Imarisaa naatsumik oqaatigalugu
Pikkorissarneq, 2005-imi kommunalbestyrelsinut qinersinerup kingornatigut ingerlanneqartussatut kommuninut neqeroorutigineqartoq, ulluni marlunni ingerlanneqassaaq. KANUKOKA pillugu paasissutissiisoqatsiareerpat pisortanilu ingerlatsiviit aaqqissugaanerat pillugu aallarniutaasumik nassuiaasoqareerpat pikkorissarnerup ulluani siullermi sammineqassapput Aqutsinermut inatsimmi malittarisassat taakkualu atuutsinneqarneranni eqqarsaataasut.
Tamatuma kingorna politikkikkut ulluinnarni ingerlatsinermi assersuutissat aallaavigalugit eqimattakkuutaarluni oqallittoqassaaq aaqqiissutissanillu siunnersuuteqartoqarluni peqataasunut tamanut saqqummiutassanik.
"Pisortat ingerlatsineranni suliassat suliarineqartarnerat" aamma "Pisortat ingerlatsinerat pillugu paasitinneqarsinnaatitaaneq" pillugit inatsisit pingaarnersiorneqassapput.
Politikerit inissisimaffiat pillugu assersuutissat sammineqassapput. "Pisortat ingerlatsineranni suliassat suliarineqartarnerat" aamma "Pisortat ingerlatsinerat pillugu paasitinneqarsinnaatitaaneq" pillugit inatsisinut tunngassuteqartunik eqimattakkaarluni oqallittoqassaaq, peqataasunullu tamanut saqqummiussisoqassaaq.
Pikkorissarneq qanoq ingerlanneqassasoq
Pikkorissarneq kalaallisut qallunaatullu ingerlanneqassaaq KANUKOKA-mi siunnersortinit marlunnit.
Pikkorissarnerup atuagassartai siumoortumik kommuninut qarasaasiakkut nassiunneqassapput. Taakku kommunit namminneerlutik amerlasuunngortissavaat pikkorissarfissamillu piareersaallutik. Suliassiissutit pikkorissarnerup nalaani aatsaat agguaanneqassapput.
Pikkorissartitsinerup akia
Marlunnik ilitsersuisoqarluni pikkorissaaneq, ineriartortitsineq atortussanillu nutserineq ilanngullugit: kr. 45.000,00
Kommunip isumagissavai init pikkorissarfiusussat, teknikkikkut atortut ilitsersuisullu ineqartinneqarnerat. Ullormusianik angalanermilu aningaasartuutinik kommune akiligassinneqarumaarportaaq.
Programmi
1. KANUKOKA pillugu paasissutissiineq
2. Pisortat ingerlatsivii
Pisortat ingerlatsiviisa aaqqissugaanerat
Pisortani oqartussaasut sulinerannut malittarisassat
3. Aqutsinermut inatsit
Aalajangersakkat nalinginnaasut
Kommunalbestyrelse
Akissarsiat pillugit malittarisassat
Borgmesteri
Kommunip aningaasaqarnermut ingerlatsivia
Nunaqarfinni aqutsisut
Kommunit nakkutigineqarnerat
4. Politikeritut ulluinnarni sulinermit assersuutissat
Eqimattakkaarluni oqallisigalugit aaqqiissutissanillu peqataasunut tamanut saqqummiussilluni.
5. Politikerip inissisimanera
6. Pisortat ingerlatsineranni suliassat suliarineqartarnerat pillugu inatsit
7. Pisortat ingerlatsinerat pillugu paasitinneqarsinnaatitaanermik inatsit
8. Politikeritut sulinermit assersuutissat - "Pisortat ingerlatsineranni suliassat suliarineqartarnerat" aamma "Pisortat ingerlatsinerat pillugu paasitinneqarsinnaatitaaneq" pillugit inatsisit
Eqimattakkaarluni oqallisigalugit aaqqiissutissanillu peqataasunut tamanut saqqummiussilluni.
9. Siunissami kommunit suliassaallu
