|
Piffissaq manna iluatsillugu kommunalbestyrelsit ilisimatikkusuppakka ungasinngitsunnguakkut ingerlatsivinni pinngortitamik asattuussineq aallaavigalugu pisiniariaaseqarnissamik aalajangersaaneqarnissaanut kaammattuummik KANUKOKA-mit tigusaqassasut. Kommunit KANUKOKA-p kaammattorniarpai igitassat amerlassusaasa minnerunngitsumillu saffiugassanik arrortikkuminaatsunik avatangiisinut eqqaasarnerup annikillisarneqarnissaannik suliniuteqarnermi siuttooqqullugit. Nunatsinni pinngortitap ataqatigiinnera mianernartorujussuuvoq ulluinnarnilu sunik tamanik atuinitsinni piujuaannartitsinissaq pinaveersaartitsinerlu eqqagassanik suliaqarnitsinni eqqarsaatigiuartariaqarparput. Atortussanik pisiniartarnitsinni atuinitsinnilu tamanna aallaavigalugu ingerlagutta igitassat annertussusiat, saffiugassanik arrortikkuminaatsunik avatangiisinut tuniluutsitsineq annikillisissinnaavagut nukiillu atorneqartut sipaaruteqarfigalugit. Avatangiisinut KANUKOKA-p suliniutaa Avatangiisinut Pinngortitamullu Pisortaqarfik Miljøstyrelse-lu peqatigalugit atortussanik ulluinnarni atortakkatsinnik assigiinngitsunik arlaqartunik pisiniartarnermi avatangiisinut naleqquttunik pisiniartarnermut ilitsersuusiorsimavoq. Quppersakkatsinni tamanit aaneqarsinnaapput e-forum oqalliffissiaq aamma ilanngullugu, pisiniartartut misilittakkaminnik taartigeeqatigiiffigisinnaasaat. Sulisut akornanni ataatsimik arlaqartunilluunniit ilitsersuutit ikiorsiullugit aammalu pinngortitamut asattuussinissaq aallaavigalugu workshop-imi pilersaarusiorneqartumi peqataanermikkut pisiniarnernik ingerlatsisinnaanermut pisariaqartumik piginnaanngorsartussanik toqqaaqqullusi kajumissaarpassi. Ingerlatsivinni sulisut atortut pinngortitami avatangiisinut nanertuutaanerinik ilisimasaqarnerulerpata neriuutigissavarput taamatut ilisimasaqarneq sumiiffinni innuttaasunut aamma siaruaakkumaartoq, tamatsinnut iluaqutaasussamik. Kommunit pinngortitamut asattuussisunik atortussanik ujartuinerat sumiiffinni pilersuisut atortussanik avatangiisinut naleqqussakkanik ineriartortitsinissamut, tunisassiornissamut tuniniaanissamullu piumassuseqarnerulernissaannik kinguneqassasoq neriuutigissavarput. Tamatumunnga atatillugu KNI/Pilersuisoq kommunit pisiniartarnerminni avatangiisinut naleqquttunik pisiassaqarsinnaanissaata anguniarneqarneranut peqataaqqullugu matumuuna kaammattorpara. |
