Isumasioqatigiinnerup siumoortumik allaaserineqarnera una toorukku atuarsinnaavat.

 

EQIKKAANEQ 

 

KANUKOKA-p siulittaasuata 15. septembari 2011 tusagassiorfinnut nalunaarutaa: 

Ataatsimut isigisumik pisussaaffiliisumillu meeqqat inuusuttullu pillugit suleqatigiinnissaq

Kommunit isumasioqatigeereerneratigut maanna sulissutigineqalerpoq meeqqanik inuu­­­sut­­tu­aqqanillu susassaqartut assigiinngitsut suleqatigiilluarnerulernissaat.

Ataqatigiissaarisussatut suleqatigiissitat piaartumik aallartissapput meeqqanik inuusuttuaqqanillu sul­lissi­nermi suleqatigiinnerup pisussaaffiliisumik inger­lan­neqalernissaanut tunnga­vis­siorlutik. Ata­qati­giis­saa­ri­­sus­­sanik pilersit­sinissaq isumasioqatigiinnerup Sisi­miuni ulluni 11.-13. sep­tem­bari 2011 inger­lan­ne­qar­­­tup kingorna alloriar­ne­rit siullersarissavaat.

Isumasioqatigiinnermi sam­misatut qulequtaavoq "Meeq­­qat inuusuttullu pillugit suleqatigiinneq". Peqataapput kommunini atuarfeqarnermi isumaginninnermilu ataatsimiititaliani siulittaasut pisortaasullu, borgmesterit KANUKOKA-llu siulersuisui. Aamma Naalakkersuisut peqataatitaqarput, kiisalu ilisimatusarsimasunik suliassaqarfillu pillugu ilisimasaqarfim­meersunik namminnerlu piumassutsiminnik suliniartunik oqalugiartoqarpoq.

Kommunit meeqqanut inuusuttuaqqanullu qanoq suliniuteqarnersut isumasioqatigiin­nermi paasissutissiissutigineqarpoq. Paasinarpoq suliniuteqarluartoqartoq aammalu ajornartorsiutit pinngitsoortinniarlugit iluarsiniarlugilluunniit nukippassuit ator­neqar­tartut. Nassuerutigineqarporli suliat naammassisaqarluarfiunerusin­naagaluartut pissut­sit ataatsimut isiginerullugit suliniartoqartuugaluarpat pingaartumillu atuarfik, isumaginnittoqarfik meeqqerivillu pisussaaffiliinerusumik suleqatigiittuugaluarpata.

Susassaqartut assigiinngitsut meeqqanik inuusuttuaqqanillu sammisaqartut pisus­saaf­filiisumik suleqatigiinnissaannik kissaatigisaq 2009-mili ilaqutariinnik ikiorsiisarneq pillugu KANUKOKA-p isumasioqatigiissitsinerani qaqinneqarpoq. Kissaatigisarli i­ngerlaannaq malersoqqinneqanngitsoorpoq ilaatigut taamani kommunit kattuteqqam­mer­neranni aaqqissuussaanerup tungaatigut isumagisassarpassuaqarsimanera pissutaal­luni.

Maannali suleqatigiissitat ataqatigiissaarisussat kommunit sisamaasunit KANUKO­KA­-millu inuttalikkat pilersinneqartussanngorput suleqatigiittoqarnerunissaanik ata­qatigiissaarisoqarnissaanillu kis­saatigisaq piviusunngortinniarumallugu.

Assigiinngitsunik suliallit suleqatigiinnerat kommunini arlalitsigut ingerlatimisaar­ne­qareeraluarpoq, nukittorsarneqartariaqarporli aalajangersaaffigineqarlunilu. Ataavar­­tumik suleqatigiilluarnissamut inatsiseqarnikkut allaffissornikkullu ingerlatsinermi akor­­nutaasinnaasut misissorneqassapput piiarniarneqarlutillu.

Suleqatigiissitat ataqatigiissaarisussat 1. januaari 2012 nallertinnagu suleriaqqinnissa­mut tun­ngavissamik saqqummiussissapput.

 

Oqaluuserineqartunik pingaarnersiuineq

 

Annermik najoqqutarineqarput ataatsimiinnermik aqutsisup ataasinngorner­mi 11. sep­­tembari marlunngornermilu 12. septembari ullaakkut ataatsimiinnerup aallartinnerani ippassaammat sammineqartunik eqikkaaneri.

Sapaammi 11. septembari ullup qeqqata siorna suliniut "Kammagiitta - Fri for Mobberi"-p persuarsiorpalaartumik nuannersumillu saqqummiunneqareermat ualikkut meeqqanik inuusuttuaqqanillu isumaginninnermi atuarfeqarnermilu suliniutit kom­mu­ninit taasariaqartinneqartut saqqummiussuunneqarput apeqquteqarfigineqartarlutillu.

Ataatsimiinnermik aqutsisup 12. septembari ullaakkut isumasioqatigiinnerup aallarteqqinnerani eqikkaanermini suliniuterpassuit kommunini ingerlanneqarnerat nuannaarutissaanerarpaa. Saqqummiunneqarsimasut oqaaserineqarsimasullu imaattunik taasaqarfigai:

Kommune Kujallermit:

• Sullissisut ilinniarsimanngitsut modulikkaartumik namminneq oqaatsitik atorlugit ilinniartinneqarnerat allanik suleqateqarlutik (Foreningen Grønlandske Børn) tamanut piukkunnarpoq.
• Meeqqat meeqqerivinniinnissaminnut periarfissaqarsimanngitsut atualernissamin­nut piukkunnarsarlugit sullinneqarnerat.

Qaasuitsup Kommunianit:

• Peqqinnissaqarfik suleqatigalugu peqqinnissamik siuarsaaniarneq.
• " Suliniuterpassuit kommunit kisimik aningaasatigut nammassinnaanngilaat. Namminersorlutik Oqartussat suleqataasariaqarput."

Qeqqata Kommunianit:

• Susassaqartunik assigiinngitsunik suleqatigiissitsineq (netværkiliornikkut), susassaqartut imminnut oqaloqatigiinnerulernissaat sapinngisamillu piaartumik siunnerfilikkamik iliuuseqartarnissaq qulakkeerniarlugu.
• Atuartut ilaat immikkut ikorfartugassaalersimasut suliniuteqarfiginerisa aallartissimanerat.
• Periarfissanik allatulaaq ittunik ujaasinerup pingaaruteqarnera. "Allatut eqqarsartariaqalerpugut - inatsisit taamaannerat uniffigiinnarnagu periarfissarsiortariaqarpugut".

Kommuneqarfik Sermersuumit:

• Ilinniartitsisut angalatittakkat - atuarfinnut aalajangersimasunut pituttorsiman­ngit­sut. Isumaginninnerup iluani aamma taamatut aallartitsinialerput.
• Alimasissumit atuartitsinermik misiliineq (Kapisilinni atuartunut). Misiliinerup na­­laani Tele attaveqaatinut akiliisarpoq.
• "Piorsaaviit" - multiværksteder, 16-24-nik ukiulinnut.

Ataatsimiinnermik aqutsisup ilanngullugu maluginiarsimavaa isumaginninnermut naalakkersuisup Mimi Karlsenip meeqqanut ilaqutariinnullu sullissiner­­­mi kommunit qanoq oqilisaatiginerat malunnarnerarlugu oqaasii.

Ataasinngornermi 12. septembari saqqummiussat oqaaserineqartullu ataatsimiinnermik aqutsisup ima taasaqarfigai:

• Isumaginninnermut naalakkersuisup Mimi Karlsenip meeqqanut inuusuttuaqqanullu isumaginninnermi periusissat anguniakkallu pillugit oqaaseqarnermini kommu­ninik suleqatiginninnissaminut ammanera iluatinnarpoq ingerlateqqitassaqqillunilu.
  
  
• Ilisimatuup Else Christensenip unneqqarilluni erseqqissuliornera kitsisitigullu takussutissiinera kommunit kissaatigisartagaannut naapertuuppoq. Nutaaliornissamik kajumissaarinera piviusunngortinniagassaqqippoq. Nersualaagassaavoq taama erseqqitsigisumik saqqummiussinissaminut sapiissuseqarmat. [Una tooruk nalunaarusiaq "Kalaallit Nunaanni isumaginninnikkut meeqqanut inuusuttunullu suliniutit" piumallugu]
  
  
• Angalasartoqarnermik pilersitsinissaq eqimattani oqallinnermi tamanit kaammattuutigineqarpoq. Maluginiartariaqarpoq tamatumani aningaasatigut kommunit kisimik nammattuunnginnissaat pingaartinneqartoq, ilaatigut aningaasaateqarfiit (fondit) qitiusumillu oqartussat akileeqataasinnaanerat pissusissamisoortuutinneqarluni.
  
  
• Meeraq qitiutillugu qanoq aaqqissuusseqqittoqartariaqarnera pillugu kommunit peqqissaartumik nalilersuillutik misissuisariaqarnerat qaqinneqarpoq. Paasissutissanik katersuiffeqarnissaq KANUKOKA-mut suliassatut tigullaquneqarpoq. Politikerit sulianut najoqqutassiornermi nalilersuisariaqarnerat ujartorneqarpoq.
  
  
• MIPI-mut (Meeqqat Inuusuttullu Pillugit Ilisimasaqarfik) tunngatillugu: Ilisimasas­sanik aaqqissuussaalluartumik avitseqatigiinnissaq susassaqartut assigiinngitsut suleqatigiilernissaannut pingaaruteqarluinnarpoq.
  
  
• Suleriaatsit IT-systemillu maanna atukkavut atulerumaagassavullu atorluarniartariaqarpavut.
  
  
• "NANU-børn"-iminngaannneersut suleqatiginnikkusussuseqarnerat suliniarluarnerallu nuannaarutissaavoq - taamaalilluni namminneq kajumissutsiminnik suliniaqatigiit pisortallu angusaqarluarfiusumik suleqatigiissinnaanerat takussutissaqarlualereerpoq. "NANU-børn"-ip Kommune Kujallermik isumaqatigiissutaa tamanut takutissallugu iluatinnarpoq.

Marlunngornermi 13. septembari saqqummiussat uku immikkut maluginiarneqarput:

• Ilinniartitaanermut naalakkersuisup Palle Christiansenip oqalugiaataani (kontorchef Karl Kristian Olsenimit saqqummiunneqartumi) assersuutitut taaneqartoq feltmarskal Montgomery-p sorsunnersuit aappaanni periaaserisimasaa maluginiarneqarpoq, tassa akeqqat tunungeriarlugit arlalitsigut ornillugit sanngiiffiisigut atituumik saassullugit.
  
  Periaaseq tamanna meeqqat inuusuttullu isumagineqarneranni ajornartorsiutit ili­uu­seqarfiginiarneranni isumassarsiorfigineqarsinnaavoq.
  
  
• Qulequtaq "Siulersuinermi paasissutissat iluaqutissartaat" (taassumalu siulia ataasinngornermi sammineqartoq "Siulersuinermi paasissutissat suleqatigiinnermik qulakkeerinnissapput"):
  
  Saqqummiunneqartoq tassaavoq Pisortat ataatsimoortumik IT-mik aqutsisoqatigiivisa (FOIS) ataanni qarasaasiaqarnikkut aaqqissuussinissamut suliniutip kommuninit peqataaffigineqartup misissuiffigeqqaarneqarnissaanut pilersaarut. Siu­nertaa­voq ataatsimoorussamik systemeqalernissap ilisimasanik tunngaveqartumik iliuuseqartarnissamut tunngaviusussap misissornissaa.
  
  
• Eqimattakkaarluni oqallinnermi isumasioqatigiinnerup kingorna ingerlariaqqissutissatut manna siunnersuutigineqarpoq:

Suliassaqarfiit akimorlugit pisussaaffiliisumik suleqatigiilernissaq kommunini tamani isumaqatigiissusiorfigineqassasoq, tamannalu siunertaralugu ataqatigiissaarisussanik suleqatigiissitaliortoqassasoq.

Kommunit sisamaasut tamarmik immikkut marlunnik ataqatigiissaarisunut ilaasortaatitaqassapput, KANUKOKA aamma marlunnik ilaasortaatitaqassalluni aqutsisuusussanik - aammalu naalakkersuisoqarfiit attuumassuteqartut marluusut peqataatitaqarsinnaanerat taaneqarluni. Ataqatigiissaarisut taakku piaartumik suleriaqqinnissamut tunngavissamik najoqqutassiussapput.