|
Nunaqarfinnik matoorinissamut naagga, kommunit inuutissarsiornermi akuunerunissaannut aap, allaffissornikkut pisariillisaanissamut aap. Tassa taannarineqartut pingaarnerit ilaat borgmesterit kommunaldirektørillu Islandimi 2. – 7. septembari ataatsimiinneranni oqallittoqarmat. Oqallinnermi aallarniisuupput Arborgimi borgmesteri Einar Njalsson, Kanukokap siulittaasua Jens Lars Fleischer, inatsisartuni ilaasortaq Islandimiullu Nordisk Rådimut aallartitaanni siulittaasoq Isolfur Gylfi Palmason kiisalu Sisimiuni borgmesteri Hermann Berthelsen. Oqallinneq borgmesterinit kommunaldirektørinillu peqataaffigineqarluarpoq, taamalu ullutsinni oqallisaasut pingaartitat – kommunit inuutissarsiornermi peqataasinnaanerat nunaqarfiillu siunissaat – erseqqissumik isummersorfigineqarput. Kommunit aallartisaasuussapput Ullormut oqaluuserisassat immikkoortuat taanna qulequtaqarpoq ”Kommunit inuutissarsiornermi peqataanissaannut periarfissat”. Tassani borgmester Einar Njalsson oqaluttuarpoq Islandimi kommunit inuutissarsiornermi peqataasorujussuusimagaluartut. Kisiannili 1980-ikkunni kommunit aningaasarpassuarnik annaasaqarput qularnaveeqqusiisarsimanermikkut. Tamatumalu kingunerisaanik periaatsiminnik allanngortitsipput ullumikkut inuutissarsiornermi peqataanerat tassaanerulerluni aningaasaateqarfiit investeringsfondit atorlugit tapersersuineq aammalu atortorissaarutitigut tunngavissanik pilersitsisarneq. Islandimiut inatsisartuini Altingimi ilaasortaq Isolfur Gylfi Palmason – aamma borgmesteriusimasoq – misilittakkani innersuussutigalugit oqarpoq kommune aallartisaasutuinnaq inuutissarsiornermi atorneqartariaqartoq. Borgmesterit kommunaldirektørillu nunatsinneersut akornanni isuma una nalinginnaavoq: Kommunit ”ernisussiortutut” aningaasaleeqqaartussatullu atorfissaqartinneqarnerat angeqaaq. Illoqarfiit annerit avataanni aningaaseriviit annikitsuinnarnik taarsigassarsisitsisarmata kommunit sassartariaqarput aningaasanik kaaviiaartitsineq aallartinniarlugu. Nunaqarfiit ataannarlit Jens Lars Fleischerip ataatsimeeqataasunut apeqqutigaa kommunit ilaasa aalajangersimasut immikkut ineriartortitsivigineqarnissaat qanoq igineqarnersoq. Apeqqut tamanna isummanik erseqqissaanermik kinguneqarpoq. Nunaqarfinnik matoorisinnaanermik isuma erseqqissumik akerlerineqarpoq. Kanukokami siulittaasup tullia Kalistat Lund oqarpoq naleqqutinngivissoq nunaqarfinnik matoorinissaq qitiusumik oqartussaasunit qulaanit piumasarineqassappat. Kommunimmi ataasiakkaat namminneq tamanna oqartussaaffigaat nunaqarfiillu siunissaat pillugu pilersaarusiortussaallutik. Aamma kommuninik ineriartortitsiviusussanik – tassa kommunit aalajangersimasut nunatsinni aningaarsiornikkut ineriartornermi qitiutinneqarnissaannik – isummap atorsinnaanera apeqquserpaa. ”Kommuninik ineriartortitsiviusunik isuma takorluugaannaavoq attaveqarnikkut pilersuinikkullu periarfissat Islandimisut itsinnagit, soorlu illoqarfiit akornanni aqqusineqarneq eqqarsaatigalugu. Qularaara taamatut aaqqissuussinerup kommuninut saniliusunut iluaqutaasinnaanissaa,” Kalistat Lund oqarpoq. Sisimiut borgmesteriata Hermann Berthelsenip tamanna isumaqatiginngilaa. ”Aningaasat nunatsinniittut amerlanersaat avataanit pisuupput. Aningaasarsiornikkut ineriartorneq unittoorsimavoq. Taamaattumik kommunini ineriartortitsivinni ineriartortoqarpat tamanna nunamut tamarmut iluaqutaasussaavoq, tamarmik pisuunnguallassammata. Aammalu kommuninik aalajangersimasunik ineriartortitsiveqarneq nunaqarfinnik matooraanissamik kinguneqartariaqanngilaq. Akerlianilli Danmarkimit aningaasaliissutit politikkikkut utaqqiinnaraanni tamanna nunaqarfiit ataannarnissaannut iluaqutaanavianngilaq,” Sisimiut borgmesteriat oqarpoq. Allaffissornerujussuaq Ilulissani borgmesterip Anthon Frederiksenip uparuarpaa allaffissornerup anginerujussua, atortoqarnikkut aningaasartuutitigullu, ilaatigut pissutigalugu allaffeqarnermi ingerlatsinerup oqaatsinik marlunnik tunngaveqarnera. Kommunit suleqatigiinnerisigut tamatumani pisariillisaanissaq pisariaqarpoq. Aasianni kommunaldirektøri H. P. Barlach Christensen oqarpoq: ”Ullumikkut illoqarfiit nunaqarfiillu atuuttut atuutiinnartariaqarput. Allaffissornikkut ingerlatat immikkoortut kattuttariaqarput, tamatumalu peqatigisaanik najugarisani demokratii atuutiinnartariaqarluni.” Maniitsumi borgmesteri Siverth K. Heilmann isumaqarnerarpoq Islandimi ineriartorneq pitsaasumik ingerlasimasoq. ”Taamaattumik inuutissarsiutitigut ineriartortitsineq Islandimiut misilittagaat tunngavigalugit ingerlanniartariaqarparput. Takusinnaavarpummi qanoq suliffissanik pilersitsiortorsinnaasimasut,” Siverth K. Heilmann oqarpoq. Borgmester Einar Njalssonip oqalugiaataa uani aaneqarsinnaavoq
|
