|
Tamassi tikilluaritsi qujanarlu takkukkassi – borgmesterit kommunaldirektørillu, kommuneqarfiit kattuffianni siulersuisut, qaaqqusat alaatsinaattullu soqutiginnillutik ataatsimiinnermi maani malinnaajartortut. Immikkullu taarusuppara Narsami borgmesteriusimasoq aammalu kommuneqarfiit kattuffiata aallartinneraniilli siulersuisooqataasarsimasoq Agnethe Nielsen aamma qaaqqusatut najuummat. Ingerlaqqitsinnata eqqaasariaqartippara maani Qaqortumi ukiorpassuarni borgmesteriusimasoq, Henrik Lund, Aqqalooraq, toqummat. Minutsimi ataatsimi nipaallisimalluta Aqqalooraq eqqaaniartigu…. … Henrik Lundip eqqaaneqarnera ataqqinartuuli. Soorlu ataatsimiinnermi matumani oqaluuserisassani takuneqarsinnaasoq, qulequtaq pingaarneq tassaasussaavoq ”siunissami kommunit aaqqissuussaanissaat”. Borgmesterit tamarmik immikkut periarfissaqassapput qulequtaq pillugu takorluukkaminnik saqqummiussaqarnissaminnut. Aammalu Namminersorneq pillugu Isumalioqatigiissitat siunissami kommunit qanoq aaqqissuussaanissaannik isumaliutaat tusassavavut. Allat misilittagaannik tusarnissaq silattuallaataasinnaasarmat - toqqaannartumik toqqaannanngitsumilluunniit atorneqarsinnaasunik - Danmarkimi kommuneqarfiit kattuffianneersumik tikeraartoqarpugut tappavani kommuninik kattussuisarnerni misilittagaalersunik paasissutissiisussamik. Tamakku pereerpata eqikkaassutaasumik oqallittoqassaaq. Uanga kommuneqarfiit kattuffianni siulittaasutut upernassaq saqqummiussaqarpunga kommunit qanoq kattussuunneqarsinnaanerat pillugu oqallissaarummik, soorunami aaqqiissutissanut aalajangersimasunut pituttoriinngikkaluarlunga. Isumaqarpunga maanna isumatuumik, erseqqissumik siumullu isigisumik eqqarsarnissaq pisariaqartoq. Ingerlaqqinnissami suut pingaartinneqassappat? Piffissaq qanoq sivisutigisoq aaqqissuussinissarsuarmi atorneqassava? Innuttaasut qanoq ililluni peqataatinneqassappat? Tusarniaasoqassava? Inatsisitigut tunngavissat periarfissallu qanoq qaqugulu suliarineqassappat? Namminersulernissaq pillugu ataatsimeersuarnissamut kommuneqarfiit kattuffiat sinnerlugu saqqummiussassanni assersuutitut taavara Kaassassuk "alliseequtiminik" piiaanermigut siumut ingerlaqqissinnaanngorsimasoq pissarsuanngorlunilu. Taamattaaq uagut inuiaqatigiit aaqqissuussaaneranni "alliseequtitsinnik" - tassa aaqqissuussinernik kigaalaqutaasunik - piiaallutalu iluarsaassisinnaasariaqarpugut nukivut pitsaanerusumik atorsinnaalerniassagatsigit innuttaaqatigiit toqqissisimanartumik ingerlanissaannut namminersornermillu peqqinnartumik angusaqarniarnissamut. Tamakku oqallisilerutta itisilerusunnarput. Kisianni borgmesteriniit aallartikkallarta. Tikilluaqqoqqippassi - neriuppunga ullut tulliuttut inerititaqalerfiusumik oqalliffiujumaartut. |
