Kommunini ingerlatsivinni tamani pikkorissarnissamik piginnaasatigullu malinnaatinneqarnissamik pisariaqartitsinermut matussusiinissaq peqataaffiginerujumallugu Kalaallit Nunaanni Kommunit Kattuffiata pikkorissartitsisarnini maanna ineriartorteqqinnialerpai. 

Kommunit kattunnerisa kingornatigut kattuffiup ineriartortitsinermut tunngasunik, taamalu aam­ma pikkorissartitsinernik, sammisaqarnerusussanngorlugu naleqqussarneqalerneranut atatillugu ta­manna pivoq.

Ukiorpaaluit matuma siornatigut KANUKOKA pikkorissartitsinermut immikkoortortaqarsima­ga­luar­poq. Immikkoortortaqarfik tallimanik sulisulik taanna 1997-imi atorunnaarsinneqarpoq, tamatumalu kingorna ilaatigut pikkorissar­tit­sisartut allat innersuussutigineqartarsimallutik. Kisi­annili kattuffiup sulisutigut periarfissarilikkani atorlugit pikkorissartitsisarnini ingerlatiinnar­si­ma­­­­vai makkuusut: Kommunini ingerlatsivinni pisortaasunik ataat­si­miititalianilu siulittaasunik isumasioqati­giissitsinerit pikkorissarnertallit, politikerinik pikkoris­sar­­titsinerit pingaartumik kom­munalbesty­rel­sinut qinersinerit kingornatigut ingerlanneqartartut kiisalu kissaateqartoqarne­ratigut aalaja­nger­simasunik sammisaqarluni pikkorissartitsinerit

KANUKOKA-p siulersuisuisa nutaat 2011-p aallartinnerani atuutilersut kissaateqarnerat tun­nga­vigalugu kattuffik pikkorissarnernik amerlanerusunik maanna neqerooruteqaqqilerpoq. KANU­KO­KA-p ataatsimii­sitsi­nernik angalanernillu aaqqiissuussinerit misilittagaqarfigilluareermagit tamatumani apeqqu­taa­ne­ru­innarsimavoq pikkorissarnerit qanoq piumaneqartiginissaat, aningaa­sas­saqartinne­qarnissaat aam­malu qanoq pisariitsumik kommunillu pisariaqartitaannut naleqqus­sakkamik aallarteqqissinnaanissaq.

Tamanna pillugu ataatsimiititaliamik ataqatigiissaarisussamik pilersitsisoqarsimavoq kommuni­nit tama­nit peqataaffigineqartumik. Ataatsimiititaliaq kissaatigisanik katersuillunilu, pingaarner­si­­uillu­nilu ataqatigiissaariniartussaavoq. Taamalu kursuskatalogimik allaffissornermi sulisut poli­tikerinullu neqeroorutinik imaqartumik ineriartortitsisoqassaaq.

Tamatuma peqatigisaanik pikkorissarnernut peqataaniarluni qarasaasiakkut nalunaartarfik pikko­rissarnernillu nalunaarsuiffik pisariitsoq kanukoka.gl-imut kommunillu nittartagaannut sisamaa­sunut ilanngunneqarsinnaasoq misiligarneqaleruttorpoq.

2011-p ukiaanerani allattugaatigilerpavut pikkorissarnissat pilersaarutaasut, ilaat ullulersukkat ilaal­lu ullulereernagit periarfissaasutut allattukkat, kattuffiup sulisuisa ilinniakkatik misilittakka­tillu tunngavigalugit ingerlassinnaasaat pisariaqarpat avataaneersunik ikiorteqarlutik.

Allattukkat allakkamut matumunnga ilannguppavut ilisimatitsissutitut. Taakku kursuskatalogin­ngorlugit suliareqqinneqartussaapput imarisai nassuiarlugit paasissutissanillu allanik ilaartor­lu­git.

Pikkorissartitsinernik ataqatigiissaarinermut ataatsimiititaliaq ukuninnga inuttaqarpoq:

Peter Sonberg, Kommune Kujalleq
Iain Mcquham, Kom­mu­neqarfik Sermersooq
Severine Olsen, Qeqqata Kommunia
ArnánguaK Holm Olsen, Qaasuit­sup Kommunia
Erna Thomsen, KANUKOKA
Zenica Gosvig Larsen, KANUKOKA
Ken Nyborg, KANUKOKA