|
Nuuk, 29.08.2002 Borgmesterit kommunaldirektørillu Islandimi ataatsimiinneranni siulittaasup nalunaarutaa. Soorlu naluneqanngitsoq Inatsisartut upernaaq manna ataatsimiinnerminni meeqqat atuarfianni atuartitsinermut peqqussutissaq nutaaq aggustip aallaqqaataani 2003-mi atuutilersussatut akuersissutigaat. Taamaalillutik kommunit Namminersornerullutillu Oqartussat atuutilersinnagu allannguutit annertuut piareersarfiginissaannut piffissaqartinneqalerput. Ingerlatsinermi tunngavissat nalunaarutitut ilusiligassat piareersarneqarput, septembarillu sisamaanni IMAK-imut akissarsiatigut isumaqatigiinniarnerit aallartissapput. Peqqussutissap tusarniutigineqarnerani Kattuffiup sapinngisannguani atorlugu peqqussutissap atuutilernissaanut kommunit aningaasatigut pisariaqartitat malillugit tunngavissamik piviusumik minnerunngitsumillu ilinniartitsisut akissarsiassaannut naammattunik aningaasaliiffigineqarnissaat anguniarsimagaluarpaa. Taamatut anguniagaraluarput tamakkiisumik angunngitsoortutut taasariaqarpara, tassami Inatsisartut pisariaqartitat aningaasaliissutiginagit ilinniartitsinermi nalunaaquttap akunneri atuarfissat ikilinissaat qinermassuk. Ajoraluartumik kommunit aningaasaqarnerat apeqqutaaqqilerpoq nalunaaquttap akunneri ullumikkut ukiuni aqqanilinni atuarfiusuni siunissami quliusussani atatiinnarneqassappata. Kommunimmi ataasiakkaat atuartitsinermi angusassat annerpaat anguniarneqarnissaat kissaatigigunikku nalunaaquttap akunneri atuartitsiffissat ikinnerpaaffissaat qummut qaangerlugit atuartitsinermik ingerlatsisinnaapput, kisiannili nammineq akilikkamik taamaaliortariaqassallutik ataatsimoortumik tapiissutitigut minnerpaaffissaasut kisiisa tunngavigalugit tapiiffigineqartussaassagamik. Kattuffimmiit meeqqat atuarfiata pitsaasumik ingerlanneqarnissaa kissaatiginartipparput aappaatigulli aamma nalunngilarput kommunit ataasiakkaat aningaasaqarnikkut periarfissaat killeqartoq taamaattumillu kattuffimmit ”Nutaarsiassat”-ni saqqummersussani tullerni atuartitsinermi tiimit atorneqartartut aqunneqarsinnaanerat saqqummiutissavaa. Ukiumoortumik tapiissutit ukiumut tullermut atuuttussat isumaqatigiinniutigineqarnerat suli naammassineqanngilaq. Naammassineqannginnerannut pissutaavoq meeqqanut inuusuttunullu angerlarsimaffinnut inissiinermut akiliutaasartut annertuumik isumaqatigiinngiffiunerat. Kattuffiup suliassami tassani pingaartippaa isumaqatigiinniarnerit inernerisa illuatungeriinniit ataqqineqartariaqarnerat. Ukiormannamut tapiissutit isumaqatigiinniutigineqarnerisa inernerannut ilaavoq ukioq mannamut akiliutip angissusissaa. Inunnik Isumaginnermi Pisortaqarfik Angerlarsimaffiit ulluinnarni ingerlanneqarnerannut akisussaasuuvoq. Aasaq mannalu aningaasat ingerlatsinermut missingersuutigisat 12 mio. kr.-nit missaannik qaangerlugit atuiffiusussanngortoq ilimanarsimmat inatsisartut aningaasaqarnermut ataatsimiitsititaliaat naalakkersuisuniit matussutissanik qinnuigineqarpoq. Qinnuteqaatilli ilaannaa ataatsimiititaliamiit akuersissutigineqarpoq. Tamatuma kingunerisaanik kommunit inissiinerminnut akiliutigisartagaat ukiormanna januaarip aallaqqaataaneersumiit 504,- kroniniit 580,- kroneqalersinneqarpoq. Siulersuisut isumaat malillugu ukiup qeqqinnaani akiliutit kingumoortumik qaffanneqarnerat akuersaarneqarsinnaanngilaq. Kommuneniit isumaqatigineqassagutta maanngaaniit uterutta naalakkersuisut siulittaasuat ataatsimeeqatiginiarparput naalakkersuisut inatsisartunut suliassamik nangitsitsisinniarlugit. Siulersuisut ataatsimoortumik tapiissutit pillugit isumaqatigiinniarnerit ukiumut tullermut atuuttussat naammasiniarnissaat suliap uuma inaarneqarnissaanut utaqqinniarpaat. Kommunit maannamut isumaqatigiinniartarnerit ataqqillugit missingersuusiortarnerat ingerlaannassappat isumaqatigiissutit naatsorsuutigineqarsinnaanissaat qulakkeertariaqarsoraarput. Inunnik isumaginninnerup iluani suliassaq alla tikilaarusuppara, tassa inuit annertuumik innarluutillit ikiorneqartarnerannut tunngasoq. Ukioq 2000 Isumaginninnermut Pisortaqarfik kommuneni isumaginninnermut ataatsimiitsitaliani siulittaasunik aammalu pisortanik isumasioqatigiissitsivoq innarluutillit ikiorneqartarnerisa misiligutaasumik kommunenit tiguneqarnissaat pillugu. Ullumikkullu kommunit qulit misiligutaasumik akisussaaffik ingerlappaat. Siulersuisut tungaanniit kissaatigaarput misiligutaasumik ingerlatsinerup nalilersorneqarnissaa. Paasisagut malillugit kommunit ilaanni ingerlatsinermi aningaasat atugassat tiguniartarneri ajornatorsioutaapput. Suliassaqarfiup kommuninut nuunneqannginnerani qitiusumiit akisussaasunit siunissamut innarluutillit ikiorserneqartarnerisa pilersaarusiorneqarnissaat pisinnagu Kattuffimmiit akisussaaffeqarfiup kommuninut tunniunneqarnissaa innerssuussutigisinnaanngilarput. Ineqarnermut tapiissutit tunniunneqartartut pillugit aalajangersakkat allanngortinneqarmata kattuffimiit tapiissutit kisinneqartarnerannut pisariillisaarutaasumik qarasaasiartigut programmimik sanatitsinikuuvugut. Neriuutigaarput ulluinnarni sulinermi pisariillisaataasoq aammalu atorluarneqarumaartoq. Nalunngisassitut siorna november 2001 borgmester-it kommunaldirektør-illu ataatsimiin-neranni ataatsimiittunit siunniunneqarpoq Kattuffiup ataani suleqatigiissitaliortoqassasoq tamannalumi pivoq 2001-p ukiaani. Suleqatigiissitaq inuutissarsiutitigut timitalimmik kommunit nunap immikkoortukkuutaarlutik sulissutiginiagaannik ataqatigiissaarisuullunilu najumminnittuuniartussaavoq. Suleqatigiissitaq borgmester-inik pingasunit kommunaldirektør-imillu ataatsimik ilaasortaqarpoq Kattuffiullu siulittaasuanit siulittaasuuffigineqarluni. Suleqatigiissitaq inuttalerneqareernermi kingorna siullermeerluni februar 2002-imi Nuummi pisumi ataatsimiisinneqarpoq. Tassanilu suleqatigiissitap ilaatigut siunissami suleriaasissani eqqartorpaa aammalu suliniutigisinnaasat oqallisigalugit. Ataatsimiinnermittaaq suleqati-giissitap eqqartorpaa kommuunit isorliunerusut tikillugit ataatsimeeqatigisarnissaat – taakkuummatami inuutissarsiutitigut ingerlatsinermi ajornartorsiornerusut. Suleqatiigiissitap ataatsimiinnerata appaa pivoq Upernavimmi juni 2002. Tassani ataatsi-miinnermi aamma Avanersuup Kommunia, Uummannap Kommunia qaaqquneqarsimallutik nunap immikkoortui taakku imminnut sanileriittut suleqatigiiffeqarsinnaanissaat ujartuiffigineqarsinnaanera ilaatigut siunertaralugu. Taamatut ataatsimiititsinerup takutippaa kommuunit taakku imminnut qaninnerusut inuutissarsiutit tungaasigut arlalitsigut suleqatigiiffigisinnaasaminnik taakkartuisinnaasut. Soorlu aalisarnerup takornariaqarnerullu tungaasigut. Suleqatigiissitaq maannamut Inuutissarsiornermik Pisortaqarfimmik suleqateqarluartutut oqaatigineqarsinnaavoq. Soorlu kommuunit arlaqartut uparuartuutigisarsimasaat inatsisip nr. 22-ip 3. november 1994-imeersup kommunit inuutissarsiutinut akuliusimanerat ilaatigut kommuninut ippinnartortalik maanna allanngortissinnaanissaa suleqatigiissutigaa. Taamaammat suleqatigiissitaq siunissami kommunit inuutissarsiutinik pilersitsiniarnerini ingerlatsinerinilu suleqataanissaminut isumalluarluni piumassuseqarluarlunilu suliniarpoq kommunillu kaammattorusullugit peqataalluarnissaannik ataatsimoorlunimi suliassat kivikkuminarnerusarmata. Kommunit inuutissarsiutinut tunngasunut suliniutitik pilersaarutitillu suleqatigiissitamut ilisimatitsissutigisassagaat kissaatiginarpoq taamaasilluni suleqatigiissitaq kommunini qanoq pisoqarneranik malinnaasinnaaqqullugu immaqalu sulianut ikorfartueqataasinnaaqqullugu. Kommunit akunnerminni suleqatigiinnerulernissaat anguniarluguttaaq ataatsimiitsitaliaq taamatut pilersitarput suliaminik aallarniinikuuvoq. Suleqatigiissitaq kommunaldirektørinik pingasunik Namminersornerullutillu Oqartussani nunap iluani pissutsinut allaffeqarfimmiit inuttalersugaavoq kattuffiullu pisortaanik siulittaasuuffigi9neqarluni. Sulisuttaa soraarneranik tunngaveqartumik suliaq unikaallannikuusoq maanna pimoorullugu ingerlanneqaleqqippoq. Kommunit ingerlatsinerminni aningaasartutaat ikilisarneqassappata aammalu innuttaasut sullinneqarnerat pitsanngorsarneqassappat suliaq tamatta ilaaffigisariaqarparput. Suliassat ingerlanneqartut ilaasa peqatigiilluni ingerlatilernerini sullissinerit pitsanngorsarneqar-sinnaanerat aammalu aningaasartuutit ikilisinneqarasinnaaneri anguniassagutsigit. Taamatut suliassat pingaarnerusut ingerlannerannik nalunaaruteqalaarpunga apeqquteqartoqarnissamut aammalu isummanik saqqummiinissamut periarfissippassi.
|
