|
Asasakka borgmesterit kommunaldirektørit maanilu ataatsimiinnermut allat peqataasut. Siullermik KANUKOKA-p borgmesterinik kommunaldirektørinillu ukiumoortumik ataatsmiititsineranut peqataaqqullunga qaaqquneqarnera qujassutigaara. Qaaqqusatut peqataanissara qilanaaraara qularinngilaralu ullut aggersut pissarsiffiulluarumaartut, qulequttammi soqutiginartorpassuit pilersaarummi allassimasut takusinnaagakkit KANUKOKA-p Naalakkersuisunut ataatsimiigiaqqusissutaani Kattuffimmit qulequttat pingasut kommunit pingaartumik Naalakkersuisunit qanoq isumaqarfigineqarnersut tusarfigerusutagut taaneqarput. Qulequttallu pingasut taakku ukuupput: 1. Aaqqissuussaanermut ataatsimiititaliap kommuunit aaqqissuussaanerata allanngortinneqarnissaanik aamma Namminersornerullutik Oqartussat kommunillu akornanni suliassat agguaanneqarnerata allanngortinneqarnissaanik maannamut sulineranut Naalakkersuisut isumaat. 2. Naalakkersuisut aningaasanut inatsimmik saqqummiussinikkut ukiuni 2006-imiit 2008-mut 25 mio. kr.-nik 75 mio. kr.-t tikillugit kommuuninut ataatsimoortumik tapiissutinik ikilisaanissamut pilersaarutaat. 3. Innaallagissamik, imermik kiassarnermillu assigiimmik akeqartitsinerup atorunnaarsinneqarnissaanut iliuusissatut pilersaarummut naligiissaarinissamillu aaqqissuussinermut Naalakkersuisut isumaat. Qulequttat pingasut taakku tamarmik Inatsisartut ukiaq manna ataatsimiinnissaanni septembarip ulluisa 17-ianni aallartittussami Inatsisartunit oqaluuserineqassapput. Naalakkersuisuni isumaqatigiissutigaarput uanga Naalakkersuisut siulittaasuattut Naalakkersuisut kommunini aqutsinissamut eqqarsaataat, isummerneri pilersaarutaallu saqqummiutissagikka kiisalu Aaqqissuussaanermut ataatsimiititaliap maannamut sulisimanera oqaaseqarfigissagiga. Naalakkersuisunut ilaasortaq assigiimmik akeqartitsinermut aningaasanullu inatsimmut akisussaasoq tassa Aningaasanut Nunanullu allanut tunngasunut naalakkersuisoq Josef Motzfeldt qulequttat taakku marluk pissanganartut pillugit Naalakkersuisut pilersaarutaannik saqqummiussissaaq. KOMMUNINI ILUARSAAQQINNEQ AAQQISSUUSSAANERMULLU ATAATSIMII-TITALIAMIK PILERSITSINEQ Siumup Inuit Ataqatigiillu suleqatigiinnissamut isumaqatigiissutaanni september 2003-meersumi Naalakkersuisut namminersulernissaq sulissutigerusuppaat kommuunillu kattuffiat qanittumik suleqatigalugu kommuunini nutaamik iluarsaaqqinnissaq sulissutigerusullugu. Isumaqatigiissutip taassuma kingunerisaanik kingullermillu Qaqortumi september 2003-mi ilissi Borgmesteritut Kommunaldirektøritullu ataatsimiinnissinni kommuunini suliassat nutaanik periaaseqarluni aaqqissuunneqartarnissaannik naammassineqartarnissaannillu kommuuninit kissaatigisat saqqummiunneqartut nangillugit Naalakkersuisut KANUKOKA suleqatigalugu december 2003-mi aaqqissuussaanermut ataatsimiititaliaq pilersippaat. Aaqqissuussaanermut ataatsimiititaliaq Hans Egedep Illuani ukiup affaa matuma siorna tamanut saqqummiullugu ilisaritinneqarpoq. Taamani januaarimi saqqummiussinermi Naalakkersuisut erseqqissarparput Namminersornerullutik Oqartussat kommunillu akornanni nammagassat suliassallu allatut agguaanneqartalernissaat pillugit Aaqqissuussaanermut ataatsimiititaliaq suliassat allatut suliarineqartalernissaannik tamakkersorluni sulissutiginnissasoq siunnersuuteqartassasorlu. Taamatuttaaq Naalakkersuisut naatsorsuutigaat Aaqqissuussaanermut ataatsimiititaliami ilaasortat angusaqarniartuussasut, isumassarsiullaqqissuussallutik periaatsinullu nutaarluinnarnut pisortat siunissami suliassaminnik naammassinnittarnissaannut tunngavilersorluakkanik siunnersuusiortassasut. Ilisarititsilluni saqqummiussinermi taamani KANUKOKA-p siulittaasuata Naalakkersuisullu pingaartillugu erseqqissarpaat suliassat suliarineqartassasut KANUKOKA, kommunit ataasiakkaat innuttaasullu qanittumik suleqatigalugit. AAQQISSUUSSAANERMUT ATAATSIMIITITALIAP INATSISARTUT UKIAKKUT ATAATSIMIINNERANI NASSUIAATEQARNISSAA Aaqqissuussaanermut ataatsimiititaliaq maannamut sulinini pillugu nassuiaasiorallarsimavoq. Nassuiaataagallartoq taanna inerniliigallarnernik kaammattuutaagallartunillu imaqartoq, Inatsisartut Ukiakkut ataatsimiinnerminni oqallisigissavaat. Naalakkersuisullu sinnerlugit kaammattuutit nalilersuinerillu tamakku erseqqissaateqarfigissavakka oqaaseqarfigalugillu. Aaqqissuussaanermut ataatsimiititaliaq inerniliivoq pisortat suliassaqarfiinik suliassat siammasittumik innuttaasullu sapinngisamik qaninnerullugit suliarineqartalissasut suliassallu najukkani pissutsinut naleqqussarneqartassasut. Naalakkersuisummi kissaatigaat suliassat sapinngisamik innuttaasunut inornarpallaaratik inissisimalissasut. Naalakkersuisut pingaartilluinnarpaat siunissami aaqqissuussineq kikkut tamarmik oqartussaaqataallutik nakkutilliisinnaanissaannik, sulianik ilisimasaqarnermik aningaasaqarnikkullu imminut napatissinnaanermik tunngaveqassasoq kiisalu aningaasartuutissanik aalajangiisinnaatitaanerup taakkuninngalu akiliisussaatitaanerup akornanni tamakkiisumik ataqatigiittoqassasoq. Nassuiaammi ingerlaqqilluni Aaqqissuussaanermut ataatsimiititaliaq kaammattuutaagallartumik saqqummiussivoq kommuunit anginerusunngorlugit nunap immikkoortuinut kattussuuttariaqartut inuussutissarsiornikkut assigiiffiit, nunami sumiinneq, pisortat suliassaasa suliarineqartarneranni pitsaassusissaq aamma assartuinermik pilersuinermillu suliallit eqqarsaatigalugit. Naalakkersuisut suliassat pitsaanerpaamik angusaqarfiusinnaaqqullugit inissinneqarnissaannut isuma isumaqatigaat. Taamatummi periuseqarnerup kingunerissavaa suliamut aningaasaqarnermullu tunngatillugu taakkuninnga naammassinnissinnaasumut suliassat inissinneqarnissaat. Taamaammat ilaannikkut suliassat aalajangersimasunut tunnganerusut innuttaasunit atorfissaqartinneqartut suliassaqarfinnut innuttaasut amerlassusii eqqarsaatigalugit tunngavissaqarnerusunut inissinneqartariaqartassapput. Aatsaat taamaaliornikkut suliamut tunngatillugu periarfissaqalissaaq innuttaasut pitsaasumik sullinneqarnissaannut. Innuttaasut tikillugit sullissinissaq suliamut aningaasaqarnermullu tunngatillugu imminut nammassinnaassutsimut sanilliullugu oqimaalutarneqartariaqarpoq. IT-TEKNOLOGI SULLISSIVIILLU NUNATSINNUT SIAMMAKKAT ILUAQUTSIULLUGIT INNUTTAASUNUT QANINNERULERNEQ Siumup Inuit Ataqatigiillu naalakkersuisooqatigiinnissamik isumaqatigiissutaanni qulequtaq Informationsteknologi pillugu immikkoortortaqarpoq, tassani allassimavoq Naalakkersuisut sulissutiginiaraat atortorissaarutit qarasaasiallu atorlugit attaveqatigiinneq ineriartortinneqartuarlunilu naleqqussartuarneqassasoq, inuiaqatigiit nutaaliaasut attaveqaqatigiinnermut paasissutissiinermullu piumasaqaataat naapertorlugit. Kommuunit arlallit ullumikkut saaffiginnittarfinnik sullissigasuartartunik atuillutik pitsaasumik misilittagaqalereerput. Periaaseq taamaattoq toqqaannartumik innuttaasunik sullissinermi pikkorissunik sulisoqaraanni IT-teknologi nutaaq iluaqutsiullugu ullumikkornit annertunerusumik atugaanerulersinnaavoq. Assersuutigalugu nunaqarfimmiut nunaqarfiup allaffiani ingerlaannaq akineqarsinnaalissapput tassanimi sulisut kommuunip allaffiani paasissutissiisarfinnut attavilerneqarsinnaanngussammata, imaluunniit sulisut kommuunip allaffiani sulianik ingerlatsisunut aalajangersimasunut toqqaannartumik oqaloqatiginnitsinneqarsinnaalissammata, apeqqutinik imaaliinnarlugit namminneq akisinnaanngisaminnik sukkasuumik akissutissarsisinnaanngorlutik. Taamaammat suliassanik nunap immikkoortuinut sinerissamulluunniit siammartiterineq aamma nunaqarfimmiut sullinneqarnerannut iluaqutaasinnaavoq. Qanittumik misigisimaneq innuttaasut naalakkersuinermik sulialinnut pilertortumik saaffiginnissinnaanerannut kisimi atuutinngilaq. Pisortanit sullinneqarsinnaaneq pitsaasumillu sullinneqarnissaq innuttaasunut taamatulli pingaaruteqartigaat. Taakkununngami aamma pingaaruteqaqaaq pisortanit pitsaasumik sullinneqarsinnaanissaq. Kommuunip allaffianit nunaqarfimmilu allaffimmit immersuiffissanik innuttaasut aallersinnaasariaqarput, ammasarfiit oqarasuaatinillu atuisinnaanerit naammaginartuusariaqarput, suliakkiissutit sukkasuumik suliarineqarsinnaasariaqarput akissutisiarineqartullu inatsisinut aammattaaq naapertuuttuusariaqarlutik. Taamaammat Aaqqissuussaanermut ataatsimiititaliamut kaammattuutigissavara, soorlumi aamma ataatsimiititaliap tamanna pilersaarutigereeraa, IT-teknologip nutaap atugaalerneratigut susassaqaqatigiit imminnut qaninnerulersinnaanissaannut periarfissat nalilersorlugit misissuiffigilissagaat. Taamatuttaaq Aaqqissuussaanermut ataatsimiititaliamut kaammattuutigissavara innuttaasunik pitsaasumik pilertortumillu sullissisarneq innuttaasut oqartussaasusiannik innarliinaveersaartussaq qanoq ittuussanersoq misissuiffigeqqullugu. INNUTTAASUT PIGINNAATITAAFFII QULAKKEERNEQASSAPPUT: KIKKUT TAMARMIK SUMILUUNNIIT NAJUGAQARALUARUNIK INATSISITIGUT NALIGIIPPUT Innuttaasut piginnaatitaaffiisa isumannaatsuunissaat uagut inuiaqatigiinni atugarissaarfiusuni inuunitsinni tunngavissatta ilagaat. Tamanna isumaqarpoq innuttaasut nunatsinni sumiluunniit najugaqaraluarunik inatsisit malillugit akuerineqarsinnaasumik sivisussusilimmik sullinneqarlutik eqqortumik aalajaangiivigineqartassasut. Tamakku eqqortinneqassappata pisariaqarpoq uagut tamatta piginnaatitaaffiit pisussaaffiillu inatsisit naapertorlugit malitassarititaasut eqqarsaatigalugit assigiinnik atugassaqarnissatsinnut isumannaariffigineqarsimanissarput. Tamanna aamma imatut oqaatigineqarsinnaavoq: "nunaqarfimmiuugaluaraanni illoqarfeerarmiuugaluaraanni illoqarfissuarmiuuga-luaraanniluunniit inatsisinut tunngatillugu tamanut atugassarititaasut naligiissuussasut." Nunatsinni inatsisit nunarsuarmi allanisulli annertusiartorlutik paasiuminaalliartuinnarsimapput. Taamaammat kommuunit suliassaqarfinni assigiinngitsuni immikkut ilisimasalinnik amerlanerujartortunik atorfinitsitsisariaqartalerput. Kommuunit kattussuunnerisigut kommunillu suleqatigiilernerisigut innuttaasut piginnaatitaaffii isumannaannerulersinnaapput inatsisitigullu naligiinnerulersinnaallutik. Eqqarsaatersuutit taamaattut Aaqqissuussaanermut ataatsimiititaliap sulinerminut ilanngukkumaaraat Naalakkersuisut neriuutigaat. SAMMISAQARLUNI ISUMMERSOQATIGIINNERUP INGERLAQQINNERANI INNUTTAASUT AKUUTINNEQASSAPPUT Aaqqissuussaanermut ataatsimiititaliamut suliassarititaasuni Naalakkersuisut akuersissutigisaanni oqaatsit uku atuarneqarsinnaapput: "Aaqqissuussaanermut ataatsimiititaliaq sulinermini Inatsisartunut, Naalakkersuisunut, kommuuninut innuttaasunullu sulianini pillugu kalerriussisarnissaminut pisussaavoq." Naalakkersuisut pingaartippaat kommunalbestyrelsit, Nunaqarfinni aqutsisut innuttaasullu sulinermut akuutinneqassasut. Aaqqissuussaanermut ataatsimiititaliaq ullumikkumut pingasoriarluni tamanut ammasumik ataatsimiititsisarsimasoq kommuninillu marlussunnik ataatsimeeqateqarsimasoq Naalakkersuisut tusargartik iluarisimaarpaat. Aaqqissuussaanermullu ataatsimiititaliaq taamatut ataatsimiittoqartarnissaanik arlalissuarnik piffissami aggersumi pilersaaruteqarpoq, tamannalu assut tapersersornarpoq. Marsimi nunaqarfimmiut ataatsimeersuarneranni siullermeerluni ataatsimiittoqarpoq. Tassani nunaqarfimmiut sinniisaat Aaqqissuussaanermut ataatsimiititaliap sulineranik siullermeersumik paasissutissinneqarput nunaqarfinnilu aqutsisunut ilaasortat ataatsimiititaliap aallarteqqaarneraniit suleriaqqinnissanut isummaminnik siunnersuuminnillu saqqummiussinissaminnut periarfissinneqarput. Aappassaannik ataatsimiittoqarpoq kommuunit aallartitaasa maajip qaammataani ataatsimiinneranni. Tassani kommuunit sinniisaat sulineq pillugu ilisimatinneqarnissaminnut Aaqqissuussaanermullu ataatsimiititaliap suleriaqqinnissaanut siunnersuutinik isummanillu saqqummiussinissaminnut periarfissinneqarput. Juuli qammat Qasigianngut Ilulissallu kommuniisa sinniisaat ataatsimeeqatigineqarput Qasigiannguanilu innuttaasut ataatsimiitinneqarlutik. Borgmesterit Kommunaldirektørillu ataatsimiinneranni kommunerpaalussuit sinniisaat ataatsimeeqatigineqassapput ataasinngorpallu septembarip ulluisa arfernanni Aaqqissuussaanermut ataatsimiititaliap Uummannami innuttaasut ataatsimiitinneqarnissaat pilersaarutigaa. Naalakkersuisuni pingaartipparput Aaqqissuussaanermut ataatsimiititaliap sulinerminik innuttaasunut saqqummiussuiuartassasoq kommuninittaaq taakkunanilu innuttaasunik oqaloqateqartarnermigut isumassarsiortassasoq. NAGGASIUT Taamatut oqaaseqarlunga naggasiutigalugu sulilluarnissassinnik kissaappassi, kommunit siunissaat pillugu Naalakkersuisut isumaasa ilaannik saqqummiussisinnaatitaanera qujassutigaara ataatsimiilluarnissassinnillu kissaappassi qilanaarpungalu isummassi tusarnissaat. Qujanaq. |
