KANUKOKA-p siulittaasuata tikilluaqqusinera

 

Tamassi tikilluaritsi!

 

Borgmesterit kommunaldirektørillu ukiumut ataasiarlutik ataatsimiittarnerat qangali ileqquuvoq, ataatsimiinnissarlu manna kommunit aaqqissuussaaneranni maanna atuuttumi kingullersaavoq. Aaqqissuussaanermi nutaami januaarip aallaqqaataani atuutilersussami borgmesterit kommunaldirektørillu ullumikkornit ikinneralaarsuusussat naapeqatigiittarnitik qanoq aaqqissuukkumaarneraat soorunami suli nalunarpoq. Immaqa akulikinnerusunik ataatsimiittalissapput – nalunarumaanngilaq.

 

Soorlu programmimi takuneqarsinnaasoq, ataatsimiinnermi matumani sammisassat pingaarnersaraat suliassaqarfinnik Namminersornerullutik Oqartussanit kommuninut nuunneqarsinnaasunik qulaajaa­­­nerup killiffia.

 

Qulaajaaneq Namminersornerullutik Oqartussani, KANUKOKA-mi kommuninilu atorfillit peqataaffigisaat 2007-imi ukiup naajartornerani 2008-llu aallartisimalernerani ingerlanneqar­poq. Tassalu

suliassaqarfinni ataasiakkaani qulaajaareerluni inerniliussat qanorlu ingerlariaqqinnissamik inassute­­qaatit ullumi aqagulu maani sammineqassapput.

 

Oqaluuserisassaq tamanna pingaarutilerujussuuvoq. Tamattami kissaatigaarput kommuninut nutaanut ikaarsaarnissaq siunertarineqartut naapertorlugit pissasoq kommunillu nutaat aallartilluassasut.

 

Innut­taasunik kiffartuussinerup pitsanngorsarneqarnissaa, allaffissornerup pisariillisarneqarnissaa min­nerunngitsumillu suliassaqarfinnik oqartussaaffinnillu qitiusumiit kommuninut nuussinikkut sumiiffinni oqartussaaqataanerup alliartortinneqarnissaa kommunit aaqqissuussaanerannik iluarsaaq­qinnissap siunertarigai nalunngilarput. Taamaattumillu suliassaqarfinnik aningaasartaannillu kommuninut nuussinissaq iluarsaaqqinnerup imaqarluartumik atuutilernissaanut aalajangiisuussaaq.

 

Soorlumi borgmesterit kommunaldirektørillu kingullermik ataatsimiimmata ima nipilimmik oqartoqartoq: Suliassaqarfiit aningaasarsiutaasut ilanngullugit kommuninut nuunneqanngippata kommunit socialkontoriinnanngussapput! Taama oqarneq ilumoortortaqarpoq.

 

Suliassaqarfinnik kommuninut nuunneqarsinnaasunik qulaajaanissamik ukiarmi septembarimi naalakkersuisut siulittaasuallu isumaqatigiissuteqarnitta kingorna suliap ingerlanneqarnera suleqatigiin­nerlu pitsaasutut nalilertariaqarput.

 

Suleqatigiissitani amerlanerpaarpaatigut isumaqatigiittoqarsinnaasimavoq, aammali ataasiakkaatigut – taamaattorli pingaaruteqartutigut – isumaqatigiissinnaasimanngillat. Soorlu Namminersornerullutik Oqartussanit isumaqartoqarpoq umiarsualivinnik mittarfinnillu ingerlatsineq qitiusumiiginnartariaqartut, kommuninilli kissaatigineqarluni suliassaqarfiit taakku aamma kommuninut tunniunneqassasut – soorlumi aamma Aaqqissuussaanermut Isumalioqatigiissitaq isumaliutissiissummini taama siunnersuuteqartoq. Nalunngilarpullu isumaliutissiissut taannarpiaq Inatsisartut 2006-imili akuersaarsimagaat iluarsaaqqinnermi tunngavissatut.

 

Tamakkuli erseqqinnerusumik uterfigeqqissavavut.

 

Tassa ikaarsaariarnermi ataatsimiititalianut januaarip aallaqqaataaniit kommunalbestyrelsinngortussanut qinersinissaq aajunaralannguanngoreerpoq.

 

Qinersinissap tamatuma kommunit aaqqissuussaanerannik iluarsaaqqinnermi killiffittut siullertut pi­ngaaruteqarnera KANUKOKA-mi siulittaasutut ukiortaami oqaaseqarninni erseqqissareerpara tama­­tumalu kingorna periarfissani assigiinngitsuni erseqqissaqqittarsimallugu. Tassami apriilip ulluisa arfineq-pingajuanni qinigaasussat taakkuussapput ukiortaamiit kommunerujussuanngortussani politikkikkut allaffissornikkullu suleriaasissanik upernaarumiit tunngavilersuilereersussat siunissamilu suliassat pillugit oqaasissaqartuusussat.

 

KANUKOKA-mi misilittagaqarfigilluarneqalersimasoq ineriartortinneqarsimasorlu, tassa aqutsiner­mut inatsit pisortallu suliassanik ingerlatsinerannut inatsisit pillugit politikerinik pikkorissartitsisarneq, ikaarsaariarnermi ataatsimiititaliaalersussanut maajip aallaqqaataata qulingatalu akornanni pisussanngorlugu neqeroorutigaarput. Inatsisinik suleriaatsinillu sumiiffinni politikerit sulinerannut attuumas­suteqartunik ilisimasaqarluarnissap pisariaqartinneqarneranut assersuutissanik KANUKOKA-mi naammattoorsiuartarpugut.

 

Aaqqissuussaanermik iluarsaaqqinnissap piareersarneqarnerani piviusunngortinneqarnissaanilu paasissutissanut pingaaruteqartunut sulisut malinnaatittuarnissaat tamakkulu pillugit oqaloqatigisarnissaat pingaaruteqartorujussuuvoq.

 

Taa­maat­tumik iluaralugu maluginiarpara aaqqissuussaanermik iluarsaaqqinissaq pillugu KANUKOKA-p allaffissornikkut aqutsisoqatigiivisa ataatsimiinnerisa kingulliit ilaanni oqaatigineqarsimammat kommunerujussuanngortussani sulisut suleqatigiinnermut ataatsimiititaliaat maannangaaq pilersinneqareersussatut kaammattuutigineqartut aqqutigalugit sulisunik ilisimatitsilluartarnissaq pingaaruteqartoq. Tamanna aamma uanga periarfissaq manna iluatsillugu kaammattuutigerusuppara.

 

Aaqqissuussaanermik iluarsaaqqinnissamut tunngatillugu paasissutissiisarnermi maannamut KANU­KOKA-p periaatsitut tunngavigisaa (strategiia) tassaavoq kommunini ingerlatsiviit politikkikkullu aqutsisut pisunik oqallisaasunillu pingaaruteqartunik ilisimasatsinnik arajutsisinnaveersaarnissaat.

 

Tamanna ilaatigut pisimavoq nutaarsiassatut allakkiat kommuninut nassiunneqartartut aqqutigalugit. Taamatut ataavartumik paasissutissiisarnerup iluarineqarneranik ilisimatinneqartaannarpugut, ataasiakkaa­tigulli ajoraluartumik malugisarsimallutigu paasissutissat inunnut susassaqartunut soqutigisaqartunullu ingerlateqqinneqanngitsoortartut.

Paasitinneqanngitsoorneq imaluunniit arajutsisinneqartutut misigineq sulisuulluni nikallornartarpoq, taamaattumillu allaffissornikkut pisortaasut assigiinngitsut minnerunngitsumik piffissami aggersumi pisussaaffittut tigusariaqarpaat paasissutissiisarnerup tu­ngaatigut ”siulliuniartarnissaq” – ilaatigut suleqatigiinnermut ataatsimiititaliat aqqutigalugit. Tamanna tatigeqatigiinnermut, toqqissisimanissamut kajumillunilu sulinissamut iluaqutaassaaq.

 

Sulisoqarnermut tunngasut aamma aqagu oqaluuserineqartussaammata annerusumik maanna sammissanngilakka. Oqaatigerusupparali kommunini sulisut piginnaasamikkut ineriartornissaat tamatumunngalu aqqutissiuunneqarnissaat pingaartitassarujussuusoq – minnerunngitsumik kommunit suliassaqarfinnik nutaanik tigusinissaat sulissutigisarput eqqarsaatigalugu. Iluarsaaqqinnermi tamatumani siunertat angisuujummata, piginnaasatigullu ineriartortitsineq inuiaqatigiinnut tamanut iluaqutaasussaammat, suliassap tamatuma aningaasaliissutitigut Namminersornerullutik Oqartussanit qulakkeeriffigineqarnissaa pissusissamisuussaaq.

 

Aamma pingaartittariaqarpoq suliassaqarfinnik Namminersornerullutik Oqartussanit tigusinissami sulisooreersut piginnaasaasa qatangiinnartinneqannginnissaat, imaappoq pigiinnarneqarnissaat. Tamatumani soorlu eqqarsaatigaara meeqqanik inuusuttunillu ulloq unnuarlu paaqqinnittarfeqarnerup innarluutilinnillu isumaginnerup tiguneqarnissaanni sulisut immikkut ilisimasatigut ineriartortitsisimasut pigiinnarnissaat. Sulisussatigut napisoornertaqanngitsumik ikaarsaariarnissaq kommunit nutaat aallartilluarnissaannut apeqqutaasorujussuussaaq.

 

Tassami aamma kommunit nutaat aallaqqaammulli isumannaatsumik ingerlanneqarnissaat isumagisassaavoq imaannanngitsoq pingaartittariaqartorlu. Tamatumani ullumikkut kommunaldirektørerisat­ta pikkorissut kattunnissamullu ataqatigiissaarisut qaammatini aggersuni piareersarnermi isuman­naatsumik siunnersuisinnaanerat atorfissaqartinneqar­torujussuussaaq – kommuninut nutaanut ikaarsaarneq ippinnanngitsumik, torersumik toqqissisimanartumillu pisinnaaqqullugu.

 

Ullumilu killiffigisatsinni kommunini politikerit aaqqissuussaanermik iluarsaaqqinnerup innuttaasunut taakkualu oqartussaaqataanerannut pitsaasumik kinguneqarnissaa pillugu annerusumik minnerusumilluunniit suleqataasimasut qutsavigerusuppakka – tassaagassimi iluarsaaqqinnerup pisariaqartup inuiaqatigiinnut iluaqutaanissaanik qulakkeerisussat.

 

Naggasiinialersinnanga KANUKOKA-mi kommunillu akornanni uggorineqartoq naalakkersuisut siulittaasuata najuunnera iluatsillugu tusarteqqilaarusuppara: Aaqqissuussaanermik iluarsaaqqinnermi sumiiffinni oqartussaaqataanerup ineriartortinneqarnissaanut atatillugu Naalakkersuisut siunnersuutigisimasaraluata – tassa najukkani aqutsisunik, lokalrådinik, pilersitsisinnaanissap – Inatsisartuni taperserneqannginnera ajuusaarutigaarput. Taamatut aaqqissuussinissaq uagut tungitsinniit isigalugu isumassarsiatsialaviugaluarpoq ineriartortitassatut piukkunnartoq, soorlumi borgmesterit kommunaldirektørillu siorna oktobarimi ataatsimiimmata aamma eqqaagiga. Najukkani aqutsisoqar­nermik, lokalrådeqarnermik, taallugu siunnersuut taanna nunaqarfinni aqutsisoqarnerup isumaanut ajunngitsumut assingulluinnarpoq kommunalbestyrelsit ataanni qanimut oqartussaaqataanikkut illoqarfinnut tunngatillugu piukkunnarluinnartoq.

 

Aqutsinermut inatsisip inaarutaasumik nutarterneqarnissaani Inatsisartunut Naalakkersuisunullu tamanna eqqarsaatigeqqeqquarput.

 

Aamma eqqaarusuppara issatsiannguaq utoqqaat peqatigiiffiisa kattuffianni siulersuisut naapeqatiserinnimmata naapisimaarsimagakkit. Kommunit kattussuunnissaannut pingaartillugu kissaatigaat kaammattuutigalugulu kommunerujussuanngortussat tamarmik utoqqarnut politikkiliornissaat kiisalu utoqqarnut siunnersuisoqatigiinnik pilersitsinissaat. Politikkiliornissamut innersuussutigaat ukioq kingulleq Sisimiuni juuni 2007-imi utoqqaat isumasioqatigiinnerannit imaqarniliaq sukumiisoq isumassarsiorfigineqarsinnaasoq. Taanna aamma KANUKOKA-p allaffeqarfiani pissarsiarineqarsinnaavoq. Taamaasillu­nga utoqqaat kattuffiannik ataatsimeeqateqarninni pingaartillugit kissaatigalugillu kaammattuutaat ilissinnut apuuppara.

 

Ukiaru septembarip ulluisa 24-anni 25-annilu kommuneqarfiit kattuffiannut aallartitat ataatsimiinnissaat Ilulissani pisussaavoq – ikaarsaariarnermilu ataatsimiititaliat upernaaru qinerneqartussat aallartitassanik toqqaasussaapput. Ilumummi, aqqusernit paarlaffiannut pisimavugut aaqqissuussinerit pisoqqat nutaanik taarserneqarfissaannut. Siunissamilu kattuffik qanoq pineqassanersoq imaluunniit qanoq aaqqissuuunneqassanersoq kattuffimmut aallartitat nutaat aalajangigassaraat. KANUKOKA-p siulittaasoorisimasaasa ilaata Ulloriannguaq Kristiansenip oqaasinnaavatut oqaannassaa­nga: ”Nalunarumaanngilaq”.

 

Ataatsimiinnissamut maanga tikilluaqqoqqippassi.