KANUKOKA-mit matumuuna nuannaarutigalugu aallartitat ataatsimiinnissaannut 24. aamma 25. septembari 2008 Ilulissani pisussamut tikilluaqquatsigit. Ataatsimiinnissaq ulluni taakkunani marlunni Kulturip illorsuani Sermermiuni ingerlanneqassaaq. Eqimattakkaarluni ataatsimiinnissat Hotel Arctic-imi pisassapput. Ataatsimiinnissaq aallartissaaq septembarip 24-ani nal. 09.00, septembarillu 25-ani naammassineqassalluni unnukkut nereqatigiinnermik. Ullup qeqqanut unnukkullu nerisarnissat hotelimi pisassapput nerisarniarlutik nalunaarsimasunut.
"Aallartitat quppersagaanni" uani ataatsimiinnissaq qaammammik ataatsimik sioqqullugu nassiunneqartumi ataatsimiinnermi tunngavissat pingaarnerit atuarneqarsinnaapput: Oqaluuserisassat allattorsimaffiat, siulersuisut allakkatigut nalunaarutaat, oqaluuserisassatut siunnersuutit, naatsorsuutit missingersuutillu. Aamma KANUKOKA-p malittarisassai quppernerni kingullerniipput aallartitat ataatsimeeqataasussallu allat aallartitat ataatsimiittarnerinut, aallartitanut kattuffiullu siulersorneqarneranut maleruagassanik paasiniaasinnaaniassammata.
Paasissutissat tamakkua saniatigut ilaatigut aallartitat ataatsimeeqataasussallu allattorsimaffiinik iluarsisanik nittartagaq www.kanukoka.gl aqqutigalugu saqqummiussuisoqassaaq.
Bussinik angallassinissaq
Hotel Arctic-imit Sermermiunut angallassisoqartassaaq ataatsimiinnerit aallartinnissaat nal. ak. affaanik sioqqullugit aammalu ullup qeqqasiulernerni utimut.
Qaaqqusat alaatsinaattullu
¨ Qaaqqusat alaatsinaattullu nammineq ineqarnertik nerisaqarnertillu akilissavaat.
¨ Ullup qeqqasiornermi unnukkulluunniit nereqatigiinnerni peqataasarniartut hotelimut tamanna nalunaarutigissavaat kingusinnerpaamik ulloq 15. septembari. E-mail conference@hotel-arctic.gl, tlf. 94 41 53 (Hansinannguaq Magnussen).
¨ Ullup qeqqasiornernut unnukkorsiornermullu ilaavoq viinni imertarfik ataaseq / immiaaraq sodavandiluunniit.
¨ Erseqqissaatigerusupparput akunnittarfimmut akiligassat aallannginnermi isumagineqartassammata.
Ilisarnaatit kapputtartut
Ilisarnaatit kapputtartut ataatsimeeqataasut aqqinik allagartallit ataatsimiissutissanut ilanngullugit nassiunneqarput. Ilisarnaatit ulluni taakkunani marlunni atoqquneqarput.
Attaveqarfissaq
Direktionssekretær Inger Heilmann Larsen KANUKOKA sinnerlugu aaqqissuisuusoq telefon 36 21 00-imi imaluunniit toqqaannartumik 36 21 02-mi attavigineqarsinnaavoq. Ilulissani ataatsimiinnerup nalaani KANUKOKA-p allattoqarfia mobiltelefon 48 21 10 atorlugu attavigineqarsinnaavoq. Ataatsimiilluarisi!
