|
Siullermik KANUNUPE-miit qujassutigerusupparput Borgmesterit Kommunaldirektørillu ataatsimeeqatigiinneranni oqaaseqarsinnaanitsinnut periarfissinneqarnerput. Manna oqaatigerusupparput saqqummiussaq imartullunilu annertugaluartoq annikitsualutsigut nunaqarfinni aqutsisunut tunngatinnerullugu oqaaseqarfigissagatsigu. Aaqqissuussaanermut isumalioqatigiissitap sulisimanermini killiffimminik inassuteqaatigigallakkaminillu saqqummiinera pitsaasutut nalilerparput. Nunaqarfinni aqutsisut inatsisartut inatsisiliaat kommuninit malinneqartut tunaartaralugit kommunit sinnerlugit innuttaasunik sullissinitsinni toqqammavigisarpavut. Suliat assigiinngitsut inassuteqaatikkut saqqummiunneqartut Namminersornerullutik Oqartussat kommunillu suleqatigiinnerannut tunngassuteqarnerugaluartut nunaqarfinni aqutsisut akisussaaffiinut oqartussaaffiinullu annertuumik attuumassuteqarlutillu tunngassuteqarput – tassa nunaqarfinni aqutsisut kommunalbestyrelsimiit akisussaaffinnik tunioqqarneqarnertik aallaavigalugu innuttaasunik sullissinertik ingerlattarmassuk. Mannali malugeqqussavarput kommunini amerlanerni nunaqarfinni aqutsisut akisussaaffinnik suli ullumikkumut tunineqarsimanngimmata, kommunimiit kommunimut nunaqarfimmiillu nunaqarfimmut akisussaaffinnik tigumiaqarneq assigiinngitsorujussuarmik aaqqissuussiffigineqarsimammat – naak inatsit toqqammaviusoq malinneqartoq tamanut periarfissiisoq ataasiinnaagaluartoq. Kisiannili nunaqarfinni aqutsisut sullissinerat eqqarsaatigalugu ullumikkumut ajornartorsiutit naapinneqartartut Aaqqissuussaanermut Isumalioqatigiissitap sulinermini ilanngullugit nalilersuiffigisinnaasaatut makku oqaatigerusuppavut: Nunaqarfinni aqutsisut sulinitsinni suliatta annertunerpaat ilagaat inunnik isumaginninnikkut ikiorsiinikkullu inatsisit malillugit allaffimmiuvut siunnersortigalugit, ilaatigullu kommunimi isumaginninnermi allaffimmi ilinniarsimasut atorfillit siunnersortigalugit aalajangiivigalugillu suliarisakkavut. Sullissinermi inatsit toqqammavigisaq taannaagaluartoq ilaatigut sullitanut kipiluttunarsinnaasumik sullissiniarnerput kinguarsarneqalertarpoq. Assersuutigalugu meeqqat inuusuttuaqqallu ikiorserneqartarnerat pillugu inatsisit eqqarsaatigalugit. Inatsisit taakku allassimasoqarput ”kommunimi inunnik isumaginninnermi ataatsimiititaliap aalajangiineri atortussaatinneqartassasut.” Tassa imaappoq pisoq qanorluunniit pinartigigaluarpat nunaqarfinni aqutsit qanimut ilisimasat malillugit aalajangiineri pitsaanerpaatut isigalugit atorsinnaasanngillat, kommunimi isumaginninnermut ataatsimiititaliap aalajangiinissaa utaqqineqaqqaartariaqartarmat. Oqareernitsitut nalunaarusiaq assigiinngitsutigut nunaqarfinni aqutsisut akisussaaffiinut toqqaannanngikkaluamik attuisuuvoq inatsisit sullissinitsinni toqqammavigisavut taakkuummata. Kommunit qanitariit suleqatigiinnerunissaannut kattussuunnissaannullu oqariartuut nunaqarfimmiut ukioq ataatsimeersuartinneqarnerminni oqariartuutaasa ilaannut naleqqulluinnarpoq – tassa nunaqarfiit imminnut qanitariit ataatsimut aqutsisoqarfinngorsinnaanerannik inuussutissarsiutillu piffinni assigiinnerusut siuarsaaffiginerunissaat oqariartuutigineqarmat. Tamanna pillugu isumalioqatigiissitat saqqummiussaat kommuninut tunngassuteqaraluartoq tapersersorluinnarparput, tamatuma oqallisiginerani nunaqarfinnut tunngatillugu nalilersuiffigilluagassatut isigalutigu. Maanna oqaatiginngitsoorusunngilarput kommunit sullissinermikkut aningaasartuutikillisarnissaat pingaaruteqarluinnartutut isigalutigu peqataaffigerusukkatsigu, soorunami tamatumani sullissinerup pitsaassusia ajorseriartinngikkaluarlugu. Aammalu oqaatigerusupparput pisortat sullissineranni ataatsimut eqiterineq kiffartuussinerup eqaannerusinnaaneranik pisariinnerusinnaaneranillu pinngitsoortitsisinnaasarmat. Piffissami aggersumi ataatsimiititaliaq KANUNUPE-miit oqaloqatigalugit nunaqarfinni aqutsisoqarnermut tunngassuteqartut saqqummiussuuttussaavavut. Tamannalu isumalluarfigeqaarput. Qujanaq. |
