|
17. oktobari 2005 Borgmesterit kommunaldirektørillu ataatsimiinneranni maluginiarparput pisortat ingerlatsiviisa aaqqissuuteqqinneqarnissaannut taamalu kommunit kattussuunnissaannut Aaqqissuussaanermut Isumalioqatigiissitat isumaliutissiissumminni piffissalersuinerat kommuninit sukangagineqartoq. Upernaaq KANUKOKA-mut aallartitat ataatsimiinneranni piareersarnissamut ukiumik ataatsimik piffissaqartitaanerunissaq amerlasuunit piumasarineqarpoq, maannalu borgmesterit kommunaldirektørillu ataatsimiinneranni tamanna piumasareqqinneqarluni. Taamaattumik KANUKOKA-p siulersuisui aalajangerput kommunit kikkunnit kattuteqateqarnissaminnik 2006 naatinnagu aalajangereersimanissaannik siunnersuutip ukiumik ataatsimik sivitsorneqarnissaanik piumasaqarniarlutik. Aaqqissuussaanermut Isumalioqatigiissitat isumaliutissiissutaat borgmesterit kommunaldirektørillu ataatsimiinneranni kusagineqarlunilu nersualaarneqarpoq, kommunilli anguniakkat isummallu kusanartut ajunngitsumik anguneqarnissaat pillugu innuttaasut peqatigalugit tunngavilersuinissaminnut piareersarnissaminnullu periarfissaqarnerorusupput. KANUKOKA-p siulersuisui isumaqarput ukiumik ataatsimik periarfissaqarnerulernikkut aaqqissuusseqqinnissaq tamarmi ukiunik sisamanik kinguartittariaqanngitsoq. Kommunalbestyrelsit maanna atuuttut atuuffiata ukiumik ataatsimik sivitsorneqarneratigut tamanna pisinnaasutut taaneqarsimammat tamanna siulersuisut periarfissatut tikkuarusuppaat. KANUKOKA-p siulersuisuisa pilersaarutigilerpaat borgmesterit kommunaldirektørillu marsimi 2006-imi immikkut ittumik ataatsimiisinneqassasut – tassa isumaliutissiissutip naalakkersuisunit tusarniaassutigineqarnerata naammassereernerani isumaliutissiissutillu Inatsisartuni oqallisigineqarnissaa sioqqullugu.
Inussiarnersumik |
