamanna pigaluartoq kommuninut aningaasartuuteqarneruneq pisussaammat ataatsimoortumik ani-ngaasaliissutit aqqutigalugit KANUKOKA-miit Namminersornerullutik Oqartussat aningaasartuu-taanerusunut matussusiinissaat isumaqatigiissutigineqarpoq. 2007/2008-mut aningaasartuuteqarnerunermut matussutissatut 2009-imilu aningaasartuutanerujumaartussat ilanngullugit aningaasat katillugit 5.062.000 kr.-it isumaqatigiissutigineqarput.
Kommunit atuarfinni sulinissamut takkuttarnissamullu pilersaarutinik isumaqatigiissutit malillugit ingerlatsisimanngitsut sinnerlugit Namminersornerullutik Oqartussat KANUKOKA-mit peqataaffi-gisatsinnik aamma isumaqatiginninniussutigineqarput. IMAK-imit aallaqqaammut aningaasat katil-lugit 400.000 kr.-it akiliisitsissutigineqarnissaat piumasarineqarpoq. Isumaqatigiinniarnerit inerne-raat kommunit katillugit 175.000 kr.-inik akiliisussanngortitaanerat.
Ilanngullugu isumaqatigiissutigineqarpoq Namminersornerullutik Oqartussat, IMAK-ip KANUKOKA-llu suleqatigiiffigisaannik pisortanngortartut pisortaasullu pikkorissartinneqartarnissaat aallartinneqassasoq.
Kombinationsaftalep kommuninut atussallugu pisariinnerulernissaa siunertaralugu KANUKOKA/Namminersornerullutik Oqartussat aamma IMAK piffissami kingullermi isumaqatigiinniarnerit ingerlappaat.
Piareersarfinni sulisut
Inuutissarsiornermut, Suliffeqarnermut Inuussutissarsiutinullu Ilinniartitaanermut Aqutsisoqarfiup (ISIIA) ataani Piareersarfinnut tunngassuteqartunut suleqatigiissitamut KANUKOKA peqataavoq. Tassani paasissutisseeqatigiinneq allanillu Piareersarfinnut tunngasunik eqqumaffigisassanik oqaloqatigiinneq ingerlanneqartarpoq.
Tamatuma saniatigut aamma KANUKOKA suleqatigiissitannguamik kommunini Piareersarfinnut atatillugu pisortaasunit tallimanit ilaaffigineqartumik ingerlataqarpoq.
Suleqatigiissitap attaveqaqatigiilluarnissaq KANUKOKA-mullu immersueqataanissaq siunertaraa. Namminersornerullutik Oqartussaniit Piareersarfinnut kiffartuussinikkut isumaqatigiissusiorneq, servicekontraktiliorneq, peqataaffigineqartarpoq. KANUKOKA-miit servicekontraktinut taarsiullugu peqqussusiornikkut taassumalu malitsigisaanik nalunaarutit aqqutigalugit pisariinnerusumik ingerlatsilersoqarsinnaanera Namminersornerullutik Oqartussanut kissaatigisatut saqqummiussimavarput. Tamanna ISIIA-p tungaaniit tunuarsimaarfigineqarallarpoq.
Tabulex Inerisaavillu peqatigalugit
Allaffissornikkut oqinnerusumik atuarfeqarfinni ingerlatsilernissaq siunertaralugu Tabulex ukiualuit matuma siornatigut isumaqatigiissuteqarfigineqarpoq. Suleqatigiinnerup nukittunerulernissaa siu-nertaralugu maannakkut suleqatigiissitamik ingerlatsivugut. Tassani peqataapput Inerisaavik, KIIIN atuarfeqarfinneersullu pingasut.
Attaveqaatitigut ajornartorsiuteqarneq pissutaalluni aammalu Tabuleximik atuinissamut pikkorissarnikkut atorfimmut allamut nuuttarneri pissutigalugit ajornartorsiutit assigiinngitsut piusut qanoq anigorniarneqarsinnaaneri oqaloqatigiissutigineqarlutillu iliuuseqarfiginiarneqarput. Kommunit nutaat piulersussat eqqarsaatigalugit naleqqussaaneq aamma aasap ingerlanerani aallartinneqarpoq.
Marsi 2007 KANUKOKA Tabulex peqatigalugu atuisunut superbrugerinut pikkorissartitsivoq.
PPR-inut atatillugu
Perorsaanikkut tarnillu pissusiisigut siunnersuisarfiit (PPR) kommuninit tiguneqareersimasut nunallu immikoortortaani PPR-it Namminersornerullutik Oqartussat ataanniittut isumasioqatigiinnerat ataatsimeeqatigiinnerilu marluk ukiup ingerlanerani peqataaffigineqarput. PPR-it kommuninit tiguneqarnissaat soqutigineqarluni tamanit suleqataaffigilluarneqarlunilu isummersorfigineqarluartoq malunnarpoq.
Kommunit kattunnissaat
Kommunit kattunnissaat siunertaralugu KANUKOKA marsi 2007 ingerlatsiviit atuarfiillu pisortaannik suliutigaluni isumasioqatigiinnermik ingerlatsivoq.
