Kommuneingeniørit ataatsimiinnerat marsi 2007
Pikkorissaatigaluni isumasioqatigiinnermi Sanaartornermik Ilinniarfimmi Sisimiuni ingerlanneqartumi pingaarnertut qulequtaavoq Issittumi aqqusineqarneq. Ataatsimiinnertaviani sammineqarput Dancea-mit aningaasaliissutit atorlugit avatangiisinut suliniutit, eqqakkat pillugit iliuusissanik pilersaarutit, saviminikulerineq, imeq pillugu paasissutissiisarneq, Kalaallit Nunaanni nutarsaavik, kommunit sanatitsisuusarnerat, imikoq pillugu inatsiseqarneq, nuna tamakkerlugu pilersaarusiorneq, kiffartuussinernik assigiissaarineq, Namminersornerullutik Oqartussat suliassaqarfiisa ilaannik tigusinissaq, inissiaateqarfik INI kiisalu Nukissiorfiit.
Inunnik nalunaarsuisarnermut pikkorissarneq marsi 2007
Inunnik nalunaarsuisarnermut / CPR-eqarnermut inatsisit allannguuteqarnerat pissutigalugu KANUKOKA aamma Nunani Namminermi Pissutsinut Allaffeqarfik Nuummi pikkorissartitsipput kommunini inunnik nalunaarsuiffinni sulisunut. Inatsit nalunaarsuisarnerlu oqalugiaatigineqarput qarasaasiarlu atorlugu misissuataarneqarlutik. Danmarkimi CPR-registerimeersut ilinniartitsisuupput, taamatuttaarlu Akileraartarnermut Pisortaqarfik aamma Nunatta Toqqorsivia saqqummiussaqarlutik.
Atuarfiit ingerlanneqarneranni programmi
Tabulex pillugu pikkorissarneq marsi 2007
KANUKOKA Tabulex peqatigalugu atuisunut superbrugerinut pikkorissartitsivoq. Allaffissornikkut oqinnerusumik atuarfeqarfinni ingerlatsilernissaq siunertaralugu qarasaasiakkut programmip Tabulexip atorneqarnissaa pillugu ukiualuit matuma siornatigut isumaqatigiissuteqartoqarpoq. Suleqatigiinnerup nukittunerulernissaa siunertaralugu maannakkut suleqatigiissitamik ingerlatsisoqarpoq. Tassani peqataapput Inerisaavik, KIIIN atuarfeqarfinneersullu pingasut. Attaveqaatitigut ajornartorsiuteqarneq pissutaalluni aammalu Tabuleximik atuinissamut pikkorissarsimasut atorfimmut allamut nuuttarneri pissutigalugit ajornartorsiutit assigiinngitsut iliuuseqarfiginiarneqarput.
Kommunit kattunnissaat pillugu atuarfinni
pisortat isumasioqatigiinnerat marsi 2007
Kommunit kattunnissaat siunertaralugu KANUKOKA marsi 2007 ingerlatsiviit atuarfiillu pisortaannik suliutigaluni isumasioqatigiinnermik ingerlatsivoq.
Aningaasaqarnermi pisortat
isumasioqatigiinnerat apriili 2007
Sammisat: Kiffartuussinerup assigiissarneqarnissaani økonomichefit suliassaat, suleriaasissanik piffissanillu pilersaarusiat, killiffiit pingaaruteqartut, politikkikkut allaffissornikkullu suliassat, ingerlatsiviit nutaat aaqqissuunnissaat, aningaasatigut aqutseriaatsit, mianersorfissat, kiffartuussinernik assigiissaarinermik piviusunngortitsineq, suliaq qanoq aallartinneqassanersoq, nalilersuineq kisitsisinillu najoqqutassiorneq kiisalu isumaginninnermi utoqqarnillu isumaginninnermi kiffartuussinernik assigiissaarinissaq. Ataatsimiinneq Nuummi pivoq.
Utoqqaat illuini pisortat angerlarsimaffinnilu ikiortit pisortaasa isumasioqatigiinnerat maaji 2007
Sisimiuni ataatsimiinnermi qulequtaq pingaarneq tassaavoq utoqqaat isumagineqarnerat, utoqqaat illuini, plejehjemini utoqqaallu namminneq angerlarsimaffiini sullissinerit tunngavigalugit. Sammisat tassaapput utoqqarnik sullissinermi malittarisassat aamma kommunit kattunnissaannut atatillugu utoqqarnik isumaginninnerup piareersarneqarnissaa oqallisigineqarneralu. Saqqummiussisuupput isumaginninnermi siunnersortinngorniat ilinniarfiat ISI, perorsaanermik ilinniarfik SPS, siunnersortit demensimik paasisimasallit marluk Danmarkimeersut kiisalu Qaqortumi Sisimiunilu sulisut.
Isumaginninnermi pisortat
isumasioqatigiinnerat septembari 2007
Qulequtaq pingaarneq tassaavoq Aaqqissuussaanermut Isumalioqatigiissitat inassutaat naapertorlugu isumaginninnermi peqqinnissamilu kiffartuussinerit assigiissarneqarnissaat. KANUKOKA-p najoqqutassiai oqaluuserineqarput, soorlu sulisoqarnikkut allaffissornikkullu suliassanut tunngasortaat. Ataatsimiinneq Københavnimi pivoq. Taamaalilluni sammisat ilagaat ”Ilaqutariinneq qitiutillugu”, tassa Københavnip kommuniata ilaqutariinnik katsorsaasarnermut atatillugu ulluunerani pisartussatut neqeroorutaa.
Borgmesterit kommunaldirektørillu
ataatsimiinnerat oktobari 2007
Nuummi ataatsimiinnermi pingaarnertut qulequtaavoq kommunit kattunnissaannut piareersarnerup killiffia. Tamatuma saniatigut KIT aamma Kimik IT saqqummiussaqarput kommunit siunissami IT-mik atuinissaat pillugu, Naalakkersuisullu allattoqarfiat kommunini aqutsinermut inatsisitaassaq, aaqqissuussaanermik iluarsaaqqinnissaq pillugu immikkut inatsisiliassaq, sumiiffinni siunnersuisoqatigeeqarneq pillugu aalajangigassaq kiisalu pisortat kiffartuussinerat IT-qarnerallu pillugu saqqummiussilluni. Aamma Alcoa-p suliniutaa pillugu Greenland Developmentimit saqqummiussisoqarpoq.
Sulisoqarnermi pisortat isumasioqatigiinnerat pikkorissarfiuutigisoq novembari 2007
Sulisoqarnermi allaffissornikkut suleriaatsit saniatigut Kangerlussuarmi ataatsimiinnermi pingaarnertut qulequtaavoq Aaqqissuussaanermik iluarsaaqqinnissaq pillugu isumaliutissiissummi sulisoqarneq pillugu inassuteqaatit naapertorlugit suliap killiffia. Sammisat allat: Atorfiit naleqquttut, atorfeqarfimmut allamut nuutsinneqarneq, sulisoqarneq pillugu suleqatigiissitat Namminersornerullutik Oqartussat pilersitaat, kommunit aaqqissuussaanerannik iluarsaaqqinnissamik Inatsisartut inatsisiliaat suliassaalerumaartussallu.
Ulluunerani paaqqinnittarfinni pisortat
pikkorissarnerat februaari 2008
Sisimiut Kommuniata kissaateqarneratigut KANUKOKA pikkorissartitsivoq ulluunerani aamma ulloq unnuarlu paaqqinnittarfinni pisortanik 40 missaanniittunik, siunertaralugu atorfinitsitsisarnerni suleriaatsinik assigiiaarnerusunik pilersitsinissaq, sulisunik atatitsiniarnermi minnerunngitsumillu sulisut soraartarnerini. Sammisat tassaanerupput atorfinnik suliassartaannillu nassuiaasiortarneq, atorfinnik inuttassarsiuisarneq, atorfininniartunik oqaloqatiginnittarneq, aalajangeeqataasinnaaneq/sullisseqataasinnaaneq (habilitet), pineqaatissinneqarsimanermut allagartat aamma pisortat sullissinerat pillugu inatsit.
Borgmesterit kommunaldirektørillu
ataatsimiinnerat februaari 2008
Kommunit aamma Namminersornerullutik Oqartussat ataatsimeeqatigiinnerat suliassaqarfiit Namminersornerullutik Oqartussanit kommuninut nuunneqarsinnaasut qulaajarneqarnerat killiffissiorlugu. Qulaajaaneq 2007-imi qaammatini kingullerni 2008-milu qaammatini siullerni ingerlanneqarsimavoq, oqallisigineqartullu tassaapput suliassaqarfinnik ataasiakkaanik misissuereernikkut inerniliigallarnerit inassuteqaatillu.
Aningaasaqarnermi pisortat
isumasioqatigiinnerat marsi 2008
Nuummi ataatsimiinnermi pingaarnertut qulequtaavoq budgetiliorneq, naatsorsuutinik inaarineq aamma kommunit kattunnissaannut atatillugu suliassaqarfinnik nuussinissaq. Ulluni siullerni marlunni Kommunernes Revision-imit ilinniartitsisoqarluni pikkorissartitsisoqarpoq aningaasaqarnermik ingerlatsiviit kommunit kattunnissaanni suliassaat pillugit. Ullut pingajuanni sammineqarpoq kommuninut ataatsimoortumik tapiissuteqartarnermi naligiissaarisarnermilu nutaamik periaaseqalernissaq.
Qimmeqarnermik nakkutilliisut pikkorissarnerat isumasioqatigiiffiuutigisoq maaji 2008
Sisimiuni pikkorissarnermi Namminersornerullutik Oqartussat suleqatigalugit ingerlanneqartumi siunertaavoq qimuttunik qimmerpassuaqarfiusuni kommunit nakkutilliisuutitaasa ilisimasassanik tuniorarnissaat kajumissaarneqarnissaallu – taamaalillutillu aamma qimminik paarsinerluttarnerup pinaveersaartinneqarnerani peqataanissaat. Sammineqartut ilagaat qimuttunik qimmeqarnermut uumasunillu illersuinissamut inatsisit aammalu qimmeqarneq pillugu kommunini ileqqoreqqusat, kiisalu uumasut nakorsaasa, qimmeqarnermik nakkutilliisut qimmillillu suleqatigiinnerat.
Politikerit pikkorissarnerat upernaaq/ukiaq 2008
Ikaarsaariarnermi ataatsimiititaliani ilaasortanut pikkorissartitsineq immikkoortoq siulleq maajimi juunimilu ingerlanneqarpoq ikaarsaariarnermi ataatsimiitaliat maanna kommunalbestyrelsiusunut sanilliullutik suliassaat oqartussaaffiilu samminerullugit. Qulequttat allat tassaapput sumiiffinni oqartussaaqataaneq aqutseriaatsillu nutaat pillugit paasissutissiineq. Immikkoortup aappaa ukiaru ingerlanneqassaaq kommunini aqutsinermut inatsit nutaaq kommunillu inuussutissarsiornermut aningaasaliinissamut periarfissaat sammineqassallutik.
Aallartitat nutaat paasissutissiiffiusumik
ataatsimiitinneqarnerat maaji 2008
Kommuninut nutaanut ikaarsaarialernermi pissutsit immikkut ittut atuunnerat pissutigalugu KANUKOKA-p siulersuisuisa kissaatigisimavaat Nuummi taamatut ataatsimiititsisoqassasoq KANUKOKA-p malittarisassai, suliassai aaqqissuussaaneralu pillugit. Tamanna iluatsillugu aamma sammineqarput maanna kommunini aqutseriaatsit atorneqartut aqutseriaasiusinnaasullu allat. Ataatsimiinneq taamaalilluni septembarimi aallartitat ataatsimiinnissaannut piareersarfiuvoq.
Isumaginninnermi pisortat isumasioqatigiinnerat maaji 2008
Aalborgimi ataatsimiinnermi pingaarnertut qulequtaavoq kommunit kattunnissaanni isumaginninnermi kiffartuussinerit assigiissarneqarnissaata suliassaqarfinnillu Namminersornerullutik Oqartussanit kommuninut nuussinissap piareersarneqarnerisa killiffiat. Sammisat allat ilaatigut tassaapput Qaqiffimmi katsorsaasarneq, Isumaginninnikkut Maalaaruteqartarfiup suliarisimasai, kommunini isumaginninnermi najoqqutassiat kiisalu pitsaaliuineq.
