1. Aallartitat ataatsimiinnerat

Aallartitat ataatsimiigiartarnerini angalanermut, ineqarnermut, nerisaqarnermut, aqqutaani unnuinernut ullormusiassanullu aningaasartuutit KANUKOKA-mit akilerneqartarput. Angalanissanut pilersaarutaareersut naapertornagit angalanerit kommuninit akilerneqassapput. Akunnittarfinni unnuinerni imigassat il.il. ineqasimasup akunnittarfimmut toqqaannartumik akilissavai.

1.a Aallartitat ataatsimiinnerini alaatsinaattut, qaaqqusat il.il.

Aallartitat ataatsimiinnerini allat, soorlu kommunaldirektørit, kommunalbestyrelsini ilaasortat, qaaqqusat, allallu alaatsinaattut, angalanissartik, ineqarnissartik nerisaqarnissartillu namminneq inniminnertussaavaat akilerlugillu. Peqataasussat inissaat qulakkeernialugit, KANUKOKA-mit inissat nerisaqarnissallu siumut inniminnerneqartarput. Peqataaniartut KANUKOKA-mut nalunaartassapput.

2. Ataatsimiinnerit allat, pikkorissarnerit, ataatsimeersuarnerillu

Ingerlatsivinni pisortaasut ukiumoortumik ataatsimeersuartarneri akiligassanik avitseqatigiinnikkut aaqqissorneqartarput, KANUKOKA-millu angalanissat, ineqarnissat nerisaqarnissallu isumagineqartarlutik.

3. Angalanerni akiligassanik avitseqatigiineq

Pikkorissaanerni ataatsimeersuarnernilu il.il. ileqquuvoq aningaasartuutit matuneqarnissaat kommunit assigiimmik avitseqatigiillutik akisussaafigisarpaat, tassa peqataasut tamarmik assigiimmik akiligassinneqartarput, aammattaq tassani illoqarfimmi / kommunimi ataatsimiiffiusumi peqataasut akiliisussaasarput (angalanngikkaluarlutik).

Akiligassanik avitseqatigiittoqartillugu, angalanernut ataatsimiinnermilu aningaasartuutinut kommunit assigiinnik akiligassinneqartarput. Ataatsimiinnissanut aningaasartuutissat KANUKOKA-mit akileqqaarneqartarput, ataatsimmiinnissalli piviusunngorsinnaanera qulakkeerniarlugu KANUKOKA-mit angalanissanut ataatsimiinnissamullu aningaasartuutissat kommuninut siumoortumik akiligassanngortinneqartarput (takujuk imm. 9). Ataatsimiinnerilli aatsaat naammassigaangata siumut akiliutaasimasut aningaasartuutigineqavissimasullu assigiinngissutaat kommuninut akiligassanngortinneqartarput, annertunerusumillu siumut akiliisoqarsimatillugu sinneri utertinneqartarlutik.

4. Angalanissamut pilersaarutinik nammineq allannguineq

Malugeqquneqarpoq akiligassanik avitseqatigiinnikkut aaqqissuussinerit ataatsimiinissamut aalajangersimasumut aningaasartuutaammata. Taamaattumik nammineq allanngortitsinerit, allamik pisassaqarluni aqqutaani sivisunerusumik uninnganerit, illoqarfimmiluunnit ataatsimiiffiusumi sivisunerusumik uninnganerit KANUKOKA-p susassarinngimmagit, immikkut akiligassat kommuninut akiligassanngortinneqartarmata.

5. Peqataaniarluni nalunaarnerit allanngortinneqarsinnaanngitsut

Ataatsimiinnissap piviusunngorsinnaanissaa qulakkeerniarlugu akunnnittarfimmilu ataatsimiinnermi aningaasartuutissat matussuserniarlugit kommunit immersugassamik nassinneqartarput, tassanilu peqataaniarluni nalunaarfissap ullua kingulleq, peqataassagaannilu siumut akiliutissap annertussusia allassimasarput. Nalunaarfissap kingorna, siumut akiliutaasimasoq nalinginnaasumik utertinneqarsinnaaneq ajorpoq. Bilitsinulli akiliutaasimasut angalatitsivinnit aatsaat utertinneqarsinnaagaangata kommuninut utertinneqarsinnaasarput. Akunnittarfinnulli akiliutissat aatsaat utertinneqarsinnaasarput akunnittarfiup akiligassanngortissimanngikkaangagit, naak peqataanngitsoortoqarsimagaluartoq "takkutinngitsoortunik". Akiliutigisimasanik utertitsisoqassatillugu utertitsineq aatsaat pisinnaavoq ataatsimiinnerup naammasseerneratigut, ataatsimiinnermullu aningaasartuutiviusimasut naatsorsornerisa naammassereerneratigut.

Malugeqquneqarput peqataasinnaajunnarnerit suugaluartulluunnii kingusinnerpaamik ullut marluk sioqqullugit KANUKOKA-mut nalunaarutigineqartassammata, bilitsinut il.il. akiliutigineqarsimasut utertinneqarsinnaaniassammata.

6. Utoqqarnut bilitsit

65-inik ukioqalereersimasut akikinnernik bilitseqarsinnaasarput, taammattoqartillugu peqataasussap inuuia KANUKOKA-mut nalunaarugitigineqassaaq.

7. Ullormusiat

Aallartitat ullormusiaat KANUKOKA-mit akilerneqartarput, ataatsimiigiartarnernili allani ullormusiassat kommuninit akilerneqartarput. Nerisaqaatigaluni ineqarnerni ullormusiat ikilisakkat tunniunneqartarput.

8. Ataatsimiinnerup ataatsimut akia

Ataatsimiinnerup ataatsimut akia tassaavoq ataatsimeeqatigiinnermi ataatsimut aningaasartuutit, tassani ilaatinneqarlutik ineqarnermut, nerisaqarnermut, ininut ataatsimiiffinnut, nutserisunut, atortorissaarutinut, saqqummiisussanut il.il. Ataatsimut aningaasartuutit kommuninut agguataarneqartarput, kommuni qassinik peqataasoqarsimanera tunngavigalugu.

9. Siumoortumik akiligassat

Siumoortumik akiligassat imarivai ataatsimiinnerup akia, angalanermut aningaasartuutit, ataatsimiinnissap pilersaarusiornera, saqqummiissussat nutserisullu akissarsiassaat angalanissaallu, kiisalu allaffeqarfimmiit peqataasussanut aningaasartuutit. (Takujuk imm. 5 aamma 8)

10. Aqqutaani unnuinerit

Akiligassanik avitseqatigiinneq (takujuk imm. 3) atorneqanngikkaangat kommunit namminneq aqqutaani unnuinissat isumagisarpaat. Eqqaamallugu aqqutaani kinguaattoornermi akunnittarfiit unnuiffissat nalunaarfiginissaat. Akunnittarfiit amerlanerit "takkutinngitsoortut" akiligassittarpaat.

11. Akunnittarfinni nammineq akiligassat

Ataatsimiinnerni pikkorissarnerniluunniit akunnittarfinni nerisaqarnerni imeq kisiat iggisissatut sassaalliutigineqartarpoq. Allanik iggiseqarnerni, oqarasuaatinut, internet-imut il. il. Akiligassat KANUKOKA-p susassarinngilai, najugaqartullu namminneq aallannginnerminni akunnittarfimmut akiligassarai.

12. Aapparisamik meeqqanilluunniit angalaqateqarneq

Allanik angalaqateqarnerni angalanernut ineqarnernullu akiligassat KANUKOKA-p susassarinngilai.