|
10. septembari 2003 "Kommunit siunissami aaqqissuussaanissaat" pillugu borgmesterit kommunaldirektørillu Qaqortumi ulluni 9. aamma 10. septembari oqallinneranni isumaqatigiissutigineqarpoq iliuusissaq tulliuttoq Namminersornerullutik Oqartussat iliuuserissagaat kommunit aaqqissuussaanerat pillugu kommissioniliornermikkut. Kommunit ingerlatsinikkut suleqatigiinnerulernissaat imaluunniit kommunit kattussinnaanerat ajornannginnerusumik pisinnaaqqullugu inatsisitigut tunngavissanik qanorlu aaqqissuussinissamik siunnersuusiornissaq ataatsimiititaliarsuup suliarissavaa. Ullormi ataatsimiiffiusumi siullermi borgmesterit tamarmik periarfissinneqarput "siunissami kommunit aaqqissuussanissaat" pillugu takorluukkaminnik saqqummiussinissaminnut. Isummat tunngavilersuutillu assigiinngisitaartut qaffakaatinneqarput. Ilaasa maanna kommuninik kattussuinissaq akerleraat, kisiannili suleqatigiissuteqarsinnaaneq ammaffigalugu. Allat erseqqissaapput kommunit qanitariillutik arlalitsigut ingerlatseqatigiinnissartik piviusumik pilersaarusiulereersimallugu, kisiannili kattussinnaanissartik suli eqqartornagu. Kommunimit ataatsimit saqqummiussisoqarpoq nunap immikkoortuani kommunit kattunneqarneratigut qanoq aaqqissuussisoqarsinnaaneranik. Tamanilli erseqqissarneqarpoq qitiusumiit naalakkiuteqarnikkut kattussuisoqassanngitsoq. Iliuuseq taamaattoq nammineq piumassutsimik pissaaq, kommunit inuisalu kissaateqarneratigut. Inuit najukkaminni oqartussaaqataanerat innarlerneqassanngilaq. Tamatuma peqatigisaanik uparuarneqarpoq kommunini ingerlatsiviit ilaasa kattunnissaannut imaluunniit kommunit kattunnissaannut inatsisitigut tunngavissaqannginnera. Taamaattumik naalakkersuisut qinnuigineqassapput iliuuseriumaagassanut tamakkununnga inatsisitigut pisariaqartunik sinaakkutissaliiniaqqullugit. Namminersorneq pillugu Isumalioqatigiissitat siulittaasuat Jakob Janussen isumalioqatigiissitat isumaliutissiissutaata kommunit aaqqissuussaanerannut tunngasortaanik nassuiaateqarpoq. Danmarkimi kommunit kattuffianni siunnersorti Hanne Borchersen Danmarkimi kommunit kattussuunneqartarneranni misilittakkanik nassuiaateqarpoq. Ilaatigut oqarpoq kattussiniarnermi misissueqqissaarnermiit kattussinissap tungaanut ukiut 3½ atorneqarsinnaasartut. Misilittakkat malissagaanni nukingiussisoqartassanngilaq. Aappaatigulli aamma kattussiniarneq sivisunaarneqartassanngilaq, sivisuallaamik ikaarsaariarfimmiinneq ajoqutaaginnartarmat. Kommunit aaqqissuussaanerat pillugu oqallinnermi saqqummiussat sap. ak. 38-mi nittartakkakkut saqqummiunneqassapput. |
