|
KANUKOKA isumaqarpoq "Kalaallit Nunaanni Kommunit Kattuffiat". Qallunaatut: "De Grønlandske Kommuners Landsforening". Kattuffik kommunit soqutigisaqaqatigiiffigaat, kommunit ataatsimoortumik nalinginnaasumillu soqutigisaannik sulissutiginnittuusoq. Kommunit suleqatigiinnerisa siuarsarnissaat kommunillu sulineranni ikiuuttarnissaq aamma siunertaavoq. Kattuffik ulloq 24. juuli 1972 pilersinneqarpoq kommunit nammineersinnaanerisa nukittorsarnissaat siunertaralugu kiisalu naalagaaffiup kommunillu akornanni suliassat agguataarneqartarnerat sunniuteqarfiginiarlugu. Suliassat qitiusumit kommuninut nussorneqarnerat ilutigalugu ataatsimoortumik peqatigiiffeqalernissaq pisariaqartinneqarnerulerpoq. Naalakkersuinikkut aqunneqarnera Kattuffimmi oqartussaanerpaavoq Aallartitat ataatsimeersuarnerat kommunalbestyrelsinut qinersinerup kingorna ataasiarluni pisartussaq. Anguniagassat malitassallu pingaarnerit siulersuisut sulinerminni tunngavigisassaat aallartitat ataatsimeersuarneranni aalajangersaavigineqartarput. Kattuffiup maleruagassai aallartitat ataatsimeersuarneranni aalajangersarneqartarput. Kommunalbestyrelsinut qinigaaffik siulersuisunut aamma atuuttarpoq. |
