|
Ataatsimiinnermi matumani immikkut taasariaqartippara nunaqqativut Danmarkimi ilinniagaqartut ilinniarnerminni naammassigunik nunatsinni qanoq periarfissaqarnerannik paasisitsiniaanermi KANUKOKA Namminersornerullutik Oqartussanit ilaserineqarluni 2003-mi peqataalermat. Immaqa aperisoqarsinnaavoq kommuneqarfiit kattuffiat ilinniakkanut ingerlaqqiffiusunut Danmarkimi ingerlanneqartartunut oqartussaaffeqarani sooq tamatumunnga akuunersoq. Taava akisariaqarpoq tamatumani pineqarmata isumalluutit Kalaallit Nunaanni inuiaqatigiinnut iluatinnartorujussuit. Taamaattumik KANUKOKA piareersaaqataavoq "Atorfinnik Praktikkerfinnillu Nittarsaanermik" taaneqartumik Danmarkimi aaqqissuussisoqarnissaanut. Nittarsaanissaq tamanna pisussanngorpoq weekendimi 20. aamma 21. novembarimi Århusimi Københavnimilu. Tamatumanilu peqataassamaarput suliffeqarfiit pisortaqarfiillu suliffissaqartitsinikkut tamatigoortunik tunuliaqutaqartut 15-it. Allakkat qaaqqusissutit nunaqqatitsinnut 500-it missaanniittunut Danmarkimi ilinniagaqartunut nassiussuunneqartussaapput. Aaqqissuussisullu neriuutigaat taamatut nittarsaanissaq nunaqqatitta inuusuttut Danmarkimi ingerlaqqiffiusunik ilinniagaqartut naammassigunik Kalaallit Nunaannut uternissaminnut kajumissaatigiumaaraat. Nittarsaanissami ilinniagaqartut kattuffiat DKIK suleqatigilluinnarlugu piareersarneqartumi ilinniartut nunatsinni suliffeqarnikkut periarfissanik paasiniaallutik "kaajallaasinnaassapput". Tassa siunertaavoq Kalaallit Nunaanni periarfissat ilinniagaqartut akornanni ilisimaarineqarnerulernissaat. Imaaginnanngitsoq ilinniagaqarnerup naammassereerneratigut atorfigilersinnaasat pillugit, aammali ilinniarnerup nalaani praktikkerfissat aasamilu atuanngiffeqarnermi suliffiusinnaasut, studentermedhjælperitut suliffiusinnaasut suliffeqarfiillu projektiliuunnissaannut periarfissat pillugit. Tamatumani kommunit kajumissaarusuppakka ilinniartortatik teknikkimut, aningaasarsiornermut, inatsisilerinermut allanullu tunngasunik ilinniaqarlutik Danmarkimiittut attaveqarfiginiartaqqullugit. Kommunit taakkunannga attavigineqaraangamik periarfissanut tappiffiginninniartariaqarput. Qularnanngilarmi kommunit ingerlatsiviini assigiinngitsuni iluaqutigineqarsinnaasunik suliakkerneqarsinnaasut suliassanik ulluinnarni iluamik piffissaqarfigineqartanngitsunik. Taamaaliornikkut siunissami ilinniarnerminnik naammassippata nunatsinni inuiaqatigiinni iluaqutigeqqinneqarsinnaanerannut qulakkeerisussamik attaveqaqatigiinnermik nuannersumik pilersitsisoqarsinnaavoq. |
